Saray Naaralan Tayo ed Propesiya nen Jacob nen Asingger Lan Ompatey—Part 2

1. Antoy pantongtongan tayo ed sayan artikulo?

MADENGEDENGEL iray ananak nen Jacob legan ton bibilinen so kada sakey ed sikara. Singa apantongtongan tayod imbeneg ya artikulo, seguro abigbigla ran amin tan ompan agni ra ingen makapanisia ed saramay imbaga nen ama ra nen katongtong toy Ruben, Simeon, Levi, tan Juda. Kanian seguradon tatalaranan da la no antoy ibaga tod walora nin ananak to. Nengnengen tayo sirin no antoy imbaga tod si Zebulon, Isacar, Dan, Gad, Aser, Neftali, Jose, tan Benjamin. Tan amtaen tayo met no antoy naaralan tayo ed saratan ya imbaga to.a

ZEBULON

2. Antoy impropesiya nen Jacob nipaakar ed si Zebulon, tan panon itan ya asumpal? (Genesis 49:13) (Nengnengen met so kahon.)

² Basaen so Genesis 49:13. Impropesiya nen Jacob ya say panayaman na tribu nen Zebulon et diad asingger ed dayat. Asumpal itan ya propesiya kalabas na masulok ya 200 ya taon nen naawat na tribu nen Zebulon so apag dan dalin ya walad nampegleyan na Dayat na Galilea tan Dayat a Mediteraneo. Aliwa met ya diad mismon gilig na dayat so teritorya na tribu nen Zebulon, pero asingger ni ran siansia ed dayat. Lapud wala rad nampegleyan na duaran dayat, maganggano ray mannegosyo. Wala sirin so rason dan manliket. Nayarin atan so rason no akin ya oniay imbaga nen Moises: “Manliket ka, O Zebulon, diad ipaway mo.”—Deu. 33:18.

3. Antoy makatulong pian magmaliw tayon kontento?

³ Antoy naaralan tayo? Inerman so panaayaman tayo o antokaman so situasyon tayo, walan-walay rason tayon manliket. Antoy sekreto pian mansiansia tayon maliket? Mankontento tayo ed no antoy wala. (Sal. 16:6; 24:5) No maminsan, say sankanonot tayo et iramay anggapod sikatayo, kanian agtayo la laingen naiimano iray bendisyon ya iiter nen Jehova. Gawaen tayo sirin so anggaay nayarian tayo ya manpokus ed saray positibo tan mararakep ya nagagawad bilay tayo.—Gal. 6:4.

ISACAR

4. Antoy impropesiya nen Jacob nipaakar ed si Isacar, tan panon itan ya tinmua? (Genesis 49:​14, 15) (Nengnengen met so kahon.)

⁴ Basaen so Genesis 49:​14, 15. Kinomendaan nen Jacob si Isacar ta makulikuli, tan inkompara to ed sakey ya asno. Mabisbiskeg so pukel na sayan ayep, kanian anggano ambelbelat so itapew ed beneg to, sarasarag ton awiten. Imbaga met nen Jacob ya marakep ya dalin so panayaman nen Isacar. Tinmua itan ya imbaga nen Jacob ta say tawir na tribu nen Isacar et diad abay na Ilog Jordan, kanian mabunay dalin da. (Jos. 19:22) Lapud makulikuli ra, seguradon inasikaso dan maong itan ya dalin. Pero aglabat ira nankuli parad sarili da. Akaparaan met iran manserbi ed arum. (1 Ara. 4:​7, 17) No walay kalaban ya onlusob ed bansan Israel, aliston milaban so tribu nen Isacar. Singa bilang, nen kinmerew na tulong si Ukom Barak tan si propetesa Debora diad pilaban ed si Sisera, mabulbulos ya akilaban so tribu nen Isacar.—Ukom 5:15.

5. Panon tayon naalig so alimbawa na tribu nen Isacar, tan akin et marakep no aligen tayoy alimbawa ra?

⁵ Antoy naaralan tayo? Iimanoen tan papablien nen Jehova so kuli tayo ed panaglingkor, ya singa impangimano to ed inkakuli na tribu nen Isacar. (Ecl. 2:24) Isipen pa iray brother ya makulikulin mangaasikaso ed kongregasyon. (1 Tim. 3:1) Tua, ag-ira milalaban ed literal ya guerra, pero gagawaen day anggaay nayarian da pian naprotektaan so espiritualidad na saray agagi. (1 Cor. 5:​1, 5; Jud. 17-23) Ipaparaan da met ya maong iray paliwawa da, tan seseguroen da ya makapaseseg so pangipresenta da ed satan.—1 Tim. 5:17.

