Akin a Magmaliw a Manamerdona?

DINESKRIBEN aminsan na iskolar tan managsulat a si Joseph Jacobs so panamerdona bilang “say sankatagyan tan sanka-irapan ed amin a leksyon ed moral.” On, talagan naroromog na dakel a mairap a tuloy so pangibagan “perdonaen taka.”

Ompatnag a say panamerdona so miulibay ed kuarta. Saya so nayarin sibubulos tan sipapangasi a gastosen ed arum odino nayarin saya so sikukuripot ya isiblet parad sarili. Say akauna et say maridios ya ugali. Bayuboan tayo so sibubunlok a panaggastos ya ugali no nipaakar ed panamerdona. Akin? Lapud ipapaseseg iya na Dios tan lapud say agmamerdona, manangibales ya espiritu et palooren toray pamaakaran.

Mabetbet a narerengelan iray salitan: “Agak mamapasnok; ombawi ak labat!” Makapa-ermen, sayan balikas so manangiwanwan a prinsipyo ed bilay na dakel natan. Alimbawa, sakey a bii so ag-inmabuloy a mitongtong ed ayro to ed loob la na masulok a pitoy taon lapud, unong ed ibabaga na bii, “baleg so kasalanan to’d siak tan agko naperdona anggad kapigan.” Balet saman ya andi-esel a tratamento, sano inusar a paraan pian piliten so aakusaan ya onkerew na despensa odino bilang sakey ya armas pian manusa, so mataltalag a mamenek ed pilalek ya ombawi. Imbes, satan so mamabayag ed irangan, ya aabuloyan itan ya onsabi ed panimbel. No sayan panpapasakitan so agnapatunda, say agnaamper ya ibawi so maneral ed saray siglaotan tan anggan say bunigas na sakey.

Say Kaugsan na Espirituy Agpamerdona

Sano say sakey so agmamerdona, say nansumpalan a gutgutan so mamawala na gonigon. Say gonigon met so nayarin mansumpal ed seryoso iran beblay. Onia so insulat nen Dr. William S. Sadler: “Anggapo so sigpot a makaapresyan tuloy ya aliwan singa say doktor ed makapakelkelaw a kinarakel na sakit tan panirap na too a direktan natonton ed panaburido, takot, irangan, . . . agmabunigas a panagnonot tan marutak a panagbilay.” Balet, diad tua, kaunongay kabaleg na deral a nagawaan na sakit ed emosyon? Onia so ebat na sakey a palapagan ed medisina: “Say istatistika . . . so mangipapanengneng a duaran kakatlo na saray pasyente ya ompapanon ed sakey a doktor so walaan na saray sintoma a sengegan odino pina-loor na gonigon ed isip.”

On, say inka-pait, imbel na linawa, tan ingongot so makaderal. Sarayan makaderal ya emosyon so singa lati a kalnakalnan mangopot ed kaha na sakey a kotse. Say itsuray kotse ed paway so singano marakep, balet diad dalem na pintora to et nadederal.

Nagkalalon importanti, say pangipulisay tayon mamerdona sano wala so basiyan na panangasi so maneral met ed espiritualidad tayo. Diad imaton nen Jehova a Dios, ompan mipara itayo ed aripen diad ilustrasyon nen Jesus. Say aripen so pinerdona na katawan to ed balbaleg ya otang to. Ingen, sanen say kapara ton aripen so akikasin perdonaen ed melmelag ya otang to, sikato so maruksa tan agmamerdona. Impalinew nen Jesus a no sikatayo so agmabulos a mamerdona, ipulisay nen Jehova so pamerdona ed saray kasalanan tayo. (Mateo 18:21-35) Kanian, no sikatayo so agmamerdona, ompan nabalang tayo so malinis a konsiensia tayo ed arap na Dios tan anggan say ilalo tayo ed arapen! (Ipareng so 2 Timoteo 1:3.) No ontan, anto sirin so nagawaan tayo?

