“Ondengel Komon, tan Namunat ed Aral”
1 Diad onsabi iran distriton kombension, dakel a panaon tan sagpot so inusar pian iparaan so programa a mangitarya ed saray pankaukolan na sankamundoan ya impanaagi. No iyaplika, say espiritual ya instruksion a niparungtal so ontulong ed sikatayo pian napansiansia so maong a relasyon tayo ed si Jehova. Maseguron walaan itayo na maong a rason pian ‘ondengel tan namunat ed aral.’—Uli. 1:5.
2 Iparaan so Puso Yo: Si Esdras et imparaan odino “impasen to so puso to a mananap na tunong nen Jehova, tan manumpal ed sikato.” (Esd. 7:10) Panon tayon niparaan so kapusoan tayo a mangawat ed instruksion ya itatarya nen Jehova? Sano akala kayo la na niyimprintan programa diad kombension, repasoen iray titulo na nanduruman parte tan tepetan yoy inkasikayo: ‘Anto so ibabaga nen Jehova ed siak panamegley na sayan programa? Panon kon usaren iyan impormasyon pian nagunggonaan ak tan say pamilyak?’ (Isa. 30:21; Efe. 5:17) Mantultuloy ya itepet iratan diad interon kombension.
3 Ondengel tan Mandalepdep: Kinomendaan nen Jesus si Maria lapud nanimanon maong ed saray salita to, a kuan to: “Si Maria pinili to so maong a betang, a sikato so agnaekal ed sikato.” (Lucas 10:39, 42) No ontan met so awawey tayo, agtayo abuloyan iray angkelag a pamaakaran a mandisturbo ed sikatayo. Sano peles na programa, wala so ‘panaon ya ag-iyesel’ tan idengel. (Ecl. 3:7) Nepeg tayon seguroen ya akayurong tan atentibo itayo legan na interon programa. Anto so makatulong ed sikatayo pian naresistian so tendensian manpalirpalir so kanonotan tayo? Iteen yoy imano yo ed espiker. Mibansag a manbukay na Biblia sano ibabasa iray teksto tan pansiansiaen yon akalukas so Biblia yo legan a sisingbaten iratan.
4 Sano ondedengel ed saray paliwawa, maabig no mannota na antikey pian natulongan itayon mangiyapasakey ed imano tayo. Nepeg tayon isiglaot so narerengelan tayo ed amta tayo la. Saya so ontulong ed sikatayo pian natebek tan natandaan so materyal. Insan diad kada labi, sakbay a naugip, akin ta no repasoen yo iray nota yo tan analisaen yo no panon kaapit so itutumbok yo ed dalan nen Jehova a mamaarap ed bilay.—Uli. 4:10-13.
5 Iyaplika so Naaaralan Yo: Anggaman say programa et seguradon makapaseseg ed sikayo tan ed pamilya yo, aliwan magenap ed sikatayo so basta onsempet ya apaseseg tan aligliwa. Oniay imbaga nen Jesus: “No amta yo so sarayan bengatla, mapalar kayo no sikaray gawaen yo.” (Juan 13:17) Nepeg a maseet tayon ikana iray punto a personal ya onaplika ed sikatayo. (Fil. 4:9) Saya so nakaukolan pian ‘namunat itayo ed aral.’