DAN

6. Antoy responsabilidad na tribu nen Dan? (Genesis 49:​17, 18) (Nengnengen met so kahon.)

⁶ Basaen so Genesis 49:​17, 18. Inkompara nen Jacob si Dan ed sakey ya uleg ya sarasarag ton atakien tan taloen so ayep ya mas baleg nen say sikato, singa say kabayo tan anggan samay akakabayo. Makmakpel so tribu nen Dan tan anggapoy aatrasan da. No walay onatakin kalaban, akaparaan iran mangiyagel ed bansan Israel. Nen manbiabiahe ira paonlad Insipan a Dalin, say tribu nen Dan so walad sampot ta “sikara so bantay ed benegan.” (Num. 10:25) Akapuesto ira ditan pian protektaan so amin ya Israelita. Anggano ag-ira nanenengneng na arum ya Israelita, sineryoso day asainmin da ta amta dan importante itan.

7. Antokaman so kimey o asainmin ya gagawaen tayo parad si Jehova, antoy nepeg tayon tandaan?

⁷ Antoy naaralan tayo? Asalim lay awalaan na asainmin o responsabilidad ya nansagpotan mon maong pero anggapoy akaimano ed sika? Singa bilang, ompan tinmulong ka ed panaglinis tan panagmintina na Kingdom Hall, namboluntaryo ka ed asemblea o kombension, odino ed arum nin kimey ed organisasyon. Nakomendaan kad inkakulim! Tandaan mo ya anggano agka naiimano na arum, nanenengneng tan papablien nen Jehova so amin ya gagawaen mo parad sikato. Tan diad tua, makakaliket ya maong si Jehova no gagawaen mo iratan lapud panangarom ed sikato, aliwan lapud labay moy nairayew.—Mat. 6:​1-4.

GAD

8. Akin et matmainomay ya atakien so tribu nen Gad? (Genesis 49:19) (Nengnengen met so kahon.)

⁸ Basaen so Genesis 49:19. Impropesiya nen Jacob ya si Gad et atakien na grupo na saray tulisan. Agawa itan kalabas na masulok ya 200 ya taon nen nanayam so tribu nen Gad diad bandad bukig na Ilog Jordan. Wala itan ed ketegan kanian asingsingger labat ed saray kalaban dan bansa, katon matmainomay da ran atakien. Pero ditan so talagan labay ya panayaman na tribu nen Gad, ta anengneng dan marakep itan ya pasen parad saray ayayep da. (Num. 32:​1, 5) Mapatpatnag sirin ya anggapoy tatakotan da. Akin kasi et makmakpel ira? On ta baleg so tiwala ra ya tulongan ira nen Jehova ya milaban no bilang ta wala ray tulisan ya onlusob ed dalin ya inter tod sikara. Diad tua, imbaki ni ingen na tribu nen Dan iray sundalo da pian tulongan ya milaban so arum ya tribu, ya anggad nasakop da la so interon Insipan ya Dalin diad biek na Ilog Jordan. (Num. 32:​16-19) Matalek ira ya anggano pigaran taon ya makaarawi irayan lalaki, protektaan nen Jehova iray kaasawaan tan ananak da. Benendisyonan ira nen Jehova ta makmakpel tan masakripisyo ira.—Jos. 22:​1-4.

9. No walay tiwala tayod si Jehova, antoy epekto to ’tan ed saray desisyon tayo?

⁹ Antoy naaralan tayo? No walay tiwala tayod si Jehova, tuloytuloy tayon nagawaan so panlabayan to anggano wala ray subok o problema. (Sal. 37:3) Dakel ya agagi tayo natan so manboboluntaryo ed saray construction project na organisasyon tayo. Say arum et ontutulong ed lugar ya daiset labat so Tasi, tan say arum et wala ray kaaruman ya responsabilidad da. Seguradon wala ray insakripisyo na sarayan agagi, pero baleg so tiwala ra ya ag-iran balot paulyanan nen Jehova.—Sal. 23:1.

ASER

10. Panon ya asumpal so propesiya nen Jacob nipaakar ed tribu nen Aser, pero antoy agda agawaan? (Genesis 49:20) (Nengnengen met so kahon.)

