Anggapoy Nepeg Kon Pampagaan ta Mantitiwala Ak ed si Jehova

NO PANON AK YA GINMAPON NANTIWALA ED SI JEHOVA

Inyanak ak nen 1948 diad melag ya baryo ed bandad leksab na Nigeria. Diad saman ya taon, abautismoan bilang Tasi nen Jehova so agi nen Tatay ko ya si Uncle Moustapha tan say panguloan ya kuyak si Wahabi. Nen siamera so taon ko, inatey si Tatay ko. Maer-ermen ak ed saman. Imbaga nen kuyak Wahabi ya nanengneng mi lamet si Tatay no bilayen la na Dios. Atan so nampakiwas ed siak ya manaral na Biblia, tan abautismoan ak nen 1963. Asabi panaon, abautismoan met so talora nin agagik ya lalaki.

Nen 1965, inibaan koy kuyak Wilson diad Lagos tan akakkaibak iray regular payunir diad Igbobi Congregation. Makaalis so liket tan seseg da. Kanian nen Enero 1968, nampayunir ak met la.

Walay Bethelite ya brother, si Albert Olugbebi, ya angorganisa na special meeting parad sikami ran kabataan. Impaamta tod sikami ya kakkaukolan iray espisyal payunir diad bandad norte na Nigeria. Agko nalinglingwanan may imbaga nen Brother Olugbebi: “Ugugaw ki ni, kanian usar yoy biskeg yod si Jehova. Kakkaukolan kayo diman.” Labay kon aligen si propetan Isaias ya mabulos ya paibaki ed si Aman Jehova kanian nan-submit ak na application ko.​—Isa. 6:8.

Nen Mayo 1968, naasain ak bilang espisyal payunir diad syudad na Kano, diad bandad norte na Nigeria. Diad saman et peles ya nagagawa so Biafran War (1967-1970). Lapud sayan guerra, amayamay so inatey tan inmirap so bilay da diad bandad norte na Nigeria. Inmabet so guerra anggad bandad bukig na Nigeria. Walay brother ya kokombinsien to ak ya agak la ontuloy. Amtak ya maong met so motibo to, pero say kuan ko: “Salamat ta iyaansakit yo ak. Pero no labay nen Jehova ya onla ak ed sayan asainmin, onla ak ta amtak ya agto ak paulyanan.”

NANTIWALA AK ED SI JEHOVA DIAD PANAON NA GUERRA

Makapaermen so agawa ed Kano. Aderaderal iyan balbaleg ya syudad lapud guerra! No maminsan no manpupulong kami, wala ray nadalan min bangkay. Wala met la ray kongregasyon ed Kano, pero maslak ya agagi et inmalis ed arum ya lugar lapud guerra. Diad tua, manga 15 labat ya agagi so atilak. Natatakot iran maong tan kinmapkapuy so liknaan da. Agaylay liket na sarayan agagi nen sinmabi kamin anem ya espisyal payunir. Pinaseseg mi ra kanian binmiskeg lamet so liknaan da. Tinmulong kami pian naorganisa lamet so aral tan panagpulong, naipawit da lamet iray report dad branch, tan makapan-order ira lamet na literatura.

Inaral ko tan saray kaibak ya espisyal payunir so lenguahen Hausa. Dakdakel so dinmengel ed sikami nen arengel day mensahe na Panarian diad sarili dan lenguahe. Pero wala ray membro na kabkabat ya relihyon diad Kano ya agda agustoan so pampupulong mi, kanian kaukolan mi manalwar. Aminsan, nen manpupulong kami may kaibak, walay laki ya inusilan to kami na barang. Batik kamin tampol kanian agto kami nausilan! ‘Inikdan kami nen Jehova na kaligenan’ anggano wala ray ontan ya peligro kanian dinmakel nin siansia so bilang na Tasi. (Sal. 4:8) Natan, wala lay masulok ya 500 ya publisher ed Kano tan 11 so kongregasyon diman.

INSEBEL IRAY TASI DIAD NIGER

Pigaran bulan ak labat ed Kano. Ag-abayag nen Agosto 1968, imbaki ak diad Niamey, say capital na Republic of Niger. Kaibak so duaran espisyal payunir nen linma kami ed Niger. Kasabi mi ed sayan lugar ed West Africa, agaylay petang manaya! Kaukolan mi met ya aralen so French ta atan so manunan lenguahe ra. Anggano mairap, nanmatalek kamid si Jehova tan nampulong kami kaiba iray pigpigaran publisher ya taga Niamey. Ag-abayag, amin lawarin taga Niamey ya amta ray manbasa et naikdan mi lay libron Say Katuaan a Mangitonton ed Bilay ya Andi Anggaan ya uusaren ed panag-aral na Biblia. Saray totoo lan mismo ingen so oonla ed sikami pian makala ray libro!

