Roma 6:23—“Patey so Upa na Kasalanan, Balet Bilay ya Andi-Anggaan so Regaloy Dios”

“Say bayar na kasalanan et patey, balet say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.”—Roma 6:23, Balon Mundo a Patalos.

“Patey so upa na kasalanan, balet bilay ya andi-anggaan so regaloy Dios diad panamegley na pikakasakey ed Cristo Jesus a Katawan tayo.”—Roma 6:23, Maung a Balita.

Say labay ya ibaga na Roma 6:23

Diad sarayan salita, impaliwawa nen apostol Pablo ya say rason no akin ya ompapatey iray totoo et lapud makasalanan ira. Balet, inikdan na Dios iray matoor ya lingkor to na balibalin ilalo—say regalon bilay ya andi-anggaan.

“Say bayar na kasalanan et patey.” Amin ya totoo et inyanak ya aliwan perpekto kanian mankakasalanan ira.a (Salmo 51:5; Eclesiastes 7:20) Lapud inyanak iran makasalanan, ontatatken tan ompapatey ira.—Roma 5:12.

Pian iyilustra so punto, inkompara nen Pablo so kasalanan ed sakey ya amo ya mangiiter na upa ed saray trabahador to. Iilaloan na trabahador ya bayaran na amo to lapud impankimey to, ontan met, iilaloan na totoo ya ompatey ira lapud aliwa ran perpekto.

Balet, impaliwawa met nen Pablo ya “say sakey ya inatey la et nibulos la ed kasalanan to.” (Roma 6:7) No inatey lay sakey ya too, bulos la ed antokaman ya agawaan ton kasalanan. Kanian anggapoy rason pian isipen tayon saray inatey et tuloytuloy nin papairapen lapud saray kasalanan ya agawaan da ed apalabas. Diad tua, malinew ya ibabaga na Biblia ya saray inatey et anggapo lan balot so amta ra, anggapo lay nagawaan da, tan nalikna da.—Eclesiastes 9:5.

“Balet say regalon iiter na Dios et say bilay ya andi-anggaan diad panamegley nen Kristo Jesus.” Kabaliktaran ed “bayar” na kasalanan, say regalon iiter na Dios et bilay ya andi-anggaan. Say orihinal ya salitan “regalo” et nayari met ya ipatalos bilang “agkanepegan ya regalo” odino “mapangasin regalo.” Ontutukoy iya ed sakey ya bengatlan inter ed sakey ya too anggano agto itan kanepegan. Lapud makasalanan so amin ya totoo, anggapoy nagawaan da pian niliktar so sarili da tan makapanbilay na andi-anggaan. (Salmo 49:7, 8) Balet mabulos ya inter na Dios so agnaparaan ya regalon bilay ya andi-anggaan ed saramay mangipapanengneng na pananisia ed si Jesus.—Juan 3:16; Roma 5:15, 18.

Say konteksto na Roma 6:23

Insulat iya nen Pablo parad saray Kristiano ed Roma nen manga 56 C.E. Ompapaway ya wala ray arum ya Kristiano ed satan ya panaon ya aliway pakatalos da tungkol ed panangasi na Dios. Lapud impluensya na Griegon pilosopiya, ompan iisipen da ya no mas dakel so kasalanan da, mas minabang ira ed panamerdona na Dios. (Roma 6:1) Ompan irarason met na arum ya agla ra kuno nadusa ed saray agawaan dan lingo lapud agla ra sakop na Mosaikon Ganggan. (Roma 6:15) Diad sulat nen Pablo, indanet to ya agnaawat na saray Kristiano so panangasi na Dios no abuloyan dan kontrolen na kasalanan so bilay da.—Roma 6:12-14, 16.

Ipapaseguro na sayan imbaga nen Pablo ya anggano inyanak ya makasalanan iray lingkor na Dios natan, wala ni ilalo ra. No unoren day atagey ya estandarte na Dios ed moral tan ag-ira manpadaeg ed saray mauges ya pilalek da, impromisa na Dios ya ikdan to ra na bilay ya andi-anggaan.—Roma 6:22.

Bantayan iyan antikey ya video pian nawalaan kay ideya ed libro na Roma.