Maong ya Anak tan Mauges ya Anak

NENGNENG mo natay Cain tan Abel. Baleg la ra. Nagmaliw ya dumaralos si Cain. Sikatoy mantatanem na prutas tan pisipising.

Si Abel balet et nagmaliw ya managpastol. Labalabay ton asikasoen iray angkekelag nin karnero. Anggad apabaleg to iratan, tan dinmakel so papastolan to.

Aminsan, nanregalo si Cain tan Abel ed Dios. Angawit si Cain na prutas tan pisipising ya tanem to. Angawit met si Abel na sankatabaan ya karnero to. Aliketan si Jehova ed si Abel tan ed regalo to. Balet sikatoy ag-aliketan ed si Cain tan ed regalo to. Antam no akin?

Aliwan lapud mas marakep so regalo nen Abel nen say si Cain. Say rason et maong a too si Abel. Inaro toy Jehova tan say kuya to. Si Cain balet et mauges; agto inaroy agi to.

Kanian binagaan na Dios si Cain ya manguman, balet agdinmengel. Nampasnok ya maong ta mas labay na Dios si Abel. Intagar nen Cain si Abel ed alog. Diman et pinekpek toy agi ton si Abel, kanian inatey. Mauges so ginawa nen Cain awa?

Anggano inatey lay Abel, sikatoy sankanonot ni na Dios. Maomaong si Abel, tan agbalot lingwanan nen Jehova so toon singa sikato. Kanian nasabi agew et bilayen nen Jehova si Abel. Diad satan, sikatoy aglan balot ompatey. Balibalin nakabat so toon singa si Abel awa?

Balet aglabay na Dios iray totoon singa si Cain. Kanian sanen pinatey nen Cain so agi to, sikatoy dinusa tan pinataynan na Dios. Impila nen Cain so sakey ed saray agi ton bii tan inasawa to.

Agnambayag, wala lay ananak di Cain. Saray arum ya ananak di Adan tan Eva et angaasawa, tan awalaan met na ananak. Kanian dinmakel so totoo ed dalin. Kabaten tayo so arum ed sikara.