Apatiran Balolaki Diad Babilonia

INAWIT ya amin nen Arin Nabucodonosor iray de-aral ya Israelita diad Babilonia. Insan pinili to iray sankaguapoan tan sankatalinoan ed sikara. Say apatirad sikara et sarayay balolakin walad litrato. Sayay sakey et si Daniel, sayay talora et nginaranan na taga-Babilonia ya Sadrac, Mesac, tan Abednego.

Plano nen Nabucodonosor ya ipasal ira pian manlingkor ed sikato. Kayari taloy taon, manpili ed sikara na sankatalinoan pian ontulong ed sikatod saray problema na palasyo. Labay na ari ya maksil so laman da legan iran ipapasal. Kanian ingganggan to ray aripen to ya ikdan da ray mananam a naakan tan alak ya parehon iseserbid sikato tan ed pamilya to.

Nengneng moy Daniel. Antam no antoy ibabaga tod manunan opisyal nen Nabucodonosor a si Aspenaz? Ibabaga ton agto labay ya kanen iray mananam ya kakanen na ari. Balet aburido si Aspenaz, inkuan to: ‘Imbaga na ari no antoy nepeg yon kanen tan inumen. Et no nanengneng ton makapuy so laman yo no ikomparad saray kaedaran yo, ompan pateyen to ak.’

Kanian akitongtong si Daniel ed tinuro nen Aspenaz ya mangasikaso ed sikaran apat: ‘Subok mo kami pa ed 10 agew. Ikdan mo kami na pising tan danum. Insan mo kami ikomparad babalolakin mamangan na kakanen na ari, tan nengneng mo no siopad sikami so walaay marakep ya laman.’

Inmabuloy so manag-asikaso. Tan kayari na 10 agew, mas balibali so laman nen Daniel tan saray kakaaro to nen say amin ya balolaki. Kanian intuloy da ran inikdan na pising, imbes ya saray kakanen na ari.

Kayari taloy taon, inawit ed si Nabucodonosor so amin ya balolaki. Sanen akatongtong to la ran amin, anengneng to ya si Daniel tan saray kakaaro to so sankatalinoan. Kanian impanayam to la rad palasyo pian makatulong ed sikato. Tan kada no tepetan na ari si Daniel, Sadrac, Mesac, tan Abednego nipaakar ed saray problema, 10 beses ya maong ni ebat da nen saray saserdote odino matalinon aripen.