Nanggaway Biong si Noe

SI Noe et walaan na asawa tan taloran anak. Say ngaran na ananak to et Sem, Ham, tan Jafet. Tan walay kaasawaan da. Kanian diad pamilya nen Noe et walora ran amin.

Walay ipapagawa na Dios ed si Noe. Sakey a biong ya singa kabaleg na barko. Balet, say itsura to et singa baleg tan andukey ya kahon. Imbaga na Dios ya ‘gawaen ton taloran grado itan tan igawaan to na saray kuarto.’ Saray kuarto et parad si Noe tan say pamilya to, parad ayayep, tan pankargaay kanen da.

Imbaga met na Dios ed si Noe ya seguroen ton agnalooban na danum so biong. Inkuan to: ‘Delapen koy interon mundo. Tan amin ya anggapod loob na biong et ompatey.’

Inunor nen Noe tan na ananak to si Jehova tan ginapoan day nanggaway biong. Balet inelek-elekan ira na arum. Siansian mauges iray totoo. Anggapoy anisia ed si Noe sanen imbaga toy gawaen na Dios.

Kayari na dakel a taon, asumpal a siansia so balbaleg a biong. Binilin natan na Dios si Noe ya mangiloob na ayep ya sanpares, sakey ya laki tan sakey ya bii. Balet diad arum ya klase na ayayep, imbaga na Dios ya mangiloob si Noe na sanpipito. Imbaga met na Dios ed sikato ya mangiloob na nanduruman klase na ontitikyab a manok. Ginawa nen Noe so amin ya imbaga na Dios.

Kayari to, linmoob met lay Noe tan say pamilya to ed biong. Insan inkapot la na Dios so puerta. Diad loob, nanalagar ira. Imadyin mo pan wadman ka ya kaiba dan manaalagar. Talaga kasin ondelap?