‘Mapaabeba Ak ed Puso’

1-3. Panoy inyentra nen Jesus ed Jerusalem, tan akin a nayarin pakabiglaan itan na arum a mangiimaton?

SAY Jerusalem so napnoy masayaksak a totoo. Walay onsabin matalonggaring a too! Diad paway na syudad et dakdakel so totoo ed gilig na dalan. Pitamitam dan abrasaen iyan too, lapud ibabaga na arum a sikatoy tomatawir nen Arin David tan say makanepegan a Manuley ed Israel. Walaray angaawit na palma pian ipayapay; arum so angibilkag na kawekawes tan sangasanga ed dalan pian iparaan so dalanan to. (Mateo 21:7, 8; Juan 12:12, 13) Nayarin panumamengan na dakel no panon kasi iyentra to.

² Saray arum so nayarin maniilalo ed sakey a maparayag ya entrada. Seguradon walaray amta ran maimpluensyan totoo ya engrande so impanparada ra. Alimbawa, sanen improklama nen Absalom ya ilalak nen David so inkasikato bilang ari, walay 50 a lalaki ya ombabatik ed unaan na karwahe to. (2 Samuel 15:1, 10) Say Romanon manuley a si Julius Caesar so angaukolan na mas mapasirayew ni ingen a panangiparayag; aminsan et indaulo to so sakey a prosesyon na impanbiktorya anggad kapitolyo na Roma, a diad biek tan biek to et atalonton so 40 elepanti a sinasabitan na lampara! Balet, natan, tatalaranan na totoo ed Jerusalem so toon mas matalonggaring ya aminpigapiga. Balanglan sigpot a natatalosan na sarayan totoo itan odino andi, saya so Mesias, say sankatalonggaringan a too a nambilay ed interon awaran. Balet, sano sayan Ari ed arapen so onentra la, arum so nabigla.

³ Anggapo iray nanengneng dan karwahe, bumabatik, odino kabkabayo, tan seguradon anggapo iray elepanti. Noagta, si Jesus so akalugan ed ordinaryo labat ya ayep ya uusaren ed kimey, sakey ya asno.a Ag-alaboran so kawes na sayan akalugan, nisay ayep a niluganan to. Imbes a say beneg na ayep et tapewan na mablin yurongan, satan so inapisan labat la na pigaran abel na maapit a papatumbok nen Jesus. Akin a pinili nen Jesus so ontan kasimplin paraan na iyentra to ed Jerusalem, bangta saray totoon aliwan singa sikato kaprominente et angaukolan na mapasirayew a parada?

4. Anto so impasakbay na Biblia nipaakar ed paraan na iyentra na Mesianikon Ari diad Jerusalem?

⁴ Susumpalen nen Jesus so propesiya a: “Manliket ka . . . oneyag ka, O bii ya anak na Jerusalem; nia, say arim onsabi ed sika; sikato so maptek, tan walaan na panangilaban; mauyamo, tan onkabayo ed sakey ya asna.” (Zacarias 9:9) Ipapanengneng na sayan propesiya a nasabi panaon et iparungtal na Nilanaan na Dios, say Mesias, so inkasikato ed saray totoo diad Jerusalem bilang tinuro na Dios ya Ari. Niarum ni, say mismon paraan na panggawa to ed satan, pati say pilien ton luganan, so mangiparungtal ed alay abig a kalidad na puso to​—say kapaabebaan.

5. Akin a makapakiwas so inkamapaabeba nen Jesus sano dalepdepen, tan akin ya importante ya aligen tayo si Jesus ed sayan pamaakaran?

⁵ Say inkamapaabeba nen Jesus so sakey ed saray kalidad to a pakakasagyatan a maong, tan satan so makapakiwas sano dalepdepen. Unong ya asingbat tayo la ed apalabas a kapitulo, si Jesus labat so “dalan, tan say katuaan, tan say bilay.” (Juan 14:6) Malinew ya anggapo ed saray binilbilyon a totoo a nambilay ed sayan dalin so makapipara anggan kapigan ed inka-importante na Anak na Dios. Anggaman ontan, anggapoy napatnagan ed si Jesus ya anggan samet labat a kinon, odino inkatangsit, a sankapatnagan ed dakerakel ya aliwan perpekto a totoo. Pian magmaliw a papatumbok nen Kristo, kaukolan tayon labanan so tendensian magmaliw a makinon. (Santiago 4:6) Tandaan, kabusol nen Jehova so inkatangsit. Kanian, importante ya aralen tayon aligen so inkamapaabeba nen Jesus.

