Kasin Bubuyaken na Saray Tasi nen Jehova so Pamilya odino Pankakasakeyen Da?

Pansasagpotan mi ran Tasi nen Jehova ya pankasakeyen tan paeleten so ulopan na saray pamilya mi tan na arum. Rerespetoen mi so Dios ya nanlapuan na saray pamilya. (Genesis 2:​21-​24; Efeso 3:​14, 15) Nabasa ed Biblia iray ibabangat ton prinsipyo ya akatulong ed saray totoo pian onelet tan magmaliw ya maliket so pamilya da.

No Panon ya Papaeleten na Saray Tasi nen Jehova so Ulopan na Pamilya

Gagawaen mi anggaay nayarian mi ya tumboken so bilin na Biblia, ta ontutulong iya pian magmaliw kamin maong ya asawa tan ateng. (Proverbio 31:10-31; Efeso 5:22–6:4; 1 Timoteo 5:8) Say marundunong ya bilin na Biblia et makakatulong met ed saray pamilyan nandurumay relihyon da. (1 Pedro 3:1, 2) Nia ray imbaga na saray aliwan Tasi ya say asawa da et nagmaliw ya Tasi nen Jehova:

• “Amay unonan anem taon mi, kolkol kami lan kolkol. Pero nen nagmaliw ya Tasi nen Jehova si Ivete, mas maaro tan mapasensya la. Lapud anguman, ag-abuyak so pamilya mi.”—Clauir, taga Brazil.

• “Agak pinmayag ya paiyaralan na Biblia ed Saray Tasi nen Jehova si asawak ya si Chansa, ta abaloan ko et bubuyaken day pamilya. Pero anengneng ko ya makatulong manaya so Biblia ed saray sanasawa.”—Agness, taga Zambia.

Ibabaga mid saray totoo ya makatulong ed sikara so marunong ya bilin na Biblia

• Diad pampili na asawaen o piasawaan

• Diad pan-adjust ed unonan taon na impankasal

• Diad pantrato ed saray katulangan

• Diad pambadyet na kuarta

• No panon ya napaliisan so pankolkol

• No panon so mamerdona

• No panon ya ipasal iray anak

Kasin panlapuay kolkolan no salatan na asawan laki o bii so relihyon to?

On, no maminsan. Singa bilang, diad research na kompanya ya Sofres nen 1998, inreport da ya 1 ed kada 20 ya sanasawa so aprobleman maong nen nansalat na relihyon so sakey ed sikara tan nagmaliw ya Tasi.

Imbaga nen Jesus ya saray manguunor ed bangat to et nayarin busolen na kapamilya to. (Mateo 10:32-36) Insulat na historian ya si Will Durant ya nen manuuley so Empiryo na Roma, “naakusaan iray Kristiano ya bubuyaken da ray pamilya,” a tan ontan met so akusasyon ed Saray Tasi nen Jehova natan. Talaga kasin Saray Tasi nen Jehova so panlalapuay agpantatalosan?

Nen nandesisyon so European Court of Human Rights ed akusasyon ya bubuyaken na Saray Tasi nen Jehova so pamilya, imbaga da ya say aliwan Tasin kapamilya so mabetbet ya panlalapuan na agpantatalosan ta ag-ira ompayag ya “awaten tan respetoen so karapatan na kapamilya da ya manpili na relihyon tan mandayew.” Imbaga ni na Korte: “Oniay nagagawa ed saray pamilya ya nandurumay relihyon da tan kaibad satan iray Tasi nen Jehova.” b Anggano wala ra yan naeeksperiensya na Saray Tasi nen Jehova, siansia nin uunoren da so bilin na Biblia ya: “Agyo babalesen na mauges so siopaman a nanggaway mauges ed sikayo. . . . No posible, diad anggaay nayarian yo, mikareenan kayod amin a totoo.”—Roma 12:17, 18.

No akin ya manisia iray Tasi nen Jehova ya mangasawa o miasawa ira labat ed kapara dan Tasi

Uunoren na Saray Tasi so ganggan na Biblia ya mangasawa o miasawa “dia labat ed Katawan,” labay ton ibaga, diad karelihyon da. (1  Corinto 7:39) Sayan ganggan et nanlapud Biblia tan praktikal. Singa bilang, diad sakey ya artikulo na Journal of Marriage and Family nen 2010, imbaga to ya “saray sanasawan parehoy relihyon tan papanisiaan” et mas marakep so ulopan da.c

Pero agmet igaganggan na Saray Tasi ya isian na saray kamembro da iray aliwan Tasin asawa da. Ibabaga na Biblia: “No say agin laki et agmananisia so asawa to tan onaabobon a miamong ed sikato, agto tataynanan; tan no say sakey a bii et agmananisia so asawa to tan onaabobon a miamong ed sikato, agto tataynanan so asawa to.” (1 Corinto 7:12, 13) Uunoren na Saray Tasi nen Jehova iyan ganggan.