Itultuloy Mon Iwasan tan Labanan so Tukso

1-2. (a) Antoy impasakbay nen Jesus ed saray disipulo to? (b) Akin et ag-alabanan na saray disipulo to so takot ed too? (Nengnengen met so litrato.)

“MAGUNAET so espiritu, balet maletey so laman.”a (Mat. 26:41b) Akin et imbaga itan nen Jesus? Imbaga to itan ta labay ton ipaseguro ya natatalosan to tayo. Amta to ya walan-walay panaon ya makagawa tayoy aliwa lapud agtayo perpekto. Pero imbaga to met itan pian pasakbayan iray disipulo to tan ag-ira mankampante. Pigaran oras antis ya imbaga nen Jesus irayan salita, imbaga na saray disipulo to ya agdan balot taynanan. (Mat. 26:35) Tua, labay dan gawaen no antoy duga. Pero amta nen Jesus ya no ag-ira manalwar, matmainomay iran nadaeg na tukso. Kanian oniay imbaga tod sikara: “Mantultuloy kayon manbantay tan agkayo ontutundan manpikasi, pian agkayo napelag ed tukso.”​—Mat. 26:41a.

² Makapaermen balet ta agnantultuloy ya nambantay iray disipulo. Nen arestoen lay Jesus, kasin atoor da imay imbaga da ya agdan balot taynanan? Andi! Batik ira! Lapud agda nilabanan so takot ed too, amay imbaga dan agdan balot gawaen, aman laingen so ginawa ra.—Mat. 26:56.

3. (a) Akin et agtayo dapat mankakampante? (b) Antoy pantongtongan tayo ed sayan artikulo?

³ Inar-aro tayoy Jehova, kanian agtayo labay so manggaway antokaman ya mamaermen ed sikato. Pero siempre, agtayo perpekto kanian agtayo iisipen ya agti lan balot natukso ya manggaway aliwa. Agtayo sirin mankakampante. (Roma 5:12; 7:​21-23) No agtayo manalwar, ompan wala ray situasyon ya nalagyat tayon manggaway aliwa anggano amta tayon kabkabusol itan nen Jehova. Unoren tayo sirin imay imbaga nen Jesus ya mantultuloy tayon manbantay pian agtayo napelag ed tukso. No unoren tayo itan ya bilin, makapanmatoor tayo ed si Jehova tan Jesus. Pantongtongan tayo sirin ed sayan artikulo no panon tayon nagawaan imay bilin nen Jesus. Unona, pantongtongan tayo no akin ya kaukolan tayon amtaen iray kakapuyan tayo. Insan aralen tayo no anto ray gawaen tayo pian naiwasan tan nalabanan tayoy tukso. Insan tayo pantongtongan no panon tayon tuloytuloy ya nalabanan iray kakapuyan tayo.

AMTAEN NO ANTO RAY KAKAPUYAN MO

4-5. Anggano aliwan masyadon seryoso so sakey ya kasalanan, akin et delikado no agtayo itan paliisan?

⁴ Wala ray kasalanan ya agmasyadon seryoso komparad arum ya kasalanan. Pero no agtayo iratan paliisan, onkapuy so espiritualidad tayo tan makaarawi tayod si Jehova. Tan ompan atan so magmaliw ya rason ya makagawa tayo laingey mas seryoson kasalanan.

⁵ Amin tayo et makasalanan. Pero, nanduruma so kakapuyan na kada sakey ed sikatayo. Singa bilang, ompan say sakey et lalabanan toy pilalek ton manggaway imoral. Ompan say kakapuyan na arum et masturbasyon, inengneng ed pornograpiya, tan arum nin marutak ya kagagawa. Tan ompan wala met iray agagi ya say kakapuyan da et mainomay iran onsanok, ma-pride ira, o sankanonot dan lanang no antoy ibaga na arum. Duga sirin may imbaga nen Santiago ya “kada sakey [et] nasagyat tan natangguyor na dilin pilalek to.”​—Sant. 1:14.

6. Antoy kaukolan tayon birbiren?

⁶ Sika ey, kasin antam no anto ray kakapuyan mo? Maabig no aminen mod sarilim ya kakapuyan mo iratan. Agtayo dapat manbubulag-bulagan ed saray kakapuyan tayo. Tan agtayo iisipen ya agtayon balot makagaway kasalanan ta mabiskeg tayo met ed espiritual. Ta no ontan, singa tayo lolokoen so sarili tayo. (1 Juan 1:8) Diad tua, imbaga nen apostol Pablo ya anggan saramay “walaan na espiritual iran kualipikasyon” et nayarin natukso met no ag-ira manalwar. (Gal. 6:1) On, pian napaliisan tayoy tukso, importante ya birbiren tayo ya wala ran talagay kakapuyan tayo.​—2 Cor. 13:5.