Abaybayag lan Panangipatnag na Kapaabebaan

6. Anto so kapaabebaan, tan panoy pakaamta nen Jehova a magmaliw a mapaabeba so Mesias?

⁶ Say kapaabebaan et ontutukoy ed kaabebaan na nonot, aliwan matangsit odino mankinon. Satan a kalidad so manlalapud puso tan napatnagan ed pananalita, kondukta, tan pidedeneng na sakey a too ed arum. Panoy pakaamta nen Jehova a magmaliw a mapaabeba so Mesias? Amta nen Jehova ya ipapatnag na Anak to so dili Ton nagnap ya ehemplo na kapaabebaan. (Juan 10:15) Naimatonan to met a mismo so kapaabebaan na Anak to. Panon?

7-9. (a) Panon ya impatnag nen Miguel so kapaabebaan diad samay komprontasyon to ed si Satanas? (b) Panon a naalig na saray Kristiano si Miguel diad panangipatnag na kapaabebaan?

⁷ Ipaparungtal na libro na Judas so makapasagyat ya alimbawa: “Si arkanghel Miguel, nen mibabakal ed Diablo nisesengeg ed laman nen Moises, agpinmangaya a nanagamil na pamabpabanday a panangukom a sumpa ed sikato, noag ingen inkuanto, Say Katawan pooten to ka.” (Judas 9) Antis tan kayari na impanbilay nen Jesus diad dalin, Miguel so inngaran ed sikato diad betang to bilang arkanghel, odino pangulo na mangatatawen ya armada na angheles nen Jehova.b (1 Tesalonica 4:16) Balet, imanoen no panoy impideneng nen Miguel ed sayan komprontasyon ed si Satanas.

⁸ Ag-imbaga ed sikatayo na salaysay na Judas no anto so labay a gawaen nen Satanas ed bangkay nen Moises, balet segurado itayon walay nononoten na Diablo a marelmeng a pangusaran ed satan. Nayarin kaliktan ton isagyat so lingon pangusar ed bangkay na satan a matoor a too diad palson panagdayew. Anggaman sinumpa nen Miguel so marelmeng a getma nen Satanas, impatnag to met so makapadinayew a panangontrol ed inkasikato. Seguradon nepeg labat a nabaat si Satanas, balet diad saman ya impisuppiatan nen Miguel ed si Satanas, agni niiter ed sikato so “amin a panangukom,” kanian moriaen ton si Jehova a Dios labat so nepeg a mangukom. (Juan 5:22) Bilang arkanghel, si Miguel so walaan na malaknab ya autoridad. Ingen, sikatoy mapaabeban nampasakop ed si Jehova imbes a salien ton samsamen so kaaruman ya autoridad. Nilikud ni ed kapaabebaan, impanengneng to met so kasimpitan, odino panamidbir ed saray limitasyon to.

⁹ Pinuyanan si Judas a mangisulat ed sayan insidente lapud sakey a rason. Makapaermen ta aliwan mapaabeba so arum a Kristiano nen panaon nen Judas. Sikaray matangsit a ‘mamapabanday ed saray bengatlan [talagan] agda amta.’ (Judas 10) Agaylan magmainomay parad sikatayon aliwan perpekto a totoo a nadaeg na kinon! Sano walay agtayo natatalosan ya uksoyan a ginawa ed loob na Kristianon kongregasyon, nayarin nipaakar ed desisyon na ulop na mamatatken, antoy reaksion tayo? No mantotongtong itayo pian mankritiko odino pian mananap na ituklaw, anta agtayo met talagan amta so amin ya anggulo ed saray ginawan desisyon, agta ipapatnag tayon andian itayo na kapaabebaan? Imbes ya ontan so gawaen, aligen tayo si Miguel, odino si Jesus, tan agtayo manhuhusga ed saray pamaakaran ya ag-itayo inikdan na Dios na autoridad.

10, 11. (a) Anto so makapadinayew ed inkamabulos na Anak na Dios a mangawat ed asainmin to ya onla dia ed dalin? (b) Panon tayon naalig so inkamapaabeba nen Jesus?

