Anto So Kabaliksan na Impatey nen Jesus ed Sikayo?

“AMIN ya armadan nanmartsa, amin a nibin nipaalagey, amin a parliamenton yinmurong, tan amin ya ararin nanuley, pankakasakeyan, so ag-angapekta ed bilay na too ed tapew na sayan dalin a mabiskeg a singa ginawa na sayan sakey a solitaryon personalidad.” Ontan so insulat nen James A. Francis nipaakar ed si Jesu-Kristo.

Saray totoo so manmoria ed si Jesus ed nanduruman dalan, balet say Biblia so mangipabidbir ed sikato a bilang Anak na Dios tan sakey a toon walaan na managsakripisyon aro. Insita nen Jesus so manunan dalan diad impangipanengneng to ed ontan ya aro sanen inkuanto nipaakar ed inkasikato: “Say Anak na too so sinmabi, aliwan pian panlingkoran, noagta pian manlingkor tan pian iter to so kamarerwa to a dondon diad kasalat na dakel.”​—Mateo 20:28.

Anto so kabaliksan na sayan dondon? Akin a satan so nakaukolan? Siopa so arondon? Peteg, anto so kabaliksan ya impatey nen Jesus ed sikayo?

Anto’tan?

Say dondon so bengatlan mangibulos. Say panondon ed sakey et kabaliksan to so pangiliktar ed sikato a manlapud inkakautibo odino kadudusa diad pambayar na sakey a presyo. Diad espiritual a pantalos, “say panondon” et kabaliksan to so pangitarok na kililiktar a manlapud kasalanan tan say dusa to. Sikato no akin a si Jesus so inatey. A singa insulat nen apostol Pablo: “Say bayar na kasalanan et say patey, balet say langkap ya iter na Dios et say andi-anggaan a bilay diad panamegley nen Kristo Jesus a Katawan tayo.”​—Roma 6:23.

Say panondon a presyo so Makasulatan a nisiglaot diad pambayar na sakey a dondon. Ibabaga na Salmo 49:​6-9: “Saramay manmatalek ed pamaakaran na pansiansia ra, tan saramay mantutultuloy a mangipapangta ed inkadaakan na kayamanan da, anggapo ed sikara ed anggan anton pamaakaran so makayarin manondon ed anggan sakey ya agi, nisay niiter ed Dios so sakey a dondon ed sikato; (tan say panondon a presyo ed kamarerwa ra so mabmablin tuloy a satan so tinmunda ed ando lan ando) a sikato so nepeg a siansian manbilay na ando lan ando tan agto nanengneng so abut.” Say dondon so sakey a pananondon a ginawa na Dios, aliwan diad panamegley na anggan siopan ag-ayadyarin too.

Akin a Nakaukolan?

Say dondon so nakaukolan lapud say inmunan toon ama tayo, si Adan, so nankasalanan. Abalang to sirin so agmanganggan ayadyarin bilay, maptek ya asentensyaan na patey, tan kabekta et inatey. (Genesis 2:15-17; 3:1-7, 17-19; 5:5) Bilang kapolian to, atawir tayo so kasalanan tan patey. “Diad panamegley na sakey a too et say kasalanan so linmoob ed mundo tan say patey ed panamegley na kasalanan,” so insulat nen Pablo, “tan sirin say patey so linmaknab ed amin a too lapud sikaran amin so nankasalanan.” (Roma 5:12) On, “diad si Adan et amin so ompapatey.” (1 Corinto 15:22) Sirin duga so imbaga nen salmista David: “Diad kasulitan et siak so nianak ed kairapan, tan diad kasalanan et siak so innginew nen inak.”​—Salmo 51:5.

Say kililiktar a manlapud tutol na kasalanan tan patey so nakaukolan pian anggan siopan makasalanan a kapolian nen Adan so makaawat ed maandon bilay. Bangta saray ag-ayadyarin totoo so agmakayarin mangiter ed sayan dondon, si Jehova so simamaaron angiter ed satan diad panamegley nen Jesu-Kristo. Ingen, anto so asaliw ed dondon? Bueno, sanen nankasalanan si Adan, abalang to so andi-anggaan ya ayadyarin atooan a bilay, dingan na amin a kanepegan tan ilalo to. Sirin, say parehon bengatla so arondon diad panamegley na dondon bagat nen Jesus.

No Anto So Nanggawan Posibli

Say inkahustisya so apenek diad impanagmak na katooan ed patey, say dusa na kasalanan. Sirin say dondon so sakey a gawa na panangasi na Dios tan maaron-kaabigan. Say ayadyarin toon bilay nen Jesus, a dingan na amin a kanepegan tan ilalo to, so nigaton ed patey tan agbalot binawi, lapud sikato so ag-apaoli a bilang sakey a toon laman tan dala noagta bilang sakey ya imortal ya espiritun pinalsa. (1 Corinto 15:50; 1 Pedro 3:18) Say nibagat a toon bilay nen Jesu-Kristo sirin so nantultuloy a walaan na mananondon, odino pananondon, a pakayari.