7. No antam la ray kakapuyan mo, antoy gawaen mo pian napabiskeg moy depensam? Mangiter na ilustrasyon.

⁷ No antam la ray kakapuyan mo, antoy gawaen mo? Pabiskeg moy depensam. Antoy labay ton ibaga ’tan? Pian mas natalosan tayo, niay sakey ya ilustrasyon: Diad panaon na Biblia, say parte na syudad ya matmainomay ya lusoben na saray kalaban et saray puerta. Atan so rason no akin ya mas dakel ya guardia so akapuesto ed saray puerta na syudad. Ontan met so gawaen tayo ed saray kakapuyan tayo. Lapud ditan tayo mas mainomay ya natukso, ditan tayo met mas guardiaan so sarili tayo.​—1 Cor. 9:27.

IWASAN TAN LABANAN MOY TUKSO

8-9. Anto komoy ginawa na samay kalangweran ya laki ya abitlad Proverbio kapitulo 7 pian naiwasan toy mankasalanan? (Proverbio 7:​8, 9, 13, 14, 21)

⁸ Panon tayon naguardiaan so sarili tayo ed saray tukso? Makaaral tayod samay agawa ed kalangweran ya laki ya abitlad Proverbio kapitulo 7. Base ed bersikulo 22, sayan laki et basta to labat tinumbok so sakey ya imoral ya bii ya anggad akagawa ray seksual ya imoralidad. Singa mapmaples labat itan ya agawa, tan singa agto met ginagalay manggaway imoral. Pero no nengnengen tayo ray akaunan bersikulo, wala ray makapuy ya desisyon na sayan laki kanian akagawa laingey kasalanan.

⁹ Anto iratan? Unona, nen mansirunget la, “sikatoy dinmalan ed karsadan asingger ed abung na [samay imoral ya bii].” Tan sikatoy nanakar a paarap ditan. (Basaen so Proverbio 7:​8, 9.) Insan nen anengneng to may bii, mapatpatnag ya agto pinaliisan, ta pinmayag ya sikatoy angoban na samay bii. Madengedengel met nen imbaga na samay bii ya sikatoy mangiyapay na saray bagat ya pandurungoan. Seguro, labay ya papawayen na sayan bii ya sikatoy maka-Dios. (Basaen so Proverbio 7:​13, 14, 21.) Diad tua, amta to pa may laki ya aliwa lay aarapen to. No diad gapo ni labat komon et pinmaliis la, aga komon atukso tan ag-akagaway kasalanan.

10. Panon ya nagawa ed sakey ya Kristiano natan imay agawad kalangweran ya laki?

¹⁰ Amay agawad samay laki et nayarin nagawa met ed anggan siopan lingkor nen Jehova natan. No say sakey et akagawa na seryoson kasalanan, ompan isipen to ya mapmaples labat itan ya agawa. Tan ompan irason to ya agto itan ginagala. Pero diad tua, no pawilen to may agawa, nanengneng to ya wala ra manayay makapuy ya desisyon to kanian akagawa laingey kasalanan. Singa bilang, ompan mauges iray kaulop to, bastos tan imoral iray pipilien ton libangan, oonlad saray kuestionablin website, tan ayaman to ray lugar ya agmanepeg ed saray Kristiano. Ompan agmet la manpipikasi, agla manbabasay Biblia, agla mimiaral, tan agmet la manpupulong. Kanian singa samay kalangweran ya laki ya abitlad Proverbio, aliwan biglaan labat imay impankasalanan to.

11. Antoy nepeg tayon gawaen pian naiwasan tayoy mankasalanan?

¹¹ Antoy naaralan tayod saya ey? Agtayo labat iiwasan may mismon kasalanan, noagta iwasan tayo met iray makapuy ya desisyon ya mangitonton ed kasalanan. Kayarin insalaysay nen Solomon so agawad samay kalangweran ya laki tan imoral ya bii, oniay bilin to: “Agka onliliko paonlad saray basbas [na sayan bii.]” (Pro. 7:25) Singa ibabaga nen Solomon ya nepeg tayon iwasan iray situasyon ya mangiyasingger ed sikatayo diad tukso. Onia ingey imbaga to: “Sikatoy arawian mo; agka onaasingger ed lolooban na abung to.” (Pro. 5:​3, 8) On, naiwasan tayoy mankasalanan no gawaen tayoy anggaay nayarian tayo ya arawian iray situasyon ya natukso tayon manggaway aliwa.b Diad tua, ompan kaukolan tayo met ya iwasan iray situasyon o kagagawa ya agmet mauges parad saray Kristiano pero amta tayo ya nayarin atan laingen so mantukso ed sikatayon manggaway aliwa.​—Mat. 5:​29, 30.

