Nalabanan Moy Ermen Mo No Mikaaro Ka—No Panon ya Makatulong so Biblia

Nen 2023 naimano na saray doktor ya nagmaliw ya seryoson problema so ermen diad interon mundo tan kaukolan dan aksionan itan. Balet wala kasi nagawaan tayo pian nalabanan so ermen?

• Imbaga nen Dr. Vivek Murthy, sakey ya surgeon general diad U.S. ya “no maermen tan bukbukor tayo, makapuy so epekto to itan ed laman tayo.” Balet oniay inyarum to: “Walay sarag tayon gawaen.” Anto ’tan ey? “Kada agew, sarag tayoy manggawa na simpli iran paraan pian paeleten so pikakaaro tayo ed arum.”a

Aliwa labat ya saramay bukbukor da so makakaliknay ermen. Wala ray arum ingen ya anggano dakel so kaiba ra, maermen ni ran siansia. Antokaman so rason no akin ya maermen tayo, makatulong so Biblia. Wala rad tay praktikal ya bilin pian napaelet tayo so pikakaaro tayo, diad ontan et nalabanan tayoy ermen.

Nia ray makatulong ya prinsipyo na Biblia

Ipasal moy dugan pitongtong. Agmo labat basta ibabaga so naliliknam noagta dengel ka met ya maong ed ibabaga na katongtong mo. No nalikna to ya sikatoy importante ed sika, lalon onelet so pankakaaro yo.

• Prinsipyo na Biblia: ‘Anapen so pankaabigan na arum, aliwan say pankaabigan yo labat.’​—Filipos 2:4.

Mikaaro kad nanduruman klase na totoo. Balibali no mikaaro ka ed mas matatken o mas ugaw ed sika, tan ed saramay duma so kultura o lahi da.

• Prinsipyo na Biblia: “Ilukas yo met a maong so puso yo.”​—2 Corinto 6:13.

Parad kaaruman ya impormasyon no panon mon paeleten so pikakaarom ed arum, basaen so artikulon “Sinasapatan ang Ating Masidhing Pagnanais na Makipagkaibigan.”