Pero ag-bayag, naamtaan mi ya aglabay na gobierno iray Tasi nen Jehova. Nen Hulyo 1969, agawa so sankaunaan ya sirkiton asamblea diad interon bansa tan manga 20 so inmatendi. Tatalaranan mi so pampabautismo na duaran publisher. Pero diad unonan agew na asamblea, wala ray sinmabin pulis. Pinatunda ra so programa. Inawit da kami ran espisyal payunir diad istasyon na pulis, pati may manangasikaso na sirkito. Tinetepetan da kami tan imbaga ran ompawil kamid istasyon kaimbuasan to. Alikas mi ya guloen da kami lamet no ituloy mi diman ed pana-asembleaan mi. Kanian say ginawa mi, dia lad sakey ya abung so paliwawa ed bautismo. Insan agawa so bautismo ed ilog.

Kalabas na pigaran simba, siak tan samay limaran espisyal payunir et impa-deport na gobierno na Niger. Inikdan da kami labat na 48 ya oras, tan akauley kami la kuno no panon kamin makapaway ed bansa ra. Inmunor kami tan linma kamin tampol ed branch office na Nigeria. Diman et akaawat kami na balon asainmin.

Naasain ak ed probinsya na Orisunbare. Mabungay ministeryok kaibay melag ya grupo na saray agagin manaayam diman. Pero kayari anem bulan, labay ak ya papawilen na branch office diad bansan Niger. Bukbukor koy ompawil kanian abigla tan natatakot ak. Pero eksayted ak ta nanengneng ko lamet iray agagi diman.

Kayari duaran agew nen sinmabi ak ed Niamey, walay akabat kon negosyanten Nigerian tan ahalata to ya Tasi ak, tan amayamay so tepet to ed Biblia. Inyaralan ko. Nen nakal toy panagsigarilyo tan inkabuanges to, nandesisyon ya manpabautismo. Malikeliket ak ya nampulong ed nanduruman parte na Niger kaiba iray agagi. Diad inlabas na saray taon, wala ray angawat ed katuaan. Nen kakkasabik, 31 labat so Tasi diad interon bansa, pero nen inmalis ak, wala lay 69!

“ANGGAPOY IDEYA MI ED KIMEY TAYO DIAD GUINEA”

Nen Disyembre 1977, pinmawil ak diad Nigeria pian i-train ed branch office. Kayari na taloran simba ya impan-training ko, si Brother Malcolm Vigo ya Branch Committee coordinator ed saman et walay impabasa ton sulat ed siak manlapud branch office na Sierra Leone. Manaanap iray balolakin payunir ya wala nid kaksilan ya marunong ya mansalita na English tan French pian magmaliw ya manangasikaso na sirkito diad Guinea. Imbaga nen Brother Vigo ya aman so rason no akin ya atawag ak ya man-training. Imbaga to met ya aliwan mainomay itan ya assignment. “Panisipan mo ni antis mon awaten,” so kuan tod siak. Say imbagak ya tampol: “Si Jehova so mangibabaki ed siak, kanian onla ak.”

Linma ak ed Sierra Leone tan dinmiretso ak ed branch office. Oniay imbaga na sakey ya membro na Branch Committee ed siak: “Anggapoy ideya mi ed kimey tayo diad Guinea.” Say branch ed Sierra Leone so mangaasikaso ed panagpulong ya kimey diad Guinea, pero apultot so komunikasyon dad saray agagi ta magulogulo so politika ed sayan bansa. Labalabay da komon ya walay brother ya onla, pero anggapoy available ya onla. Kanian pinaonla da ak ed Conakry, say capital na Guinea, pian makaala ak na permiso ya magmaliw ya permanentin residente diman.

Kasabik ed Conakry, linma ak ed Nigerian embassy tan akatongtong ko may ambassador. Imbagak ya labalabay koy manpulong ed Guinea. Pero imbaga to ya agko la itutuloy ta ompan naaresto o napeligro ni ingen so bilay ko. Kuan tod siak: “Sempet ka lad Nigeria tan diman ka la manpulong.” Say kuan ko: “Andi, agak dia onalis.” Alikas to ya desidido ak kanian sinulatan to may Minister of the Interior na Guinea ya ibaan to ak. Lapud saman, tinulongan to ak may minister.