Bilang andi-kasalanan a too, si Jesus so tinmalindeg ed posisyon a miulibay ed saman so orihinal ya inukupaan nen ayadyarin Adan. Diad kipapasen ton matulok ed Dios ya anggad patey, si Jesus so agawan Atagey a Saserdote, tan impresenta to so bili na ayadyarin atooan a bagat diad tawen. (Hebreos 9:24-26) Lapud sayan pananondon a presyo so inawat na Dios, nayarian nen Jesus a dondonen so mananisian kapolian nen Adan a manlapud kasalanan tan patey diad pangiyaplika ed merito na bagat to a nisesengeg ed sikara. (1 Corinto 6:20; 7:23; 1 Juan 2:1, 2) Sirin si Jesus so “nagmaliw ya oneebat ed andi-anggaan a kilalaban na amin na saraman so ontulok ed sikato.” (Hebreos 5:8, 9) Saya so manggawan posibli ed sikara so pakagamor na matunong a talindeg ed arap na Dios ed panamegley na Anak to.

Siopa So Arondon?

Siopa, sirin, so nagunggunaan ed dondon? Saray totoon mangagamil na pananisia ed sayan probisyon tan sirin onsabin mitunosan ed Dios. Diad panlingkor ed sikaton matoor, sikara so nayarin nabulos a manlapud kasalanan tan say dusa ton patey tan mangawat na maandon bilay.​—Juan 17:3.

Nayarian a desidien na inmunan too no kasin ontulok ed Dios odino andi. Pinili to so katutunganga. “Si Adan so ag-apalikdo,” noagta sikato so inatey a managgagalan makasalanan. (1 Timoteo 2:14) Ingen, kumusta iray kapolian nen Adan? Nayarian dan pilien so balanglan panlingkor ed Dios diad anggaan na nayarian da ed ag-ayadyarin abilidad da odino ontunganga ed Manamalsa ra.​—Josue 24:15.

Si Jesus so sinmabi “pian iter to so kamarerwa to a dondon diad kasalat na dakel.” (Marcos 10:45) Balet sioparay “dakel”? Si Adan so mapatnag a nipuera lapud sikato so sakey ya ayadyarin toon nanggagalan amili na ontunganga ed Dios tan inatey bilang agnagbabawi, managgagalan makasalanan. Balet kumusta so baleg a pamilya to, a manbilang na nilibulibon minilmilyon? Diad kasimbangan a presyo, tinalonaan nen Jesu-Kristo so atawir a kondenasyon ed pamilya nen Adan. (Ipareng so 1 Timoteo 2:5, 6.) Nisesengeg ed “dakel” a mananisia, inyaplika nen Jesus so merito na mananondon a bagat to.

Saray arondon a mananisia so angisakup ed saray Judios tan saray Hentiles, odino totoo na nasyones. Kuan nen Pablo: “A singa ed panamegley na sakey ya impakalukso a say nansumpalan ed amin a nengneng na totoo so kondenasyon, ontan met a diad panamegley na sakey a gawa na panamatunong a say pansumpalan na amin a nengneng na totoo et say kiyabawag dan matunong a para ed bilay.” (Roma 5:18) Diad impatey ed palitek, “si Kristo ed panamegley na impanaliw et imbulos toray [Judios] a manlapud ayew na Ganggan diad impagmaliw ton sakey ya ayew imbes a [sikara], lapud nisulat: ‘Naayew so balang toon nibitin ed palitek.’” (Galacia 3:13; Deuteronomio 21:23) Tutukoyen na Roma 4:11 iray Hentiles sanen inkuanto a manwarin si Abraham, ateng na saray Judios, so agni agalsiman, sikato so nagmaliw “ya ama na amin na saraman so walaan na pananisia legan ya ag-agalsiman.” Kanian, sirin, say dondon bagat nen Jesus so mangungguna ed mananisian Judios tan Hentil.

Say kurang ya inala na balang sakey so manitermina no kasin sikato so mangungguna a manlapud bagat nen Jesus. Singa si Adan, say managgagalan marelmeng so andian na merito na dondon tan maandon bilay a nipuersa ed sikara. A singa imbaga nen Kristo: “Siopaman a mangagamil na pananisia ed Anak so walaan na andi-anggaan a bilay; siopaman ya ag-ontulok ed Anak so agmakanengneng na bilay, balet say sanok na Dios so manayam ed sikato.” (Juan 3:36) Say dondon so manggawa met ed kioli a posibli a para ed saraman so inatey a walad pakanodnonotan na Dios. (Juan 5:​28, 29) No sikara so mansiansian matulok tan manamabli, say aplikasyon na saray gungguna na dondon ed sikara so mankabaliksan na pambilay dan ando lan ando. Balet para ed saraman so manbibilay ed sarayan “kaunoran ya agew,” wala so posibilidad na maandon bilay ya aglan balot mankaukolan na ipatey.​—2 Timoteo 3:1-5; Mateo 24:3-14, 21, 34; Juan 11:25, 26.

Saray Rason na Pisalsalamat

Siopaman a manpilalek a mangungguna ed dondon so nepeg a nawalaan na aralem ya apresasyon ed satan. Tan agaylan matukoy so ontan a pisasalamat! Tutal, say dondon so nankaukolan na daakan ya aro ed biang na Dios tan si Kristo.