12. Base ed Job 31:​1, antoy desisyon nen Job, tan panon itan ya akatulong pian naiwasan toy mankasalanan?

¹² Pian napaliisan tayoy mankasalanan, importante ya antis nin onsabi so tukso et desidido tayo lan agmanggaway aliwa. Ontan so ginawa nen Job. “Akisipanan” si Job ed mata to ya agan balot onlinggis ed arum a bii. (Basaen so Job 31:1.) Akatulong itan ya desisyon to pian aga natukson manggaway imoral. Aligen tayoy Job, aliwan amay kasalanan labat so busolen tayo, dapat desidido tayo met ya iwasan so antokaman ya mantukso ed sikatayon manggaway kasalanan.

13. Akin et manalwar tayo ed saray iloloob tayod isip tayo? (Nengnengen met so litrato.)

¹³ Kaukolan tayo met so manalwar ed no anto ray iloloob tayod isip tayo. (Exo. 20:17) Ibabaga na arum ya ayos labat so manisip o man-imadyin na imoral. Anggapo kunoy uges to ’tan, basta agmo aktual ya gagawaen. Pero, aliwan tua ’tan. No say sakey et lanang ya maniisip na imoral, iyaasingger toy sarili to ed tukso, kanian ag-arawi ya makagaway kasalanan. Pero no maminsan, anggano agtayo labay, wala ray onsebang ed isip tayo ya aliwa. No walay naisip mon mauges, ekal mon tampol tan mannonot kay maong. No ontan so gawaen tayo, agtayo natukso ya manggaway seryoson kasalanan ta agtayo la pinatubo ed puso tayo so mauges ya pilalek.​—Fil. 4:8; Col. 3:2; Sant. 1:​13-15.

14. Anto ni makatulong pian naiwasan tan nalabanan tayoy tukso?

¹⁴ Anto ni makatulong pian naiwasan tan nalabanan tayoy tukso? Lanang tayon isipen ya parad pankaabigan tayo lanlamang iray ganggan nen Jehova. No maminsan, wala ray labay tayon gawaen ya duma o kontra ed panlabayan nen Jehova. Pero tandaan tayo ya no gawaen tayoy anggaay nayarian tayo ya unoren si Jehova, mareen so nonot tayo tan magmaliw tayon maliket.

15. Akin et mas mainomay tayon iwasan tan labanan so tukso no inaro tayoy kamaongan?

¹⁵ Pian naiwasan tan nalabanan tayoy tukso, agtayo labat bubusolen so kaugsan. Importante met ya aroen tayoy kamaongan tan desidido tayo dapat ya gawaen no antoy duga. (Amos 5:15) No inaro tayoy kamaongan, agtayo manggaway aliwa anggano bigla labat ya onsabi so situasyon ya wala lad arapan tayoy tukso.

16. Anto ray gawaen tayo pian ombiskeg so panangaro tayod si Jehova, tan panon ya makatulong iratan pian mas nalabanan tayoy tukso? (Nengnengen met so litrato.)

¹⁶ Antoy gawaen tayo pian naaro tayoy kamaongan? Tuloytuloy tayon pabiskegen so panangaro tayod si Jehova. Singa bilang, agtayo papaulyanay pipiaral tan panagpulong tayo. No wala tayod aral tan diad ministeryo, say sankanonot tayo et no panon tayon napaliket si Jehova. Baleg so nitulong to ’tan pian mas desidido tayon labanan so tukso. (Mat. 28:​19, 20; Heb. 10:​24, 25) Importante met ya walay eskedyul tayon manbasa tan manaral na Biblia, tan seguradoen tayo ya dadalepdepen tayo iray nababasa tayo. No ontan so apasalan tayon gawaen, naar-aro tayoy kamaongan tan lalo tayon busolen so kaugsan. (Jos. 1:8; Sal. 1:​2, 3; 119:​97, 101) Agtayo met lilingwanan iyan imbaga nen Jesus: “Agkayo ontutundan manpikasi, pian agkayo napelag ed tukso.” (Mat. 26:41) No lanang tayon mitotongtong ed si Jehova, nalikna tayo ya agtayo bukbukor ta wadtan so Ama tayo ya ontulong ed sikatayon milaban ed tukso, tan mas desidido tayon agmanggawa na antokaman ya mamaermen ed sikato.​—Sant. 4:8.