¹⁰ Impanengneng met na Anak na Dios so kapaabebaan diad impangawat to ed asainmin ya onla diad dalin. Nonoten pa no antoy kaukolan ton taynan. Sikato so arkanghel. Sikato met so “Salita”​—say mismon Representatin Managsalita nen Jehova. (Juan 1:1-3) Sikatoy manaayam ed tawen, say ‘panag-ayaman na inkasanto tan gloria’ nen Jehova. (Isaias 63:15) Anggaman ontan, “nilukpos [na Anak] so inkasikato, ya inala to so ereng na sakey ya aripen, ya agawan kaulibay na saray totoo.” (Filipos 2:7) Nonoten pa no antoy lalanoren na asainmin to diad dalin! Say bilay to so inyalis ed panag-anakan na sakey a Judion birhen, pian ombaleg ditan ed loob na siam bulan tan magmaliw ya ugaw a too. Sikatoy inyanak diad sankaabungan na pobrin karpentero bilang sakey ya ugaw ya agto niyagel so inkasikato, insan binmaleg, ya anggad nagmaliw a tin-edyer. Anggaman si Jesus et perpekto, sanlegay inkatobonbalo to et sikatoy nantultuloy a nampasakop ed aliwan perpekton toon atateng. (Lucas 2:40, 51, 52) Agaylan makapadinayew a kapaabebaan!

¹¹ Kasin naalig tayo so inkamapaabeba nen Jesus diad mabulos a pangawat ed saray asainmin a no maminsan et singano abebbeba? Alimbawa, say asainmin tayon ipulong so maong a balita na Panarian na Dios so singa abebbeba sano sikatayoy ipungit-pungit, babalawen, odino bubusolen ni ingen na saray totoo. (Mateo 28:19, 20) Balet, no mantepel itayo ed sayan kimey, nayarin makapangiliktar itayo na saray bilay. Antokamay resulta, baleg so naaral tayo nipaakar ed inkamapaabeba, tan natumbok tayo iray bakat na Katawan tayo, si Jesu-Kristo.

Say Inkamapaabeba nen Jesus Bilang Too

12-14. (a) Panon ya impanengneng nen Jesus so kapaabebaan sanen sikatoy indayew na totoo? (b) Diad antoran dalan a si Jesus so mapaabeban akideneng ed arum? (c) Antoy mangipapanengneng a say inkamapaabeba nen Jesus et aliwa labat a nisesengeg ed pormalidad odino kaabigan na walna?

¹² Manlapud gapo angga ed sampot na ministeryo nen Jesus diad dalin, apatnagan so inkamapaabeba to. Impanengneng to itan diad impangipaarap to ed amin a dayew tan gloria ed Ama to. No maminsan, idadayew na totoo si Jesus lapud makabat a pananalita to, pakapanyari na saray milagro to, anggan say kaabigan na walna to. Balet, paulit-ulit ya impulisay nen Jesus so panangigloria ed sikato tan impaarap to itan ed si Jehova.​—Marcos 10:17, 18; Juan 7:15, 16.

¹³ Impanengneng nen Jesus so kapaabebaan diad paraan na impantrato to ed totoo. Diad tua, impalinew to a sikatoy linma dia ed dalin, aliwan pian panlingkoran, noag pian manlingkor ed arum. (Mateo 20:28) Impanengneng toy kapaabebaan diad mauyamo tan makatunongan ya impideneng to ed totoo. Sanen sikatoy dinismaya na saray patumbok to, agto ra nantamian; lawas ton nanggunaetan a sinabi so kapusoan da. (Mateo 26:39-41) Sanen inabala na ulop na totoo so pampainawa, ilirep, tan pambukbukor to, agto ra inablog; intultuloy toy nambunek, ya imbabangat to ra na “amayamay a bengabengatla.” (Marcos 6:30-34) Sanen sikatoy mapilit ya akikasian na aliwan-Israelitan bii a mamaabig ed marikit to, diad gapo et impatnag ton agto itan gawaen. Balet, agto mapasnok ya impulisay so bii; noagta lapud nikadkaduman pananisia na bii, sikatoy inmabuloy lanlamang, unong a nasingbat tayo ed Kapitulo 14.​—Mateo 15:22-28.

¹⁴ Lawas tinoor nen Jesus iray mismon imbaga to nipaakar ed inkasikato: “Mauyamo ak tan mapaabeba ak a puso.” (Mateo 11:29) Say kapaabebaan to et aliwan kuankuanan, a singa nisesengeg labat la ed pormalidad odino kaabigan na walna. Nanlapu itan ed utel na puso to. Kanian agla pankelawan a manunan prayuridad nen Jesus so pangibangat na kapaabebaan ed saray patumbok to!

Panangibangat ed Saray Patumbok To a Magmaliw a Mapaabeba

15, 16. Anto so impaimano nen Jesus a pandumaan na ugali na saray manuley ed mundo tan ugalin kaukolan a bayuboan na saray patumbok to?