Impanengneng nen Jehova a Dios so baleg ya aro diad impangitarya to ed dondon ed panamegley na impatey na Anak to. Inkuan nen Jesus: “Ontan la so impangaro na Dios ed mundo [na katooan] ya inter to so bogbogtong ya Anak to, ta pian siopaman a mangagamil na pananisia ed sikato so nayarin agnaderal noagta nawalaan na andi-anggaan a bilay. Ta imbaki na Dios so Anak to ed mundo, aliwan pian ukomen to so mundo, noagta pian say mundo so nilaban ed panamegley to.” (Juan 3:16, 17) Agta nepeg yon apresyaen iyan inkipatnag na aro na Dios?

Isipen pan malaknab so nipaakar ed kaaralem na panangaro nen Jehova diad impangitarya to ed dondon. Sakbay a say Anak na Dios so nibaki ed dalin a manbilay tan ompatey bilang ayadyarin too, sikato so walaan na sakbay-inkatoon kiwawala. Sikato “so panguloan ed amin a pinalsa,” a diad panamegley to et “amin nin arum a bengatla so apalsa ed katawenan tan diad tapew na dalin, saray bengatlan nanengneng tan saray bengatlan agnanengneng.” (Colosas 1:13-16) Agaylan inaro nen Jehova so Anak to! Anggaman kuan, say Dios so ag-angibaki ed basta anggan siopa ed nilaksalaksan matunong ya angheles ed dalin. Say panangaro to ed katooan so abalbaleg ya imbaki to so panguloan ya Anak to.

Imanoen, met, so aralem a panangaron impanengneng nen Jesus a nisiglaot ed dondon. Bilang sakey ya espiritun pinalsa ed tawen, sikato so “uloen a komikimey” na Dios. Tua, “saray bengatlan nanliketan [na Anak na Dios] et diad saray anak na totoo.” (Uliran 8:22-31) Ingen, aliwan mainomay ed sikato so panaynan ed tawen, a tekep na sankamapalaboan iran sirkumstansya diad pikakasakey ed Ama to tan diad pigamplon libulibon matunong ya angheles. Manlapud mangatatawen a pasen, say Anak na Dios so makayarin makanengneng ed saray mauges a kipapasen ed dalin tan say deral na kasalanan tan patey ed katooan. Amta to met a say pangitarya ed dondon et mankaukolan na ipapatey. Ingen, “inala to so indengan na sakey ya aripen tan nagmaliw a wala ed inkapadpara na totoo. Nagkalalo nen say satan, . . . impaabeba to so inkasikato tan nagmaliw a matulok ya anggad patey.” Nisesengeg ed ontan a katooran, si Jesus so apaoli ed maglorian mangatatawen a bilay. (Filipos 2:5-11) Agaylan aron impanengneng to nipapaakar ed dondon! Kasin apresyaen yo so ginawa nen Jesus?

Anto So Gawaen Yo?

Say obispon Ingles a si Richard na Chichester (c. 1198-1253) so aminsan ya angipikasin saray lalaki tan bibii so nayarin onsabi “a makaamta ed si Jesu-Kristo a lalon malinew, a mangaro ed sikaton lalon mabmabli, tan manumbok ed sikaton lalon asingsingger.” Say dondon bagat nen Jesus so peteg a mangitarya ed sakey na maabig a rason a mangamta, mangaro, tan manumbok ed sikato.

No aliwan nisesengeg ed dondon, bilang makasalanan et sikatayo so ompatey ya andian na ilalo, lapud “say ot-ot a mamawala na patey et say kasalanan.” (1 Corinto 15:56) Kanian, pian niliktar a manlapud pansumpalan a patey lapud sikayo so pinautot na kasalanan, sirin, anto so nepeg yon gawaen? Nakaukolan yon aralen so nipaakar ed probisyon na Dios a para ed kilalaban diad panamegley nen Jesu-Kristo. Insan nepeg yon ipatnag ya aagamilen yo so pananisia ed dondon. Panon? Diad pangipanengneng na impapuson apresasyon ed satan, ya idebotom so inkasika ed Dios, tan ibaga ed arum so nipaakar ed sayan makapakelaw a probisyon ed kilalaban.

Sayan kurang so makapangipasen ed sika ed limog na “baleg ya ulop” a “pinmaway ed baleg a kairapan, tan . . . ya anguras ed saray kawes da tan pinaputi da ra ed dala na Kordero,” si Jesu-Kristo. (Apocalipsis 7:9, 14) Say wala ed sikara et say ilalo ed maandon bilay diad mangaraldalin a paraiso. (Lucas 23:43) On, tan makapagmaliw kan kabiangan na satan a maliket ya ulop, no say impatey nen Jesus so peteg a bengatlan mabli ed sika.

[Litrato ed pahina 4]

Say andi-kasalanan a Jesus so tinmalindeg ed posisyon a miulibay ed saman so orihinal ya inukupaan nen ayadyarin Adan

[Litrato ed pahina 6]

Kasin apresyaen yo so peteg a kabaliksan na impatey nen Jesus?