Hebreo 4:12​—“Say Salita na Dios Sikatoy Mabilay tan Mabiskeg”

“Ta say salita na Dios et mabilay tan makapanyari tan mas makdem nen say dinanman a duaray-tarem ya espada tan ontalos anggad pansianen toy kamarerwa tan espiritu, tan saray pukel tan utek na saratan, tan natebek to ray kanonotan tan intension na puso.”​—Hebreo 4:12, Balon Mundo a Patalos.

“Ta say salita na Dios sikatoy mabilay tan mabiskeg, tan makdem nen say anggan dinan a kampilan a duara’y tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.”​—Hebreo 4:12, Say Biblia.

Say labay ya ibaga na Hebreo 4:12

Say mensahe na Dios ya akasulat ed Biblia et walay pakayari ton ipaamta iray tuan kanonotan tan motibo na totoo. Sarag met na satan ya i-improve so bilay na totoo.

“Say salita na Dios et mabilay.” Say “salita na Dios” et ontutukoy ed saray sipan tan gagala to ya akasulat ed Biblia.a Say sakey ya importantin kaiba ed satan ya gagala to et manbilay na andi-anggaan diad dalin iray maunor ya totoo, ya walay deen tan pankakasakey.​—Genesis 1:28; Salmo 37:29; Apocalipsis 21:3, 4.

Akin et nibagan say salita na Dios, odino say gagala to, et “mabilay”? Lapud saramay mangawat ed satan et naikday pag-asa tan direksion so bilay da. (Deuteronomio 30:14; 32:47) Nibaga met ya “mabilay” so salita na Dios ta mankikimey ni anggad natan so Dios pian nasumpal so amin ya sipan to. (Juan 5:17) Say Dios et aliwan singa too ya mangisipan insan to lanlamang lingwanan, odino na-realize to ya agto lanlamang sarag ya tooren. (Numeros 23:19) “Ag-itan ompawil ed [sikato] ya anggapoy resulta.”​—Isaias 55:10, 11.

“Say salita na Dios et . . . makapanyari.” Say salitan “makapanyari” et nayari met ya ipatalos ya “aktibo,” odino “susumpalen to so antokaman ya kaukolan ya nasumpal.” Labay ton ibaga sirin, amin ya ibabaga odino isisipan nen Jehovab a Dios et nagawan-nagawa. (Salmo 135:6; Isaias 46:10) Diad tua, sarag na Dios ya sumpalen iray sipan to diad paraan ya mas ni nen say iilaloan tayo.​—Efeso 3:20.c

Ontan met, nibagan “makapanyari” so salita na Dios ta sarag na satan ya tulongan iray mamapabli ed salita to ya na-improve day kabibilay tan inkatoo ra. Nagmaliw lan parte na bilay da iray bangat na Dios, tan atan so mangiimpluensya ed kabibilay, panag-isip, tan plano da ed bilay. (Roma 12:2; Efeso 4:24) Kanian sirin, say salita na Dios et ‘walaan met na impluensya’ ed saramay mangaawat ed satan bilang salita na Dios.​—1 Tesalonica 2:13.

“Say salita na Dios et . . . mas makdem nen say dinanman a duaray-tarem ya espada.” Diad simbolikon paraan, say salita na Dios et mas makdem nen say anggan dinan ya espada ta walay pakayari na satan ya ontalos ed puso​—odino tuan inkatoo na sakey. Anggapoy ontan ya impluensya na saray bangat na totoo. Napatnagan itan ed samay katuloyan na Hebreo 4:12.

“Say salita na Dios et . . . ontalos anggad pansianen toy kamarerwa tan espiritu, tan saray pukel tan utek na saratan.” Diad Biblia, say “kamarerwa” et nayarin ontutukoy ed nanengneng ya inkatoo na sakey, balet say “espiritu” et nayarin ontukoy ed no anton talagay walad puso na sakey. (Galacia 6:18) Diad simbolikon paraan, say “salita na Dios” et ontatalos anggad ‘utek na saray pukel,’ say sankaaraleman ya kanonotan tan liknaan tayo. Lapud ipapaamta na saray bangat nen Jehova no anton talagay walad puso tayo, labay ton manguman tayo pian man-improve itayo. Anggano agnanenengneng na totoo itan ya pananguman, nalilikna tayoy tuan liket tan napapaliket tayoy Amalsa ed sikatayo.

“Say salita na Dios et . . . natebek to ray kanonotan tan intension na puso.” Say reaksion na sakey ed salita na Dios so pakanengnengan no anton talagay walad nonot, intension, odino motibo to lapud saratan so mangiimpluensya ed kagagawa odino ugali to. Singa bilang, no iyaplika na sakey so salita na Dios tan manggaway nakaukolan ya pananguman ed bilay to, ipapanengneng to ya sikatoy mapaabeba tan akaparaan ya paibangat. Labay ton napaliket so Amalsa ed sikato. No say sakey balet et mananap na lingo ed salitay Dios, ipapanengneng na satan ya sikatoy mapaatagey o makasarili. Ompan baraan to labat itan pian iyamot iray mauges ya gagawaen to.​—Jeremias 17:9; Roma 1:24-27.

Ibabaga na sakey ya reperensya ya say salita na Dios et “nasabi toy sankaaraleman ya parte na laman tayo.” Anggapoy parte na inkatoo tayo ya agnanengneng na Dios tan agnasabi na salita to. Ibabaga na Hebreo 4:13 ya “amin a bengatla et mapatpatnag tan sankanengneng na samay sakey a walaan itayoy eebatan.”

Konteksto na Hebreo 4:12

Say pinuyanan a libro na Biblia ya Hebreo et insulat nen apostol Pablo nen manga 61 C.E. parad saray Judion Kristiano ed Jerusalem tan Judea.

Diad kapitulo 3 tan 4, impaimano nen Pablo no panon ya say alimbawa na saray Israelita nensaman et pakaaralan na saray Kristiano. (Hebreo 3:8-12; 4:11) Im-promise nen Jehova ya palayaen to ra manlapud impakaaripen da ed Ehipto tan panayamen to ra ed dalin ya mareen tan ‘maligen.’ (Deuteronomio 12:9, 10) Balet saray Israelita ya pinmaway manlapud Ehipto et anggapoy pananisia ra ed sipan na Dios tan paulit-ulit dan ag-inunor iray ganggan to. Lapud satan, ‘ag-ira akaloob ed painawa na Dios’ tan ag-ira nagmaliw ya kaaro to. Imbes, inatey ira ed kalawakan. Anggano akaloob ed Insipan a Dalin iray ananak da, agda lanlamang inunor si Jehova. Tan asabi panaon, nanirap so nasyon da.​—Nehemias 9:29, 30; Salmo 95:9-11; Lucas 13:34, 35.

Impaliwawa nen Pablo ya makaaral la komon iray Kristiano ed aliwliwan alimbawa na saray Israelita. Agtayo ra aaligen. Pian makaloob tayo ed painawa na Dios, kaukolan tayon unoren so salita to tan pantiwalaan tayo ray sipan to.​—Hebreo 4:1-3, 11.

Bantayan iyan antikey ya video pian nawalaan kay ideya ed libro na Hebreo.