Siopay Papaboran na Dios?

AMIN tayo so malabay a kaliktanen na saray kalimog tayo. Parad sakey a Kristiano, say nagkalalon mabibiskeg a pilalek et say pananap ed pabor na Dios. Nipaakar ed si Jehova a Dios, ikuan na Salmo 84:11: “Si Jehova so mangiter na gracia [pabor, NW] tan gloria; angapo so maong a bengatlan isiblet to ed saraman so manakar a mapmaptek.” Diad inkiyanak nen Jesus, say magayagan kelyaw na mangatatawen ya anghel so angisipan na “deen ed dalin parad totoon papaboran to!”​—Lucas 2:14, Moffatt.

Balet sioparay papaboran na Dios? Kasin mipadpara iray estandarte na Dios ed too? Natalosan ya andi, unong a nipanengneng diad asingbat ed akaunan artikulo. Diad tua, lapud saray Kristiano so sisimbawaen ya “aligen [da] . . . so Dios,” nayarin maabig ya itepet na balang sakey ed sikatayo, Kasin papaboran koray totoon papaboran na Dios, odino kasin onkiling ak a manumbok ed saray minumundon estandarte diad panangukom ko ed totoo? (Efeso 5:1) Pian nagamoran so pabor tan abobon nen Jehova, nepeg a manalwar itayon nengnengen iray bengatla unong ed punto de bista to.

Atagtagey Iran Estandarte na Dios

“Say Dios angapo so pangiduma to,” inkuan nen apostol Pedro, “no ag ingen dia ed balang nacion akuen to so antakot ed sikato tan mangawa na matunong.” Niarum ni, tinasian nen apostol Pablo a say Dios “dia ed saksakey a too ginawa to a pansengegan na amin a naciones.” (Gawa 10:34, 35; 17:26) Sirin, makatunongan lambengat a panampoten, ya amin a totoo so parpareho ed arap na Dios anggan anto so pisikal iran itsura ra. No ontan, agmatukoy ed Kristianon paboran to so sakey lapu lambengat ta sikato so nanlapu ed partikular a pasen odino ed kolor na baog odino ed sananey a rasa. Imbes, maabig a tumboken to so Uliran ton Jesu-Kristo, a nipaakar ed sikato et inaksobi ni ingen na kakabusol ton sikatoy ag-angipanengneng na panangiduma.​—Mateo 22:16.

Say balikas ya “ataptapew” so no mamisan et uusaren a maneskribe ed bengatlan palaway odino ag-importanti. Say kolor na baog so singa ontan; satan so ataptapew lambengat. Say kolor na baog na sakey a too so agbalot mangisindag ed personalidad to odino ed akindalem iran kalidad. No nipaakar ed panpili na totoon pilimogan, piakanan, odino pipasamanoan, maseguro komon ya agtayo onnengneng a partikular ed kolor na baog. Tandaan, say marikit ya anginspira ed pigaran sankarakpan tan romantikon anlong a nisulat so nankuan nipaakar ed inkasikato: “Andeket ak, balet malimgas ak, . . . kayomangi ak, lapu ed say banwa tinektek to ak.” (Kanta nen Solomon 1:5, 6) Aliwan say rasa nisay kolor so mamorma na dugan basiyan ed pangipanengneng na pabor. Nagkalalon importanti et no kasin tatakotan na too so Dios tan mankikimey ed inkatunong.

Panon so liknaan na Dios nipaakar ed pankayarian na materyal a kayamanan? Diad amin a totoon aaroen tan papaboran na Dios, say Anak to, si Jesu-Kristo, so manunaan. Ingen, sanen wadiad dalin, si Jesus et “angapo’y pangisaralan to na olo to.” (Mateo 8:20) Sikatoy andian na dalin, ayaman, uma, manbubungan kiew, odino ayayep. Siansian sikato so inggalang tan intandoro nen Jehova ed kipapasen a mas atagey diad amiamin a walad talba nilikud ed Dios a mismo.​—Filipos 2:9.

