Sarag Kasi na Saray Organisasyon na Totoo ya Gawaen ya Mareen so Mundo?

Agmanunda iray guerra tan panlalaban ed interon mundo kanian wala ray programa ya ginawa na United Nations tan arum nin organisasyon. Wala ra met so ibabaki da pian napakepa iray panlalaban ed saray magulon lugar. Onia so imbaga na UN Secretary-General ya si António Guterres: “Sarayan ibabaki so pinagkabilay na saray programa na United Nations pian pagmaliwen ya mas mareen so mundo.”

Diad inlabas na saray taon, wala ra met so nitulong na sarayan programa. Singa bilang, prinotektaan da ray sibilyan, tinulongan da ray refugee ya makasempet ed saray bansa ra, angiter ira na saray naakan tan arum nin suplay, tan tinmulong met ira pian naapiger iray dineral na guerra. Pero lapud wala ray makakaamper, agda nagawaan imay talagan gagala da. Anton talagay solusyon pian niwala so tuan kareenan ed interon mundo? Naamtaan so ebat ed Biblia.

No akin ya mairap ya niwalay kareenan tan no antoy ibabaga na Biblia ya solusyon

Duaran laki ya nambenegan ya akatalikepkep.

Problema: anggapoy kooperasyon. Naiirapan ya mantulongan iray nanduruman grupo na militar tan arum nin organisasyon ya kaslakan et nanlalapu nid nanduruman bansa. Akin ey? No maminsan, naiirapan iran mankimey ya saniiba ta ag-ira makapantatalosan tan nanduruma so labay dan nagawa.

Solusyon na Biblia: “Say Dios na tawen et mangiletneg na panarian . . . tan panganggaen to irayan amin a panarian [saray gobierno na totoo], tan saya labat so mansiansia ed andi-anggaan.”—Daniel 2:44.

Asingsingger lan patundaen na Dios so amin ya guerra tan gawaen ton mareen so interon mundo. (Salmo 46:8, 9) Amin ya gobierno ed dalin et salatan to na saksakey labat ya gobierno, say Panarian na Dios. Kanian no walay sakey ya perpekton gobierno ed tawen ya manuley ed dalin ya anggapoy manlalaban, agla kaukolan so mangibaki na totoo ya ontulong pian niwalay kareenan.

Problema: limitadoy pakasarag. Kaslakan et kulang so totoo, kuarta, tan arum nin nausar kanian limitado labat so nagagawaan. Sakey ni, agbasta-basta makagalaw iray imbaki na saray organisasyon ya ontulong ta mapeligron maong tan mairap so kipapasen ed lugar ya angibakian ed sikara.

Solusyon na Biblia: “Say Dios na Katawan tayon Jesu-Kristo . . . [et] pinayurong to [si Jesus] ed nikawanan to diad tawen, a mas atagey ni nen say amin a gobierno tan autoridad tan pakayari.”—Efeso 1:17, 20, 21.

Si Jesus so pinili na makapanyarin amin a Dios ya Jehovaa pian magmaliw ya Ari ed Panarian to. (Daniel 7:13, 14 b) Tan inter nen Jehova ed si Jesus so amin ya kaukolan to pian seguradon magmaliw ya maong so pananguley to. Singa bilang, inikdan nen Jehova si Jesus na baleg ya pakayari, kakabatan, karunongan, tan pakatalos. Anggapo iratan ed antokaman ya organisasyon o gobierno na too. (Isaias 11:2) Aliwan satan labat, walaan met si Jesus na armada na saray makapanyarin anghel. (Apocalipsis 19:14) Kanian anggapo tay problema ya agto sarag ya solusyonan.

Pero aglabat basta patundaen nen Jesus so amin ya guerra tan panlalaban. Usaren to met so pakayarin inter na Dios ed sikato pian niwalay tuan kareenan tan seguridad ed amin ya manpapasakop ed Panarian na Dios.—Isaias 32:17, 18.

Problema: wala ray agnagawaan lapud saray batas. No maminsan napipigilan iray imbaki lapud aliwan malinew so instruksion ed sikara odino lapud wala ray batas o legal ya restriksion ed lugar ya angibakian ed sikara kanian agda tanton naprotektaan so arum tan agda nagawaan so talagan gagala da.