TULOYTULOY MON LABANAN IRAY KAKAPUYAN MO

17. Antoy kakapuyan nen Pedro, tan antoy patunay ya agto nin talaga nakal itan anggano linmabas lay dakel ya taon?

¹⁷ Ompan wala ray kakapuyan tayo ya talagan nitunda o nakal tayo la. Pero ompan wala met iray kakapuyan tayo ya tuloytuloy tayo nin lalabanan. Ontan so agawad si apostol Pedro. Kakapuyan nen Pedro so takot ed too. Singa bilang, lapud takot tod too, amitlo ton imburi si Jesus. (Mat. 26:​69-75) Pero nen inmarap ed Sanhedrin, makmakpel ya nansalita tan imbaga to ya agan balot ontunda ya manpulong. (Gawa 5:​27-29) Singa alabanan to lay takot tod too awa? Pero kalabas na dakel a taon, bigla labat ya ag-akirungo ed saray agagi ya aliwan Judio lapud takot tod saray agagin Judio. (Gal. 2:​11, 12) Pinmawil may kakapuyan nen Pedro. Mapatpatnag ya agto nin talaga nakal so takot tod too.

18. Antoy gawaen tayo anggano singa alabanan tayo la so kakapuyan tayo?

¹⁸ Nayarin nagawa met ed sikatayo imay agawad si Pedro. Ompan say amta tayo et nakal tayo lay kakapuyan tayo pero diad tua et andi ni manaya. Oniay inamin na sakey ya brother: “Samploy taon ko lan nitunda so pambantay na pornograpiya, kanian say amtak alabanan ko la yan kakapuyan ko. Pero andi ni manaya, ta wala ni ran siansiay pankanawnawa ya natutukso ak ya manbantay.” Maong labat ta aga sinmuko iyan brother. Amta to ya kaukolan ton labanan ya inagew-agew iyan kakapuyan to, ya anggad onsabi lay balon mundo. Diad tulong na asawa to tan na saray elder, tuloytuloy to itan ya lalabanan tan lalo ton inistriktoan so sarili to pian agnatukson manbantay na pornograpiya.

19. Antoy gawaen tayo no bilang ta walay kakapuyan tayo ya agtayo ni nakal anggad natan?

¹⁹ No bilang ta walay kakapuyan tayo ya agtayo ni nakal anggad natan, antoy gawaen tayo pian tuloytuloy tayon nalabanan itan? Unoren tayo imay imbaga nen Jesus ed saray disipulo to: “Mantultuloy kayon manbantay.” Labay ton ibaga, itultuloy tayoy manalwar. Agka komon mankakampante anggan diad saray panaon ya pakaliknam et sarasarag mon labanan so tukso. (1 Cor. 10:12) Itultuloy mo labat iramay dati lan gagawaen mo ya akatulong ed sikan nalabanan so tukso. Ibabaga na Proverbio 28:14: “Maliket so toon lanang ya akabantay.”​—2 Ped. 3:14.

SARAY BENDISYON NO ITULTULOY TAYON LABANAN SO TUKSO

20-21. (a) Anto ray bendisyon no itultuloy tayon labanan so tukso? (b) No gagawaen tayoy anggaay nayarian tayon labanan so tukso, anto met so seguradon gawaen nen Jehova? (2 Corinto 4:7)

²⁰ Sikatayo lanlamang so minabang no itultuloy tayon labanan so tukso. Tandaan tayo ya no ombigay tayod tukso, temporaryo labat ya liket so iter to ’tan. Pero no labanan tayoy tukso tan unoren tayoy Jehova, tuan liket so nalikna tayo. (Heb. 11:25; Sal. 19:8) Akin ey? On ta talagan ontan so inkadesinyo tayo ran totoo. Pinalsa to tayo nen Jehova pian gawaen so panlabayan to. (Gen. 1:27) No gawaen tayoy panlabayan nen Jehova, malinis so konsiensia tayo tan seguradon ikdan to tayo na bilay ya andi-anggaan.​—1 Tim. 6:12; 2 Tim. 1:3; Jud. 20, 21.

²¹ Tua ya “maletey so laman,” pero walan-walay nagawaan tayo pian nalabanan tayoy tukso. Wadtan si Jehova ya ontulong. Ikdan to tayoy biskeg o pakayari ya kaukolan tayo. (Basaen so 2 Corinto 4:7.) Pero tandaan tayo ya say iiter nen Jehova et say pakayari ya mas mabiskeg nen say pakayari na too. Labay ton ibaga, iilaloan to ya usaren tayo met so mismon pakayari tayo pian inagew-agew tayon nalabanan so tukso. No nanenengneng to ya gagawaen moy anggaay nayarian mo, seguradon ebatan toy pikakasim no onkerew kay kaaruman ya biskeg. (1 Cor. 10:13) On, diad tulong nen Jehova, sarasarag tayon iwasan tan labanan so tukso!