¹⁵ Saray apostol nen Jesus so matantan a mangiyaplika ed inkamapaabeba. Kanian apakiwas si Jesus a maminpigan panggunaetan ya ibangat itan ed sikara. Alimbawa, diad sakey ya inkagawa et kinerew nen Santiago tan Juan, panamegley na ina ra, ya isipan nen Jesus ed sikara so atagey iran posisyon diad Panarian na Dios. Diad mauyamon paraan, inmebat si Jesus: “Say iyurong yo ed nikawanan a limak tan dia ed nikawigi a limak, agko kien so panangiter, ingen sikato so nipaakar ed saray angiparaanan nen Amak.” Saray samplora nin apostol so “asanokan” ed si Santiago tan Juan. (Mateo 20:20-24) Panon a sinolbar nen Jesus iyan problema?

¹⁶ Binaat to iran amin ed mapangasin paraan, a kuan to: “Amta yo a saray makauley na saray Gentiles sikara so katawan ed sikara, tan saray manunaan agamilen da so pakauley da ed sikara. Aliwan ontan naani dia ed sikayo; noag ingen siopaman a labay toy magmaliw a baleg ed sikayo sikato naani managlingkor yo. Tan siopaman a labay toy unaan ed sikayo sikato naani aripen yo.” (Mateo 20:25-27) Maseguron anengneng na saray apostol no panoy inkamapaatagey, inkaambisyoso, tan inkasiblet na ‘saray manuley na Gentiles’ odino nasyones. Impaimano nen Jesus a saray patumbok to so nepeg a duma ed saratan a malames tan abitil-ed-pakapanyari a totoo. Kaukolan day magmaliw a mapaabeba. Kasin atebek na saray apostol so punto?

17-19. (a) Diad samay labi antis na ipatey nen Jesus, diad anton agnalinglingwanan a paraan ya inikdan to iray apostol to na leksion nipaakar ed kapaabebaan? (b) Anton sankabiskegan a leksion nipaakar ed kapaabebaan so imbangat nen Jesus bilang too?

¹⁷ Nairapan ira. Aliwan saya so inmuna odino unor ya impangibangat nen Jesus ed satan a leksion. Antis ni na satan, sanen nansasangsangan da no siopa ed sikara so sankatalonggaringan, tinawag to’d pegley da so melag ya ugaw tan inkuan to’d sikara ya aligen daray ugugaw, ya aliwan mapaatagey, maambisyon, tan agmankaliktan na rangko​—bengabengatlan kaslakan ed saray susto la’d edad. (Mateo 18:1-4) Ingen, diad samay mismon labi antis na ipatey to, naimatonan to a wala nin siansiay inkamapaatagey na saray apostol to. Kanian, inikdan to ra na agnalinglingwanan a leksion. Sikatoy angibalkes na tuwalya tan ginawa to so sankaabebaan a kimey, samay kaslakan a gagawaen na saray lingkor ed saman a panaon parad saray ombibisita ed abung. Inusaran nen Jesus so kasalian na saray apostol to​—pati si Judas, a magano lan mantraidor ed sikato!​—Juan 13:1-11.

¹⁸ Impatebek nen Jesus so punto sanen inkuan to ed sikara: “Inikdan ta kayo na sakey a pangaligan.” (Juan 13:15) Kasin tinmanek a siansia iyan leksion ed kapusoan da? Imanoen pa iya, diad saginonor na saman a labi, nansasangsangan da lamet no siopa so sankatalonggaringan ed sikara! (Lucas 22:24-27) Ingen, siansian maan-anos si Jesus ed sikara tan sipapaabeba to ran imbangat. Insan to ni ira inikdan na sankamapuersaan a leksion: “[Sikatoy] nampaabeba a nagmaliw a matulok ya anggad say ipapatey, on, say ipapatey ed [“panamairapan a kiew,” NW].” (Filipos 2:8) Mabulbulos si Jesus ya anagmak na makapabaing ya ipapatey, a lingon kinondena bilang kriminal tan manag-ayew. Pinaneknekan sirin na Anak na Dios a sikatoy nikadkaduma, lapud diad amin na saray pinalsa nen Jehova et sikato so angipatnag na naspot tan sankatalonggaringan a kapaabebaan.

¹⁹ Nayarin sayan unor a leksion nipaakar ed kapaabebaan, ya imbangat nen Jesus bilang too, so tinmanetanek ed kapusoan na saray matoor ya apostol to. Ibabaga na Biblia ed sikatayo a sipapaabeban nankimey irayan lalaki kayari na pigay taon, a dekada ni ingen ed saginonor. Komusta itayo balet?