¹⁰ Basaen so Genesis 49:20. Impropesiya nen Jacob ya magmaliw ya mainawa so bilay na tribu nen Aser. Tan talagan ontan so agawa! Say arum ed saray sankabunaan ya dalin ed Israel et walad teritorya na tribu nen Aser. (Deu. 33:24) Say apag dan dalin et walad gilig na Dayat a Mediteraneo, tan wadtan so daongan na Sidon ya sentro na komersyo, kanian maasenso iray totoo ditan. Pero say lingo na tribu nen Aser, agda pinaekal iray Canaanita. (Ukom 1:​31, 32) Seguradon naimpluensyaan na saray Canaanita so tribu nen Aser tan nayarin puros materyal lay sankanonot da, kanian naapektoan laingen so seseg dad panagdayew. Singa bilang, nen manaanap si Ukom Barak na saray nakaiba ton milaban ed saray sundalo na Canaan, aga tinmulong so tribu nen Aser. Kanian agda laingen anengneng so makapabilib ya ginawa nen Jehova pian manalo so bansan Israel. (Ukom 5:​19-21) Seguro nababaingan ya maong so tribu nen Aser tan anggapoy lupa ya iyarap da nen arengel day kansion nen Barak tan Debora, ya say kuan da: “Say Aser et yinmurong a nanmeneng ed gilig na dayat.”—Ukom 5:17.

11. Akin et importante ya balanse so pakanengneng tayod kuarta?

¹¹ Antoy naaralan tayo? Labay tayon iter ed si Jehova so sankaabigan tayo. Pian nagawaan tayo itan, dapat balanse so pakanengneng tayod kuarta. (Ecl. 7:12; Heb. 13:5) Agtayo sirin manpapaimpluensya ed saray totoo ed mundo ya say sankanonot da et puros kuarta. Iisipen da ya no dakel so kuarta da, mainaway bilay da tan nasaliw da no antoy labay da. (Pro. 18:11) No ontan met so kanonotan tayo, naupot so panaon tan biskeg tayo ed pananap na materyal, tan kera-kera labat lay niiter tayod si Jehova. Aleg komon ya ontan. Mamasya tayo ed panaglingkor tayod si Jehova, ta amta tayo ya say tua tan mainawan bilay et dia nid balon mundo.—Sal. 4:8.

NEFTALI

12. Antoy nayarin tutukoyen nen Jacob nen imbaga ton si Neftali et ‘mangibalikas na mararakep a salita’? (Genesis 49:21) (Nengnengen met so kahon.)

¹² Basaen so Genesis 49:21. Imbaga nen Jacob ya ‘mangibalikas si Neftali na mararakep a salita.’ Nayarin ontutukoy itan ed paraan na panagsalita tan marundunong ya panagbangat nen Jesus legan na ministeryo to diad dalin. Ayaman nen Jesus ed syudad na Capernaum ya walad teritorya na tribu nen Neftali, kanian ibabaga na Biblia ya “syudad to” itan. (Mat. 4:13; 9:1; Juan 7:46) Impropesiya met nen Isaias ya say tribu nen Zebulon tan Neftali et makanengneng na “baleg a liwawa,” ya ontutukoy ed si Jesus. (Isa. 9:​1, 2) Si Jesus so ‘tuan liwawa ya sinminag ed amin a klase na too’ lapud saray imbangat to.—Juan 1:9.

13. Antoy gawaen tayo pian naseguro tayon makapaliket ed si Jehova so panagsalita tayo?

¹³ Antoy naaralan tayo? Iimanoen nen Jehova iray ibabaga tayo tan say paraan na panagsalita tayo. Seguradon naliliketan no “mararakep a salita” so ompapaway ed sangi tayo. Anto sirin so gawaen tayo pian naseguro tayon makapaliket ed si Jehova so panagsalita tayo? Agtayo mantitila. Lanang tayon ibagay tua. (Sal. 15:​1, 2) No walay maabig ya agawaan na arum, komendaan tayo ra pian napaseseg ira. Iwasan tayoy magmaliw ya makritiko tan mareklamo. (Efe. 4:29) Tan marakep met no aralen tayoy mitongtong ed arum ya too pian mas mainomay tayoy mangigapo na tongtongan ya anggad napulongan tayo la ra.

JOSE

14. Panon ya tinmua so propesiya nen Jacob nipaakar ed si Jose? (Genesis 49:​22, 26) (Nengnengen met so kahon.)

¹⁴ Basaen so Genesis 49:​22, 26. Pap-proud si Jacob ed si Jose, ta diad amin ya ananak to, si Jose so “pinili” tan inusar nen Jehova pian nasumpal so gagala To. Tinawag nen Jacob si Jose ya “simit na sakey a mabungan kiew.” Si Jacob may kiew, tan si Jose et singa sakey ed saray sanga ya sinmimit ed satan ya kiew. Si Jose so panguloan ya anak nen Jacob ed inar-aro ton asawa ya si Raquel. Impropesiya nen Jacob ya si Jose so makaawat na doblin tawir imbes ya si Ruben, say panguloan ya anak to ed asawa ton si Lea. (Gen. 48:​5, 6; 1 Awa. 5:​1, 2) Tinmua itan ya propesiya nen nagmaliw ya duaran tribu na Israel so duaran ananak nen Jose ya si Efraim tan Manases, tan walay kanya-kanya dan apag ya dalin.—Gen. 49:25; Jos. 14:4.

