Tepet
◼ Kasin aabobonan na “matoor tan makabat ya aripen” iray independentin grupo na saray Tasi a mantitipon pian sukimaten odino pandebatian so Kasulatan?—Mat. 24:45, 47.
Andi, agto itan aabobonan. Balet, makapaermen ta walaray pigaran kabiangan na organisasyon tayo diad nanduruman parte na mundo ya amorma na saray grupo pian sukimaten a bukor iray nanduruman tema ed Biblia. Saray arum et nanggawa na independentin grupo pian aralen so lenguahe ed Biblia a Hebreo tan Griego. Say gagala ra et pian usisaen so inkasusto na New World Translation. Arum so nansukimat ed saray tema nipaakar ed siensia a misiglaotan ed Biblia. Nanggawa ira na saray Web site tan chat room pian pansasalatan tan pandedebatian iray ideya ra. Nanmimiting met ira tan amawala na saray publikasyon pian iparungtal iray nalmoan da tan pian aruman so nitatarya ed saray pantitipon tan ed panamegley na literatura tayo.
Diad interon mundo, makakaawat so totoo nen Jehova na daakan ya espiritual a bilin tan panamaseseg diad saray pantitipon ed kongregasyon, asemblea, tan kombension, ontan met ed saray publikasyon na organisasyon nen Jehova. Diad panangiwanwan na masanton espiritu nen Jehova tan base ed Salita to a katuaan, itatarya to so nakaukolan pian amin a totoo to so “ayadyari a pannononong ed saksakey a nonot tan saksakey ya isip” tan mansiansian “nipaletneg ed pananisia.” (1 Cor. 1:10; Col. 2:6, 7) Seguradon aapresyaen tayo so espiritual a tarya nen Jehova diad sarayan kaunoran ya agew. Kanian, ag-aabobonan odino iyiindorso na “matoor tan makabat ya aripen” so antokaman a literatura, panmimiting, odino Web sites ya agto pinawala odino inorganisa.—Mat. 24:45-47.
Nakomendaan iray indibidual a manguusar ed abilidad dan mannonot pian suportaan so maong a balita. Bangbalet, nepeg a saray personal a gegemtan so agmangisuawi ed susumpalen nen Jesu-Kristo panamegley na kongregasyon to diad dalin natan. Nen inmunan siglo, amasakbay si apostol Pablo nipaakar ed pibiang ed saray makapakesaw, tan mangupot na panaon iran tema, a singa say “polipoli ya anggapo so kasumpalan to a mamalesay sangsangan, anta pakapikabatan komon ed Dios, a dia ed pananisia.” (1 Tim. 1:3-7) Nepeg ya amin a Kristiano so ‘onarawi ed saray siblangan a maatiw, tan saray kapolian, tan saray pikokolkol, tan pisasangsangan nipaakar ed ganggan; ta anggapo so niiter dan kaabigan tan anggapo so kabaliksan da.’—Tito 3:9.
Parad saramay malabay a manaral tan mansukimat a nagkalalo nipaakar ed Biblia, irerekomenda mi ya usisaen day Insight on the Scriptures, “All Scripture Is Inspired of God and Beneficial,” tan arum ni ran publikasyon, a singa saramay manisingbat ed saray propesiyan naromog ed saray libro na Biblia a Daniel, Isaias, tan Apocalipsis. Mangitatarya iraya na daakan a materyal parad panagaral tan panagdalepdep ed Biblia. Diad ontan et “napano [itayo] na kakabatan na linawa [na Dios] ed amin a karunongan a maespiritu tan pakatalos, mankurang a makana ed Katawan ya onarap ed amin a makapaliket, mamabunga [itayo] ed ganaganan maabig a gawa, tan ombaleg ed kakabatan na Dios.”—Col. 1:9, 10.