Aralen so Mamerdona

Say tuan panamerdona so manlalapud puso. Lalanoren to so pamerdona ed lingo na nankasalanan tan pangiwaklit ed antokaman a pilalek ya ombawi. Sirin, say pinal ya inka-hustisya tan posiblin pananusa so ipipia ed saray lima nen Jehova.​—Roma 12:19.

Anggaman ontan, nepeg a tandaan a lapud “say puso manamalingo alabas nen saray amin a bengatla, et sikato so mapalalo a mauges,” saya so aliwan naynay ya onkiling a mamerdona anggaman satan so manepeg a gawaen. (Jeremias 17:9) Inkuan a mismo nen Jesus: “Dia ed puso so pawayan na saray mauges a nonot, panagpatey, saray pikakalugoran, saray panaglawan, saray panagtakew, panagtasi ed aliwa’n tua, saray mabanday a salita.”​—Mateo 15:19.

Maong ta say puso tayo so nayarin nipasal a manggaway maptek. Anggaman ontan, say panangipasal a kaukolan tayo so nepeg a manlapud atagtagey a lapuan. Agtayo nagawaan itan a bokbokor. (Jeremias 10:23) Sakey ya apuyanan a salmista so mamibidbir ed saya tan nampikasi parad panangiwanwan na Dios. Sikatoy kinmerew ed si Jehova diad pikakasi: “Ibangat mo ed siak so saray panangitontonan mo. Gawa moak a makatalos ed dalan na saray bilin mo.”​—Salmo 119:26, 27.

Unong ed sakey nin salmo, si Arin David na kadaanan ya Israel so ‘akatalos ed dalan’ nen Jehova. Naeksperiensia to iman a direkta tan akaaral nanlapulad saman. Kanian, nibaga ton: “Si Jehova mapangasi tan magracia, mabanayar a manpasnok tan daakan ed panangasi, Unong a say sake’ ya ama abageyen to so saray anak to, ontan met nen Jehova abageyen to so saray ontakot ed sikato.”​—Salmo 103:8, 13.

Kaukolan itayon manaral a singa ed ginawa nen David. Sipipikasin aralen so ayadyarin alimbawa na panamerdona na Dios, ontan met ed Anak to. Diad ontan et naaralan tayo so mamerdona manlapud puso.

Ingen, nayarin itepet na arum: Komusta so nipaakar ed seryoson kasalanan? Kasin amin a kasalanan so kaukolan a perdonaen?

Pagmaliw ya Asimbang

Sano say sakey a too so ginawaan na seryoson kasalanan, say ot-ot so masyado. Nagkalautla iya no say sakey so inosentin biktima na seryoson kasalanan. Arum so nayarin manumameng, ‘Panon kon perdonaen so sakey ya agaylan-uges ya angitapat tan pinasakitan toak?’ Diad kaso na graben kasalanan a mankanepegan na pakadespilosipan, say biktima so nayarin mankaukolan a mangiyaplika ed simbawa na Mateo 18:15-17.

Diad antokaman a kaso, mandependin tuloy itan ed nankasalanan. Nanlapulad impanggaway-mauges, wala ta so antokaman a pakanengnengan na masimoon a panagbabawi? Kasin say managkasalanan so anguman, anganko ta sinali ton manggawa na peteg a panametek ed impakalukso to? Diad imaton nen Jehova say ontan a panagbabawi so tombok ed pamerdona anggad diad kaso na talagan makapataktakot iran kasalanan. Alimbawa, pinerdona nen Jehova si Manases, sakey ed saray sankarelmengan ya arari ed awaran na Israel. Diad anton basiyan? Ginawa itan na Dios lapud diad kaunoran et si Manases so nampaabeba tan nampataoli ed saray mauges a dalan to.​—2 Awaran 33:12, 13.

