Filipos 4:13—“Nayarian Kon Gawaey Amin a Bengatla, Lapud Kristo”

“Walay biskeg kon arapen so amin a bengatla lapud samay mangiiter ed siak na pakayari.”—Filipos 4:13, Balon Mundo a Patalos.

“Nayarian kon gawaey amin a bengatla, lapud Cristo a mamapabiskeg ed siak.”—Filipos 4:13, Maung a Balita.

Say Labay ya Ibaga na Filipos 4:13

Papaseguroan na sarayan salita ya insulat nen apostol Pablo iray mandadayew ed Dios ya makaawat ira na pakayari pian nagawaan day linawa To.

Ibabaga na arum ya patalos na Biblia ya say Kristo so angiter na pakayari ed si Pablo. Balet diad sankadaanan iran Griegon manuskrito et anggapod sayan bersikulo so salitan “Kristo.” Kanian inusar na dakel ya modernon patalos iray salitan “samay mangiiter ed siak na pakayari” (Balon Mundo a Patalos), “saman so mamabiskeg ed siak” (Say Biblia), tan “sikato ya lapuan na biskeg ko” (New American Bible). Siopa sirin so tutukoyen nen Pablo?

Ipapanengneng na konteksto ya say Dios so tutukoyen nen Pablo. (Filipos 4:6, 7, 10) Diad saya lanlamang ya sulat, imbaga nen Pablo ed saray tagad Filipos: “Say Dios so mamapabiskeg ed sikayo, ya iiter tod sikayo so panlabay tan pakayarin onkiwas.” (Filipos 2:13) Tan insulat tod 2 Corinto 4:7 ya say Dios so angiter ed sikato na pakayarin sumpalen so ministeryo to. (Ikompara so 2 Timoteo 1:8.) Kanian wala ray maabig ya rason pian ibagan say Dios so tutukoyen nen Pablo ya “mangiiter ed siak na pakayari.”

Antoy labay ya ibaga nen Pablo nen insulat ton makaawat na biskeg ya “arapen so amin a bengatla”? Mapatnag ya saray bengatlan tutukoyen nen Pablo et saray nanduruman situasyon ya inarap to legan ton gagawaen so linawa na Dios. Balanglan dagdaiset odino dakdakel so walad sikato, nanmatalek ed si Jehova ya mangasikaso ed sikato. Kanian naaralan nen Pablo so mankontento antokaman so situasyon to.—2 Corinto 11:23-27; Filipos 4:11.

Papaseguroan na saray imbaga nen Pablo iray mandadayew ed Dios natan. Ikdan ira na Dios na pakayarin kaukolan da pian nasarag da ray subok tan nagawaan day linawa to. Sarag iran pabiskegen na Dios panamegley na masanton espiritu to, odino aktibon puersa to, ontan met ed panamegley na saray kapara dan mandadayew ed Dios, tan say Salita to, say Biblia.—Lucas 11:13; Gawa 14:21, 22; Hebreo 4:12.

Say Konteksto na Filipos 4:13

Sarayan salita et nabasad bandad sampot na sulat nen Pablo ed saray Kristiano ya tagad Filipos. Insulat to iya nen manga 60-61 C.E., legan na unonan impakapriso to diad Roma. Walay panaon ya agmakakapangiter iray Kristianon tagad Filipos na materyal ya suporta ed si apostol Pablo. Balet natan, mangipapawit la ra na saray regalo pian niiter iray pankaukolan nen Pablo.—Filipos 4:10, 14.

Kinomendaan nen Pablo iray Kristianon tagad Filipos lapud inkamaiter da tan impaseguro tod sikara ya amin a nakaukolan to et wala lad sikato. (Filipos 4:18) Inusar to met iman ya pankanawnawa pian inabang ed sikaray sekreto na Kristianon panagbilay: Naaralan na amin ya Kristiano so tuan inkakontento, balanglan mayaman odino mairap so bilay da, no manmatalek irad tulong na Dios.—Filipos 4:12.