Kasin Tumboken Mo so Pangaligan ya Inletneg nen Jesus?

20. Panoy pakaamta tayo no mapaabeba itayo ed puso?

²⁰ Bibilinen nen Pablo so balang sakey ed sikatayo: “Yatol yo so sayan kalakal ed sikayo, a wala met nensaman ed Kristo Jesus.” (Filipos 2:5) Singa si Jesus, kaukolan itayon magmaliw a mapaabeba ed puso. Panon tayon naamtaan no kasin walad puso tayo so kapaabebaan? Bueno, papanonotan itayo nen Pablo a nepeg ya “anggapon balot komon so gawaen [tayo] a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.” (Filipos 2:3) Say sekreto sirin et akadepende ed no panon tayon momoriaen so arum kompara ed sikatayo. Kaukolan a moriaen tayo ira a mas superyor tan mas importante nen say sikatayo. Kasin iyaplikam itan a simbawa?

21, 22. (a) Akin a kaukolan a mapaabeba iray Kristianon manangasikaso? (b) Panon tayon nipanengneng ya akabalkes ed sikatayo so kapaabebaan?

²¹ Kayari na dakel a taon manlapud impatey nen Jesus, siansia nin sankanonot nen apostol Pedro so kaimportantian na kapaabebaan. Imbangat nen Pedro iray Kristianon manangidaulo a gawaen da iray kimey da tekep na kapaabebaan, ya agbalot pakakatawan ed karnero nen Jehova. (1 Pedro 5:2, 3) Say responsabilidad et aliwan lisensia pian magmaliw a mapaatagey. Diad kasunian, lalon mankaukolan na peteg a kapaabebaan so responsabilidad. (Lucas 12:48) Siempre, sayan kalidad so aglabat la makana ed saray manangasikaso noag diad amin a Kristiano.

²² Seguradon agbalot alingwanan nen Pedro imay labi sanen inurasan nen Jesus iray sali to, anggaman diad primero et agto inmabuloy! (Juan 13:6-10) Oniay insulat nen Pedro ed saray Kristiano: “Amin yo balkesan yoy inkasikayo na panagpaabeba, a manlilingkoran so sinansakey.” (1 Pedro 5:5) Say balikas a “balkesan yoy inkasikayo” so mangisusuheri ed pangibalkes odino pangibariber na sakey a lingkor na tapitapi pian gawaen so abeban kimey. Nayarin ipapanonot met ed sikatayo na sayan balikas imay agawa sanen imbalkes nen Jesus so tuwalya antis a tinmalimukor pian manguras na salisali. No tumboken tayo si Jesus, wala ta ni so inter na Dios a kimey a nipasen tayon mangipaabeba ed dignidad tayo? Nepeg a napatnagan na amin so kapaabebaan na puso tayo, a singano akabalkes itan ed sikatayo.

23, 24. (a) Akin a nepeg tayon ipulisay so antokaman a tendensian magmaliw a matangsit? (b) Tulongan itayo na ontumbok a kapitulo a nipetek so anton aliwan tua ya ideya nipaakar ed kapaabebaan?

²³ Say inkatangsit et singa samal, a saray epekto to et makaderal. Say matangsit a too, anggan sankaabilidaran la, et nayarin magmaliw ya andiay-kakanaan ed Dios. Diad biek a dapag, say mapaabeban too, anggan samay kamelmelagan la ed amin et nayarin magmaliw a mausa-usar ed si Jehova. No inagew-agew tayon bayuboan iyan mablin kalidad diad mapaabeban panggunaet a panumbok ed saray bakat nen Kristo, say tumang tayo et makapalikliket. Oniay insulat nen Pedro: “Mangabeba kayo sirin ed silong na makapanyarin limay Dios, pian itandoro to kayo ed kanepegan a panaon.” (1 Pedro 5:6) Seguradon intandoro nen Jehova si Jesus lapud sigpot ya impanpaabeba to. Naliketan met si Jehova a manumang ed sika lapud kapaabebaan mo.

²⁴ Makapaermen, ipapasen na arum a say pagmaliw a mapaabeba et sakey a tanda na inkaletey. Diad panamegley na ehemplo nen Jesus, natebek tayo ya aliwan tua itan ya ideya, lapud saray sankamapaabebaan a totoo so sankamakpelan met. Satan so singbaten ed ontumbok a kapitulo.