Pinmawil ak ya tampol ed branch na Sierra Leone tan imbalitak imay agawa. Agaylay liket da ta amta ran benendisyonan nen Jehova so inyakar ko diman. Pinmayag so gobierno ya magmaliw ak ya residente na Guinea!

Manlapud 1978 anggad 1989, nanlingkor ak bilang manangasikaso na sirkito diad Guinea tan Sierra Leone, tan nan-sub C.O. ak met diad Liberia. Nen unaan, naynay ak ya mansasakit. Mas mairap no ombanan mansakit ak diad lugar ya arawrawi so ospital. Pero manggawan-manggawa na paraan iray agagi pian naawit da ak ed ospital.

Wala may agawa ya patey-pateyan ak la ta a-malaria ak tan mabulati so eges ko. Nen inmabig ak la, naamtaan ko ya pantotongtongan la manaya na saray agagi no iner da ak ikotkot no ompatey ak! Anggano wala ray onian agawa, agan balot sinmagi ed isip ko ya taynan koy asainmin ko. Kombinsido ak ya si Jehova so sankaabigan ya manprotekta ed sikatayo ta sarasarag to tayon bilayen anggano ompatey tayo.

NANTIWALA KAMI ED SI JEHOVA BILANG SANASAWA

Nen 1988, walay akabat kon mapaabeba tan maespiritual ya payunir, si Dorcas. Nankasal kami, tan saniba kamin nanlingkor diad kimey ed sirkito. Maar-aro tan masakripisyon asawa si Dorcas. Wala lay kaibak ya mangawit na bagahe tan manakar no ombisita ak ed saray kongregasyon. No maminsan ingen, manga 25 kilometro so akaren mi. No mas arawi, manlugan kami la basta walay naluganan. Maabot tan mapitek so dalan kanian mairap so manbiahe.

Makpel ya bii si Dorcas. Wala ray teritorya mi ya dakel so buwaya. Aminsan, kaukolan mi manbiahe na limay agew ta aderal imay taytay diad sakey ya ilog kanian apilitan kamin manbaloto. Nen kuan lan onepas nen Dorcas ed baloto, agto abalanse so laman to kanian naplag ed danum. Aralem pa met ni may kulaan mi! Say problema balet, agto amtay onlangoy tan agko met nailigtas ta agko met amta so onlangoy, tan dakel so buwaya ed saman ya ilog! Maong labat ta wala ray kaiba min kabataan ya lalaki. Sikaray tinmaboy ed ilog pian iligtas si Dorcas. A-trauma kamid saman, kanian no maminsan et nakugip mi ni. Pero agmin balot ninonot so ontunda ed panlilingkor mi diad sirkito.

Nen 1992, abigla kami ta malukon manayay Dorcas! Siempre, agmi naiwasan ya isipen ya ompan makatunda kami la ya manlingkor bilang full time. Pero a-realize mi, “Regalo iya nen Jehova!” Kanian say inngaran mi ed baby mi et Jahgift. Kayari apat taon, atumbokan si Jahgift. Say yugtan to et nginaranan mi na Eric. Talagan regalo ira nen Jehova ed sikami. Asali nen Jahgift so nan-volunteer ed remote translation office diad Conakry, tan si Eric balet et ministeryal ya lingkor.

Anggano sinmabi panaon ya aliwa lan espisyal payunir si Dorcas, regular payunir nin siansia legan ton aasikasoen iray anak mi. Pero diad tulong nen Jehova, nantultuloy ak bilang espisyal payunir. Nen baleg la ray ugugaw, nanlingkor lamet ya espisyal payunir si Dorcas. Manlilingkor kami la natan bilang missionary ed Conakry.

AGKINMUPAS SO TIWALA MI ED SI JEHOVA

No iner ak iyakar nen Jehova, diman ak. Aliklikna min sanasawa so proteksion tan bendisyon to. Lapud nantiwala kamid sikato, agkami masyadon mapaga, aliwan singa saray totoo ya mantitiwala ed materyal iran bengatla. Apatunayan min mismo nen Dorcas ya si Jehova so “Dios na kilalaban.” (1 Awa. 16:35) Segurado ak ya “protektaan nen Jehova a Dios” so amin ya mantitiwala ed sikato.​—1 Sam. 25:29.