Antoy Gawaen Ko no Agko Tinumbok so Totontonen ed Abung Mi?

Amin lawarin pamilya et walaan na totontonen nipaakar ed oras na isempet ed abung, pangusar na gadyet, dugan ugali odino ikiwas, tan arum ni.

Panon to no agmo tinumbok so totontonen ed abung yo? Agmo la nauman no antoy agawa, balet walay nagawaan mo pian agla onloor so situasyon. Naamtaan mod sayan artikulo no panon.

• No antoy agmo nepeg ya gawaen

• Mas maabig ya gawaen

• No antoy ibabaga na arum ya kabataan

No antoy agmo nepeg ya gawaen

• No ag-amta na atateng mo ya wala manayay agmo tinumbok ya totontonen ed abung yo, ompan natukso kan agla itan ibaga ed sikara.

• No naamtaan na atateng mo ya agmo tinumbok so sakey a totontonen ed abung yo, ompan manbaraan ka odino tetelen moy arum.

Anggapod saratan so dugan gawaen mo. Akin? On, ta no iyamot moy agawa odino manbaraan ka, ipapanengneng mon immature ka. Tan lapud satan et isipen na atateng mo ya ugaw-ugaw ka ni.

“Aliwan solusyon so pantila. Ompaway lanlamang so tua, tan mas ambelat laingen so disiplina ed sika nen say nen imbagam lan tampol komon so tua.”​—Diana.

Mas maabig ya gawaen

• Aminen no antoy ginawam. Ibabaga na Biblia: “Ag ka onaligwas ed bilay no iyamut mo ray kasalanan mo.” (Proverbio 28:13; Maung a Balita) Amta na atateng mo ya aliwa kan perpekto. Balet labay da ya magmaliw kan matua.

  “Mas kasian ka na atateng mo no ibagam ed sikara so tua. No matua ka, mas pantiwalaan da ka.”​—Olivia.

• Man-sorry. Ibabaga na Biblia: “Mampaabeba kayo.” (1 Pedro 5:5; Maung a Balita) Kaukolan so kapaabebaan pian makapan-sorry imbes ya manbaraan ni.

  “No naynay ya manbabaraan so sakey, onsabi panaon et agto la nalikna so pakakakonsiensia no makagawa na aliwa.”​—Heather.

• Awaten so resulta na ginawam. Ibabaga na Biblia: “Dengel kayo ed disiplina.” (Proverbio 8:33) Agka manrereklamo, tan tumbok mo iray restriksion ya inter na atateng mo ed sika.

  “No manreklamo ka, mas istrikto laingen iray atateng mo ed sika. Awat mo tan tumbok mo ray restriksion, tan agka manpopokus ed saray agmo nagawaan.”​—Jason.

• Gawam so anggaay nayarian mon napapawil so tiwala da. Ibabaga na Biblia: “Lakseben so daan a personalidad a mitunosan ed datin kabibilay yo.” (Efeso 4:22) Itultuloy mon gawaen so duga pian pantiwalaan ka lamet na atateng mo.

  “No itultuloy mon gawaen so duga tan ipanengneng mod atateng mo ya agmo la uliten so aliwan ginawam, ompawil lanlamang so tiwala da ed sika.”​—Karen.

TIP: Manggawa kay paraan pian nipanengneng mon napantiwalaan da ka lamet. Singa bilang, no walay laen mo, ipaamtam ed atateng mo no pasempet ka la​—anggano agka met na-late ya onsempet. No ontan so gawaen mo, singam ibabaga ed sikara, ‘Labay kon nipawil so tiwala yod siak.’