Makabkabaliksan so Katuaan Nipaakar ed Kamarerwa
“Nakabatan yo so katuaan, et say katuaan sikayo so gawaen to a bulos.”—JUAN 8:32.
1. Akin ya importantin usisaen iray sisiaen tayo nipaakar ed kamarerwa tan ipapatey?
SARAY sisiaen nipaakar ed ipapatey tan say Biek a bilay so maslak a resultay abenegan na sakey ed relihyon tan kultura. Singa anengneng tayo la, saratan so onlalaknab manlapud kombiksion a namoria na kamarerwa so kapantokan a kalat to kayari lambengat na dakel a kianak lamet ya angga ed say ideyan nadetermina so kapantokan a pansumpalan na sakey legay panbibilay ni. Nipaakar ed saya, nayarin liknaen na sakey a matalek ed kaunoran a kilaok ed ultimon inkapeteg diad ipatey, say arum met et diad pakadampot ed Nirvana, tan say arum ni et say pakagamor na tumang ed tawen. Anto, sirin, so katuaan? Lapud saray sisiaen tayo et iimpluensiaan toray ugali, kiwas, tan desisyon tayo, agtayo ta panpagaan so pananap na ebat ed satan a tepet?
2, 3. (a) Akin a makapanmatalek itayo ed ibabaga na Biblia nipaakar ed kamarerwa? (b) Singa nibaga ed Biblia, antoy katuaan nipaakar ed kamarerwa?
2 Say sankadaanan a libro ed mundo, say Biblia, so manusuysoy ed awaran na too anggad impamalsa ed inmunan toon kamarerwa. Saray bangat to et bulos ed saray pilosopiya tan tradisyon na totoo. Malinlinew ya ibabaga na Biblia so katuaan nipaakar ed kamarerwa: Say kamarerwam et sika, saray inaatey et sigpot a naandi la tan saramay walad pakanodnonotan na Dios et napaoli ed aturon panaon to. Antoy kabaliksan na pakaamta ed saya parad sika?
3 “Nakabatan yo so katuaan, et say katuaan sikayo so gawaen to a bulos,” kuan nen Jesu-Kristo ed papatumbok to. (Juan 8:32) On, say katuaan et manangibulos. Balet manlapud anto so pangibulosan ed sikatayo na katuaan nipaakar ed kamarerwa?
Kawayangan Manlapud Takot tan Kaandiay Ilalo
4, 5. (a) Anton takot so eekalen na katuaan nipaakar ed kamarerwa? (b) Panon a say ilalon kikioli et angiter na tepel ed nansakit na makapatey a tin-edyer?
4 “Maslak a totoo et antakot ed ipapatey tan manggugunaet a paliisay panisip ed satan,” kuan na The World Book Encyclopedia. “Say salitan ‘ipapatey’ a mismo so ngalngalin agnasasalambit ed Sagur,” inkuan na sakey a manag-awaran. Tan diad pigaran kultura saray kasandin agmakapasakit a balikas singa say “linma la” tan “tinmaynan la” so kaslakan ya uusaren pian tukoyey impatey na too. Sayan takot ed ipapatey so diad tua et takot ed agkabat, lapud parad maslak a totoo say patey et sakey a misteryo. Say pikakabat ed katuaan nipaakar ed no antoy nagagawa sano inatey itayo et mamakepa ed sayan takot.
5 Alimbawa, konsideraen pay kipapasey nonot na mantaon na 15 a si Michaelyn. Sikatoy a-leukemia tan nipaarap ed makapasinagem ya ipapatey. Nanonotan ni na ina to, si Paula: “Inkuan nen Michaelyn ya agto panaaburidoay ompatey lapud amta ton say ipapatey et temporaryo labat. Naynay min pantotongtongay nipaakar ed balon mundo na Dios tan amin na saramay napaoli ed satan. Baleg so pananisia nen Michaelyn ed si Jehova a Dios tan say kikioli—ya anggapon balot so panduaruwa.” Say ilalon kikioli so angibulos ed sayan makpel a kalangweran a bii manlapud alablabas a takot ed ipapatey.
6, 7. Diad anton kaandiay ilalo so pangibubulosan ed sikatayo na katuaan nipaakar ed kamarerwa? Iyilustra.
6 Antoy epekto na katuaan ed atateng nen Michaelyn? “Say impatey na anak min bii et sankaot-otan a bengatlan agawa ed sikami ed kapiganman,” kuan nen Jeff, say ama to. “Balet ta mataletalek kami ed sipan nen Jehova a kikioli, tan tatalaranan mi so isabi agew a nalakap mi lamet si Michaelyn. Agaylan panuulop lamet itan!”
7 On, say katuaan nipaakar ed kamarerwa so mangibubulos ed too manlapud kaandiay ilalo a nayarin itarok na ipapatey na inad-aron sakey. Siempre, anggapoy sigpot a makapangekal ed ot-ot tan kaermenan a nasagmak sano ompatey so inad-aro tayo. Balet, say ilalon kikioli so manempey ed pandageyem tan mamakepan maong ed ot-ot.
8, 9. Manlapud anton takot so pangibubulosan ed sikatayo na katuaan nipaakar ed kipapasen na inaatey?
8 Say katuaan na Kasulatan nipaakar ed kipapasen na inaatey so mangibubulos met ed sikatayo manlapud takot ed inaatey. Nanlapulad impakaaral ed sayan katuaan, dakel a datin binalor na saray aniton ritual nipaakar ed inaatey et agla manaaburido ed saray pakasakitan, palar, galing, tan an-anito, nisay mangiyapay ira na mabmabli pian pareenen iray inmunan atateng da tan naamper iran man-anyani ed mabilay. On, lapud say inaatey et “agda amta so bengatla,” saratan ya agagamil et kaapaan.—Eclesiastes 9:5.
9 Say katuaan nipaakar ed kamarerwa, a naromog ed Biblia, et talagan manangibulos tan napanmatalkan. Balet konsideraen pa met so nikadkaduman ilalo ya itatarya na Biblia ed sika.
[Blurb ed pahina 29]
Say katuaan nipaakar ed kamarerwa so mangibulos ed sika manlapud takot ed ipapatey, takot ed inaatey, kaandiay ilalo lapud impatey na inad-aro tayo