Repaso ed Teokratikon Eskuelaan Parad Ministeryo

Say onggendan iran tepet so singbaten diad Teokratikon Eskuelaan Parad Ministeryo legan na simba ya onggapo ed Oktubre 30, 2006. Ikondukta na manangasikaso na eskuelaan so 30-minuto a repaso a nibase ed materyal ya akobrian diad saray asainmin parad simba na Setyembre 4 ya anggad Oktubre 30, 2006. [Paimano: No anggapo iray reperensya kayari na tepet, kaukolan yoy mansukimat a dili pian naromog iray ebat.​—Nengnengen so Eskuelaan Parad Ministeryo, p. 36-7.]

KALIDAD NA PANAGSALITA

1. Akin a say inkakalmada so importante sano mansasalita, tan panon tayon napakepa so kapapagaan tayo? [be p. 135 par. 5–p. 137 par. 2, saray kahon]

2. Sano natepetan itayo nipaakar ed sisisiaen tayo, akin a nepeg tayon panggunaetan ya usaren so Biblia sano onebat itayo? [be p. 143 par. 1-3]

3. Panon itayon magmaliw a lalon marunong ed panangusar na Biblia? [be p. 144, kahon]

4. Akin ya importante so mabetbet a panangusar na Biblia sano manbangat itayo diad ministeryo, tan panon tayon nipaseseg so pangusar ed satan diad saray miting ed kongregasyon? [be pp. 145-6, saray kahon]

5. Anto so nankaduan gagala tayo sano mangipaparungtal na sakey a teksto? [be p. 147 par. 2]

ASAINMIN NO. 1

6. Anton makanan mensahe so karga na Salmos? [si-E p. 104 par. 23]

7. Kapigan a nisulat tan atugyop so Uliran? [si-E p. 107 par. 5]

8. Anto so sakey ya uliran, tan akin a say Hebreon titulo na libro so matukoy? [si-E p. 107 par. 6]

9. Diad Uliran 2:1-5, anto so lalanoren na panamaseseg a mantultuloy a mansukimat ed pikakabat, pakatalos, tan pakatebek “a singa ed pilak, tan . . . singa saray niyamot a kayamanan”? [be p. 38 par. 4]

10. Panon ya ipaparungtal a mismo na libro na Uliran so makagunggonan gagala na satan? [si-E p. 109 par. 19]

SINIMBAN BABASAEN ED BIBLIA

11. Panon a si David et ‘nankalakal tan pinareen toy kamarerwa to a singa sakey ya ugaw a pinakso na ina to,’ tan panon a sikatoy naalig tayo? (Sal. 131:1-3)

12. Anton ligliwa so naromog ed apuyanan iran salita ed Salmo 139:7-12?

13. Antoray pigaran alimbawa na inkatalonggaring nen Jehova ya asalambit ed Salmo 145 a sikatoy narayew tayo diad saray pikakasi tayo tan diad publikon ministeryo tayo? (Sal. 145:3)

14. Diad anton dalan a say takot ed Jehova et “sengeg na pikakabat” tan “sengeg na kakabatan”? (Uli. 1:7; 9:10)

15. Diad Uliran 7:1, 2, anto so nilaktip ed “saray salitak” tan “saray ganggan ko”?