Mantultuloy a Manalagar ed si Jehova

1. Anto so tema na kombension, tan akin a nipanpanaon itan?

¹ “Si Jehova sikato so Dios na inkatunong,” so insulat nen Isaias. ‘Mapalar so amin a manalagar ed sikato.’ (Isa. 30:18b) Dakel so salaysay na Biblia nipaakar ed impangukom na Dios ed saray kakabusol to tan ed impangiliktar to ed matoor iran lingkor to. Antoran leksion so naaralan na saray managdayew ed si Jehova manlapud saratan a salaysay? Anto so nagawaan tayo la natan pian makapanparaan itayo ed “baleg tan makapataktakot ya agew nen Jehova.” (Joel 2:31, 32) Say nagawan “Asingger la so Kililiktar!” a Distriton Kombension tayo so mamakiwas ed sikatayon manmorekdek ed saratan a tepet pian nausisa tayoy inkasikatayo. Ontulong itan pian makapantultuloy itayon manalagar ed si Jehova.

2. Panon tayon nipatnag so apresasyon ed distriton kombension tayo?

² Kasin akapanggawa kayo la na saray uksoyan pian nagunggonaan kayo ed taloran agew a kombension? Alimbawa, kasin impatanir yo la ed amo yo so pambakasyon yo ed trabaho pian makaatendi kayo? Masakbay lan gawaen itan. Ipikasi yo itan a kerew yo, antis yon gawaen. (Neh. 2:4, 5) Mipadpara, nepeg ya agtayo la ipaleen so pangiyareglo ed saray uksoyan nipaakar ed luluganan, pampundoan, tan arum niran importantin bengatla. Say ontan a maong a panagplano so mangipatnag na aralem ya apresasyon ed espiritual a dulang nen Jehova. Nepeg ya alerto iray mamatatken pian tulongan iramay mankaukolan na tulong diad iyakar da ed kombension, nagkalalo la ed saray maedad la ed kongregasyon.​—Gal. 6:10.

3. Antoran kalidad so nepeg a napatnagan ed limog na totoo nen Jehova diad lugar a pankombensionan?

³ Maabig a Kondukta a Mamapagalang ed Dios: Sano mandaragup itayo ed baleg iran kombension, say maabig a kondukta tayo so onkanan pantasi ed komunidad. Anto so kakaukolanen na saya ed sikatayo? Sano wala itayo ed saray restawran tan diad arum niran pasen na negosyo diad lugar a pankombensionan, saramay pidedenengan tayo so nepeg a nasagyat ed Makristiano iran kalidad tayo, a singa say andukey a panagtepel, kauyamoan, panagdangka, tan inkamakatunongan. (Gal. 5:22, 23; Fil. 4:5) Amin tayo so nepeg a mangipatnag ed klase na aro ya “aliwan mabanday so kagagawa to, agto anapen so kien to, agmapasnok.” Anggaman onlesa iray mairap odino aliwan komportablen kipapasen, labay tayon ‘gawaen so amin ed gloria na Dios.’​—1 Cor. 10:31; 13:5.

4. Panon a natulongan na atateng so ananak da ya onkiwas ed paraan a mangitarok na dayew ed si Jehova?

⁴ Kayari na sakey a kombension, mandinayew a maong so sakey a manedyer na hotel ed kondukta tan itsura na saray tobonbalo tayo kanian imbalikas to so pilalek ton “abrasaen a naynay iray Tasi nen Jehova bilang bisita ed hotel to.” Agaylan makapaliket itan! Saya so makasengeg ed maong a panangipasal tan panangasikaso yo ran atateng. Agmakabat parad atateng ya abuloyan iray ananak da a mansiansia ed kuarto na hotel ya anggapo so panangasikaso ra. Nepeg a saray ananak et naynay a bantayan. (Uli. 29:15) Komon ta say maong a kondukta ra so mangitarok na dayew ed si Jehova tan mamaliket ed puso to!​—Uli. 27:11.

5. Panon tayon nigalang si Jehova diad panamegley na panagkawes tan panag-ayos tayo?

⁵ Masimpit a Panangawes tan Panag-ayos: Makatulong so kada sakey ed sikatayo parad maabig ya impresyon na kombension tayo diad ipaliis ed saray estilo na panangawes tan panag-ayos tayo ya ipapauso, alablabas, agmasimpit, odino masyadon impormal. Onaplika iya sano manbiahe itayon paarap tan pasempet manlapud pankombensionan, legan ya ontutulong a manparaan ed pankombensionan, tan legan ya onaatendi ed saray sesyon. Bilang lingkor na Dios, say importante ed sikatayo et say ngaran tan reputasyon nen Jehova, aliwan say personal iran panlabayan odino pakainawaan tayo. Responsabilidad na saray ulo na pamilya a seguroen a say itsura na pamilya ra et mangipatnag na kasimpitan tan inkalimpio na kanonotan ed amin a panaon.​—1 Tim. 2:9.

6. Sano mamangan itayo ed paway odino mansasaliw itayo, akin a nepeg tayon pansiansiaen so mapagalang ya itsura tayo a singa diad saray sesyon na kombension?

⁶ Importante met a pansiansiaen so mapagalang ya itsura tayo legan na panaon a mansasaliw itayo odino mamangan ed restawran. No mangan tayo ed restawran kayari na saray sesyon, matukoy no say kawes tayo et samay insulong tayo ed kombension. Say pangisulong ed badge card tayo so mamawala na saray pankanawnawan mantasi ya impormal.​—2 Cor. 6:3, 4.

