No Panon Tayon Manbilay ya Andi-angga

ANTOY babasaen na sarayay ugugaw? On, say libron Saray Istorya ed Biblia. Tan babasaen da met so istoryan babasaen mo natan—“No Panon Tayon Manbilay ya Andi-Angga.”

Antam no antoy naaralan da? Naaralan da ya kaukolan tayon kabaten si Jehova tan say Anak ton si Jesus pian makapambilay ya andi-angga. Onyay ibabaga na Biblia: ‘Saya so paraan pian manbilay ya andi-angga. Kabaten so saksakey ya tuan Dios, tan say Anak ya imbaki tod dalin, si Jesu-Kristo.’

Panon tayo ran nakabat? Say sakey ya paraan et diad pambasa ed Saray Istorya ed Biblia. Dakel so naaralan tayod si Jehova tan si Jesus ed saya awa? Tan naaralan tayo met ed saya iray ginawa ra tan gawaen da ni. Balet aliwan saya labat so nepeg tayon basaen.

Nanenengneng mo yay sakey nin libro diad litrato? Biblia iya. Patulongan kad arum pian nabasam iray parte na Biblia ya inistoryad sayan libro. Nabasad Biblia so amin ya kaukolan tayo pian dugay panlingkor tayod si Jehova tan manbilay ya andi-angga. Kanian nepeg ya aralen tayon lanang so Biblia.

Balet say panaral nipaakar ed si Jehova a Dios tan si Jesu-Kristo et kulang ni. Anggano dakel lay amta tayo nipaakar ed sikara tan saray bangat da, nayarin agtayo makapambilay ya andi-angga. Antam no anto ni kaukolan?

Kaukolan tayon iyaplika iray naaralan tayo. Natandaan mo ni si Judas Iscariote? Sikatoy sakey ed saray 12 a pinili nen Jesus ya apostol to. Dakel so amta nen Judas nipaakar ed si Jehova tan si Jesus. Balet antoy agawad sikato? Sikatoy nagmaliw ya makasarili, tan trinaidor toy Jesus kasalat na 30 pirason pilak. Kanian agmakaawat si Judas na bilay ya andi-angga.

Si Gehazi ey, natandaan mo ni? Diad Istorya 69 et naamtaan tayo ya labalabay ton naalay pigaran kawes tan kuarta ya agto gawa. Kanian nantila pian naala iraya. Pero sikatoy dinusa nen Jehova. Tan dusaen to tayo met no agtayo unoren iray ganggan to.

Balet dakel iray maong a totoo ya matulok ed si Jehova. Labay tayo ran aligen awa? Balibalin aligen so ugaw ya si Samuel. Diad Istorya 55 et manga apatira o limaran taon to ni labat sanen nanlingkor ed si Jehova diad tabernakulo. Kanian anggano ugaw ka ni, sarasarag moy manlingkor ed si Jehova.

Siempre, labay tayon amin ya aligen si Jesu-Kristo. Diad Istorya 87, anggan ugaw ni si Jesus et intongtong to diad templo so nipaakar ed Ama to. Aligen tayoy alimbawa to. Ibaga tayo met ed arum so nipaakar ed maomaong a Dios tayon si Jehova tan say Anak to, si Jesu-Kristo. No gawaen tayo iya, makapambilay tayo ya andi-angga diad balon paraiso na Dios diad dalin.