15. Antoy reaksion nen Jose anggano aliwliway ginawad sikato na agagi to?

¹⁵ Imbaga met nen Jacob ya wala ray ‘managpana ya pinana day Jose ta kabusol da.’ (Gen. 49:23) Say tutukoyen nen Jacob et saray agagi nen Jose. Nainggit ira ed sikato, tan sikara so rason no akin ya abaybayag ya nanirap si Jose. Pero aga nantanem na sakit na linawa ed saray agagi to, tan agmet binmarong ed si Jehova. Oniay imbaga nen Jacob: “Agnagiing so pana [nen Jose], tan nansiansian mabiskeg tan makilas iray lima to.” (Gen. 49:24) Labay ton ibaga, anggano sankabembenan nen Jose so pana to, agto itan inusar pian kenaen iray agagi to. Nantiwala si Jose ed si Jehova. Diad tua, mabulos ton pinerdona iray agagi to tan pinanengnengan to ni ra ingen na kamaongan. (Gen. 47:​11, 12) On, nagmaliw ya mas maong ya too si Jose lapud saray dinadalan to. (Sal. 105:​17-19) Kanian sikatoy inusar nen Jehova diad paraan ya agto inilaloan.

16. Panon mon naalig si Jose no ondadalan kad subok?

¹⁶ Antoy naaralan tayo? No ondadalan tayod subok, agtayo komon idadamay si Aman Jehova tan saray agagi. Tandaan mo ya no maminsan et iyaabuloy nen Jehova so sakey ya subok ta parte itan na pangipapasal tod sika. (Heb. 12:​7, paimanod leksab) Ompan atan so usaren nen Jehova pian nibangat to ka ya aligen iray kualidad to. Singa bilang, ompan lapud subok ya dadalanen mo et naaralan moy mabulos ya mamerdona tan magmaliw ya mas makasi. (Heb. 12:11) Singa si Jose, seguradon bendisyonan ka met nen Jehova no itepel moy irap tan itultuloy mon gawaen so duga.

BENJAMIN

17. Panon ya asumpal may propesiya nen Jacob nipaakar ed si Benjamin? (Genesis 49:27) (Nengnengen met so kahon.)

¹⁷ Basaen so Genesis 49:27. Imbaga nen Jacob ya say tribu nen Benjamin et singa sakey ya lobo ya marundunong ya milaban. (Ukom 20:​15, 16; 1 Awa. 12:2) “Diad kabuasan” o diad gapoy uley na saray arari ed Israel, say sankaunaan ya nan-ari et nanlapud tribu nen Benjamin, si Saul. Masibeg ya sundalo si Saul, tan makmakpel ya akilaban ed saray Filisteo. (1 Sam. 9:​15-17, 21) “Diad labi” o nen anampot lay uley na saray arari ed Israel, si Reyna Ester tan Mardokeo, ya nanlapud tribu nen Benjamin, so angiliktar ed saray Israelita pian agnaupot so lahi ra.—Est. 2:​5-7; 8:3; 10:3.

18. Panon tayon naalig so katooran na saray Benjaminita?

¹⁸ Antoy naaralan tayo? Seguradon pap-proud iray Benjaminita ya say sankaunaan ya ari ed Israel et nanlapud tribu da. Pero anto kasi reaksion da nen say pinili nen Jehova ya onsublay ya ari et si David ya nanlapud tribu nen Juda? Makapaliket ta sinuportaan day David. (2 Sam. 3:​17-19) Kayari na pigaran dekada, say tribu nen Benjamin labat so nanmatoor ed tribu nen Juda tan ed ari ya pinili nen Jehova, anggano nanrebelde so arum ya tribu. (1 Ara. 11:​31, 32; 12:​19, 21) Singa saray Benjaminita, komon ta matoor tayo met ya suportaan iray pinili nen Jehova ya mangidaulo ed saray lingkor to natan.—1 Tes. 5:12.

19. Anto ray gunggona no aralen tayo iray propesiya nen Jacob nen asingger lan ompatey?

¹⁹ On, dakel so gunggona no aralen tayo iray propesiya nen Jacob nen asingger lan ompatey. No aralen tayo nin maong no panon iratan ya tinmua, mas lalo tayon nakombinse ya nagawan-nagawa so arum nin propesiya nen Jehova ya walad Biblia. Tan mas natalosan tayo met no panon tayon naala so pabor nen Jehova.