Solusyon na Biblia: “Amin a pakauley ed tawen tan diad dalin et niiter lad [si Jesus].”—Mateo 28:18.

Inikdan na Dios si Jesus na malinew iran instruksion, pakayari, tan baleg ya autoridad pian gawaen ton talagan mareen so interon mundo. (Juan 5:22) Seguradon patas tan matunong so pananguley nen Jesus. (Isaias 11:3-5) Kampega lan tinawag si Jesus ed Biblia ya “Prinsipe na Kareenan” ta say pananguley to et walay “inkahustisya tan inkatunong.”—Isaias 9:6, 7.

Say Panarian na Dios so talagan makapangiter na kareenan

Anggan panon et wala met so nagagawaan na saray organisasyon na totoo pian niwalay kareenan tan napatunday panlalaban ed sakey ya bansa. Pero agda nalamot so talagan sengegan na kaugsan—say panagbusol ya walad puso na dakel ya totoo.

“Panon mon pansiansiaey kareenan no anggapoy kareenan ya pansiansiaen.”—Dennis Jett, datin ambassador na U.S.

Duma balet so Panarian na Dios ta tulongan to ray totoo ya naekal so panagbusol ed puso ra. Singa bilang, nen wadiad dalin si Jesus imbangat to ray papatumbok to tan impanengneng ton mismo ed alimbawa to no panon so mikareenan tan aroen so kaparan too:

“Maliket iray mikakareenan.”—Mateo 5:9.

“Arom so kaparam a too a singa ed sikan dili.”—Marcos 12:29-31.

“Ipawil moy espadam ed kaluban to, ta amin iramay mangusar na espada et ompatey ed espada.”—Mateo 26:52.

“Sanen iinsultoen da [si Jesus] agto ra met ininsulto. Sanen papairapen da agto ra pinagyaw.”—1 Pedro 2:23.

Imbaga met nen Jesus ya saray manpapasakop ed Panarian na Dios et nabidbir lapud panangaro da ed kapara dan too. Malinlinew ya ibabaga na Biblia ya agnayarin magmaliw ya sakop na Panarian na Dios iramay kabusol da so kapara dan too:

“Diad saya et naamtaan na amin a sikayo iray disipulok—no manaaroan kayo.”—Juan 13:34, 35.

“Balang sakey a mamubusol ed agi to et sakey a managpatey.”—1 Juan 3:15.

“Siopaman a mangaaro ed Dios et nepeg ya aroen to met so agi to.”—1 Juan 4:20, 21.

Si Jehova a Dios so amalsa ed amin ya totoo kanian amta to no antoy sankaabigan tan alenleneg ya paraan pian niwalay kareenan ed interon mundo. Iter na Panarian to so agsarag ya niiter na antokaman ya organisasyon na totoo, kaiba lad tan so tuan kareenan ed interon mundo.

a Jehova so ngaran na Dios. (Salmo 83:18) Nengnengen so artikulo ya “Siopa si Jehova?”

b Say terminon “anak na too” ya abitlad Daniel 7:13, 14 et ontutukoy ed si Jesu-Kristo.—Mateo 25:31; 26:63, 64.

Natan ni labat et ontutulong lay Panarian na Dios pian niwalay kareenan tan pankakasakey

Diad arapen no manuley la so Panarian na Dios diad interon dalin, wala lay pankakasakey na amin ya totoo lapud uunoren da so ganggan tan bangat na Dios. (Isaias 2:4; 11:9) Balet manuuley la natan diad tawen so Panarian na Dios tan natan ni labat et ibabangat tan tutulongan la na satan iray minilyon ya totoo ya manbilay ya mareen tan nankakasakey.

Bantayan so video ya Taloen na Panangaro so Panagbusol tan imanoen no panon ya atulongan na Biblia so duaran lalaki anggano abaybayag lan manbubusolan iray Judio tan Arabo.

Bantayan so video ya Datin Mankalaban, Sankaaro La Natan tan imanoen no panon ya atulongan na Biblia so sakey ya marukruksan kriminal tan sakey ya masibeg ya pulis pian naekal ed puso ra so pambusol da ed sakey tan sakey tan magmaliw iran maapit ya sankaaro.