7. Panon itayon makatulong ed pamawala na inkauksoy tan liket diad kombension? (Nengnengen so “Saray Panonot ed Distriton Kombension.”)

⁷ Oniay impasakbay nen Isaias: “Manalagar si Jehova, pian kasian to kayo; pian diad ontan sikato so nitandoro; et sikato so maparaan ed panangasi ed sikayo.” (Isa. 30:18a) Say pisalsalamat ed panangabagey tan agkanepegan a panangasi nen Jehova so nepeg a mamakiwas ed sikatayon mangigalang ed sikato diad panamegley na kondukta tan itsura tayo legan a mandaragup itayo ed saray kombension. Komon ta say “Asingger la so Kililiktar!” a Distriton Kombension so mangigloria ed Dios tayo tan ontulong ed sikatayon manalagar ed sikato!

[Kahon ed pahina 5]

Saray Panonot ed Distriton Kombension

◼ Oras na Programa: Onggapo so programa diad alas-8:30 na kabuasan ed amin a taloy agew. Pigaran minuto sakbay ya onggapo so sesyon, onyurong so tsirman ed plataporma legan ya ipapatogtog so manangilukas a musika parad Panarian. Diad satan ya oras, amin tayo so nepeg lan onyurong ta pian nigapo so programa diad mapagalang a paraan. Mansumpal so programa diad alas-4:15 na ngarem no Biernes, alas-4:05 na ngarem no Sabado, tan alas-4:10 na ngarem no Simba.

◼ Paradaan: Diad amin a pankokombensionan et panggunaetan tayo so manggawa na saray uksoyan parad paradaan. Amin a walaan na luluganan so nepeg ya ontumbok ed panangidirehi na saray parking attendant ta pian mas mainomay itan parad arum. Lapud diad kaslakan et limitado iray paradaan diad saray assembly hall tayo, nepeg a maniiba la ed sakey a luganan anggad posible imbes a sakey odino duara labat a too ed kada luganan.

◼ Pangireserba na Yurongan: Saray yurongan so nayarin ireserba labat ed saramay nambiahen kaiba yo diad parehon luganan odino kaiba yo ed abung.

◼ Panangugto: Ipangasin mangawit kayo lay pangugtoan yo imbes ya ompaway kayo ni ed pankokombensionan pian mangan ed restawran odino manaliw ed saray manlalako na tagano diad paway legan na panangugto. Nayarin usaren so melag a cooler a nayarin iyabay diad yurongan. Saray angkakabaleg a cooler, napisit a kargaan, tan de-alkohol ya iinumen so agniyabuloy ed pasilidad na kombension.

◼ Saray Donasyon: Baleg a gastos so nalalanor diad panangiyuksoy ed sakey a distriton kombension. Nipatnag tayo so apresasyon tayo diad pangiter na boluntaryo iran kontribusyon parad sankamundoan a kimey diad Kingdom Hall odino diad pankombensionan. Antokaman iran tseke ya idonasyon diad kombension so nepeg ya ingaran ed “Watch Tower.”

◼ Saray Aksidente tan Emerhensia: No onlesa so medikal ya emerhensia diad pankokombensionan, ipangasin tawagen so asingger ya attendant, a sikatoy mangipaamtan tampol ed First Aid Department ta pian nasuri na kualipikadon agi a walad kombension no panon kaseryoso so kipapasen tan makapangiter na tulong.

◼ Panagrekord: Antokaman a kagawaan a panagrekord so agnepeg ya ikonekta ed sound system odino elektrisidad na pasilidad, tan nayarin usaren labat itan ya agmakadisturbo ed arum.

◼ Panaglitrato: No manlitrato kayo legan na saray sesyon, ipangasin agkayo manguusar na flash.

◼ Saray Pager tan Cell Phone: Nepeg ya erepen odino ikalna iraya ta pian agmakadisturbo.

◼ Saray Follow-Up Form: Nepeg ya usaren so Please Follow Up form (S-43) pian itarya so impormasyon nipaakar ed siopaman ya angipatnag na interes bilang resulta na impormal a panagtasi legan na kombension. Saray manangipalapag so nepeg a mangawit na sakey odino duaran follow-up form diad kombension. Saray asulatan a form so nayarin isubmite ed Book Room a sikaray mangasikaso ed satan odino iter itan ed sekretaryo na kongregasyon yo kasempet yo.​—Nengnengen so Pebrero 2005 a Ministeryo Tayo ed Panarian, p. 6.

◼ Saray Badge Card: Ipangasin isulong so badge card ed amin a panaon legan na kombension tan legan a manbiabiahen paarap tan pasempet manlapud kombension. Saraya so nayarin naala ed kongregasyon yo. Masakbay lan onkerew na saray kard parad sikayo tan say pamilya yo, ya agla iyaalagar ed pigaran agew sakbay na kombension.

◼ Bautismo: Saray kandidato ed bautismo so nepeg ya akayurong la ed nidesignan pasen da sakbay ya onggapo so programa ed kabuasan na Sabado. Kada sakey so nepeg a mangawit na masimpit a pampabasa tan tuwalya. Pian naseguro a matukoy so kawes da ed okasyon, ipangasin ilaktip iyan punto sano irerepaso na mamatatken ed saray kandidato na bautismo iray tepet ed libron Organisado.