Agamoran nen Jesu-Kristo so pabor na Dios aliwan lapud sikato so mayaman ed materyal a bengabengatla noagta diad maabig a kimkimey. (Ipareng so 1 Timoteo 6:17, 18.) Sinimbawa toray patumbok to: “Ag kayo mantipon a nipaakar ed sikayo na kaykayamanan ed tapew na dalin, a sikara’y deralen na saray bokbok tan lati, tan sikara’y kotkoten tan takewen dia na saray matatakew: Noag say mantipon kayo a nipaakar ed sikayo na kaykayamanan ed tawen, ya diman ag deralen na saray bokbok tan lati, tan diman ag kotkoten tan ag takewen na saray matakew.” (Mateo 6:19, 20) Kanian, imbes a paboran labat iramay mayaman ed minumundon bengabengatla, agmangibiig iray Kristiano diad basiyan na minumundon kaykayarian. Anapen daramay mayaman ed Dios balanglan sikaray mayaman odino duka ed materyal a dalan. Agbalot lilingwanan a “pinili Dios so saray duruka ed sayan mundo a mayaman ed pananisia, tan tomatawir na nanarian.” (Santiago 2:5) No pansiansiaen yo so punto de bista na Dios, agkayon balot napelag ed kalot na kaslakan ya ag-agamil na panagpabor tan panagsipsip ed say mayaman.

No nipaakar ed edukasyon, malinew ya ipapanengneng na Biblia a sisimbawaen itayo na Dios ya anapen so pikakabat tan kakabatan tan si Jesu-Kristo so sankabalgan a managbangat diad dalin. (Uliran 4:7; Mateo 7:29; Juan 7:46) Balet aliwan say minumundon kakabatan odino edukasyon so sengegan a paboran itayo na Dios. Diad kasuniyan to, ibabaga ed sikatayo nen Pablo ya “aliwan dakel ed makabat diad silalaman a dalan so atawag, . . . balet pinili na Dios iray bengatlan makulangkulang ed mundo, pian onkanan pamabaing to ed saray makabat.”​—1 Corinto 1:26, 27.

Papaboran na Dios iramay edukadon tuloy, aliwan ed sekular iran asignaturan ibabangat ed saray institusyon na atagtagey ya aral, noagta diad “puron lenguahe” na katuaan a naromog ed Salita to, say Biblia. (Sofonias 3:9) Diad tua, si Jehova a mismo so mangibabangat ed totoo to natan diad panamegley na edukasyonal a programa ya onlaknab ed sankaarawian iran kabiangan na dalin. Unong ya impropesiya nen propetan Isaias, onkikiwas so totoo ed amin a nasyones diad pangibabagan: “Ontatdang itayo ed palandey nen Jehova, ed abung na Dios nen Jacob; ta ibangat to itayo ed saray dalan to, tan manakar itayo dia ed saray basbas to.” Sirin, imbes a galgalangen so sekular ya edukasyon, anapen na saray Kristiano iramay mamaneknek diad saray salita tan gawa ra a peteg a “nibangat ira ed Jehova.” Diad panggawa ed satan, pangayagaan da so ‘baleg a deen’ ya iter na Dios.​—Isaias 2:3; 54:13.

Nagamoran Tayo so Pabor na Dios

On, saray estandarte na Dios ed pangipanengneng na pabor ed arum so duman tuloy ed too. Anggaman kuan, nepeg a pambanikelan tayon paiwanwan ed saray dalan to no labay tayon gamoran so pabor ed saray mata to. Kabaliksan na satan a sikatayo so nepeg a mangipasen ed arum unong ed punto de bista na Dios tan aliwan diad saray estandarte na too, unong ta saratan so nayarin naimpluensyaan na inkasiblet tan panangidumaduma. Panon tayon nagawaan itan?

Uusisaen nen Jehova a Dios so puso na sakey a too tan papaboran toramay mangipapanengneng na saratan a kalidad a singa say aro, kamaongan, kaabigan, tan andukey a panagtepel. Nepeg met ya aligen tayo. (1 Samuel 16:7; Galacia 5:22, 23) Nepeg a nengnengen tayo so akindalem ya inkatoo, diad laknab a nayarian tayon gawaen bilang totoo, tan aliwan ed kolor na baog odino nasyonalidad to. Imbes a pilien iramay mayaman ed materyal a bengabengatla, maabig ya ipaslep tayo ed kanonotan so panmoria na Dios ed saray kayamanan tan panggunaetan so pagmaliw a “mayaman . . . ed saray maabig a gawa, a managpalangkap, a mainomay a mangiter.” (1 Timoteo 6:18) Pian nagamoran so pabor na Dios, nepeg ya itultuloy tayon anapen so suston pikakabat ed Dios tan ed Anak to, si Jesu-Kristo, a magmaliw ya edukadon tuloy ed puron lenguahe na katuaan. (Juan 17:3, 17) Diad panggawa ed satan et magmaliw tayo met a kaiba na saramay paboran na Dios.