Saray Panonot ed Distriton Kombension

◼ Oras na Programa: Taloy agew ya onggapo so programa ed alas 8:20 na kabuasan. Sano patogtogen la so kanta na Panarian, nepeg ya amin tayo so onyurong la pian nigapo so programa diad mapagalang a paraan. No Biernes tan Sabado, manampot so programa ed alas 4:05 na ngarem. Tan diad simba, satan so manampot ed alas 4:10 na ngarem.

◼ Paradaan: Lapud kaslakan lan limitado iray paradaan, no nayari et maniiba kayo la ed sakey a luganan.

◼ Pangireserba na Yurongan: Saray yurongan so nayarin ireserba labat ed saramay kaiba yon nambiahe odino diad saramay kaiba yo ed abung.

◼ Panangugto: Ipangasin mangawit kayo lay pangugtoan imbes ya ompaway ni pian manaliw legan na panangugto. Nayarin usaren so melag a pananginan ya iyabay diad salian. Saray angkakabaleg a pananginan, napisit a kargaan, tan de-alkohol ya iinumen so agniyabuloy ed pasilidad na kombension.

◼ Saray Donasyon: Baleg a gastos so nalalanor diad panangiyuksoy ed sakey a distriton kombension. Nipatnag tayo so apresasyon tayo diad pangiter na boluntaryo iran kontribusyon parad sankamundoan a kimey diad Kingdom Hall odino diad pankombensionan. Antokaman iran tseke ya idonasyon diad kombension so nepeg ya ingaran ed “Watch Tower.”

◼ Panagrekord: Antokaman a kagawaan a panagrekord so agnepeg ya ikonekta ed sound system odino elektrisidad na pasilidad, tan usaren labat iratan no agmakadisturbo ed arum.

◼ Saray Follow-Up Form: Nepeg ya usaren so Please Follow Up form (S-43) a pangisulatan na impormasyon nipaakar ed siopaman a nagmaliw ya interesado lapud impormal ya impantasi tayo legan na kombension. Saray manangipalapag so nepeg a mangawit na sakey odino duaran follow-up form diad kombension. Saray asulatan a form so nayarin isubmite ed Book Room a mangaasikaso ed satan odino iter itan ed sekretaryo na kongregasyon yo kasempet yo.​—Nengnengen so Pebrero 2005 a Ministeryo Tayo ed Panarian, p. 6.