Diad Biblia say tuan panagbabawi et lalanoren to so masimoon a panamasimbalo ed awawey, impapuson panermen ed antokaman iran ginawan mauges. No matukoy tan posibli, say pagbabawi et lalaktipen to so gunaet a bayaran so kasalanan ed nankasalananan. (Lucas 19:7-10; 2 Corinto 7:11) No anggapo so ontan a panagbabawi, si Jehova so agmamerdona.a Niarum ni, ag-iilaloan na Dios iray Kristiano a mamerdona ed saramay datin aliwawaan ed espiritual balet ta natan et sigagala, ya agmagbabawin mangagamil na gawan-mauges. (Hebreos 10:26-31) Diad alablabas iran kaso, say panamerdona so agmatukoy.​—Salmo 139:21, 22; Ezequiel 18:30-32.

Balanglan posibli odino andi so panamerdona, say sakey a biktima na seryoson kasalanan so nayarin malabay a mangunsidera ed sananey nin tepet: Nepeg tan mansiansia so seryoson sakit ko ed emosyon, a liknaen ya alablabas ya asakitan tan asanokan, anggad say pamaakaran so kompleton aresolbi la? Kunsideraen so sakey ya alimbawa. Si Arin David so asakitan a tuloy sanen pinatey nen heneral ton Joab si Abner tan Amasa, “duaran lalaki a lalo a matunong tan magmaong nen sikato [Joab].” (1 Arari 2:32) Imbalikas nen David so inkasanokan to tan andi-duaruwa ed pikakasi ed si Jehova. Balet, diad inlabas na panaon, maseguron say alabas a sanok nen David so kinmepa. Sikato so ag-atalonaan na sanok anggad sampot na bilay to. Si David so nantultuloy ni ingen ya akikimey a kaiba nen Joab, balet agto basta penerdona iyan agmagbabawin kriminal. Sineguro nen David ya ontalona so inka-hustisya.​—2 Samuel 3:28-39; 1 Arari 2:5, 6.

Ompan kaukolan so pigaran panaon tan sagpot sakbay a natalonaan na saramay asakitan na seryoso iran kasalanan na arum so inmunan sanok da. Say proseso na iyaabig so nayarin mas-mainomay sano say nankasalanan so mangaksobi ed akalingoan to tan magbabawi. Anggaman ontan, say anggapoy-amtan biktima na kasalanan so nepeg a makaromog na ligliwa tan pakainawaan ed pikakabat to ed inka-hustisya tan kakabatan nen Jehova tan diad Kristianon kongregasyon, antokaman so ikiwas na managgaway-kasalanan.

Bidbiren met, sano perdonaen moy managkasalanan, agkabaliksan na saya a kokondenaen moy kasalanan. Parad Kristiano, say panamerdona et kabaliksan to so sitatalek a panangipia na pamaakaran ed saray lima nen Jehova. Sikato so matunong ya Ukom na amin a talba, tan sikato so mangipakseb na inka-hustisya ed dugan panaon. Ilaktip na satan so pangukom ed “saray [mapalikdon] managlawan tan saray mankakalugoran.”​—Hebreos 13:4.

Saray Gungguna na Pamerdona

Say salmistan David so nankanta: “Ta sika, Katawan [Jehova, NW], maong ka tan maparaan ka a mamerdona, tan napnapno ka na maaron abig na linawa ed amin na saray ontawag ed sika.” (Salmo 86:5) Kasin sika, singa si Jehova, so ‘akaparaan a mamerdona’? Dakel iray gungguna.

Unona, say pamerdona ed arum so mamapalesa na maabig iran siglaotan. Papasesegen na Biblia iray Kristiano: “Manaanusan kayo ed sakey tan sakey, mapangasi, manpiperdonaan so sakey tan sakey, a singa met say Dios pinerdona to kayo ed Cristo.”​—Efeso 4:32.

Komadua, say panamerdona so mangitatarok na kareenan. Aliwa lambengat iyan kareenan ed baetan na kaparan totoo noagta diad akindalem met a kareenan.​—Roma 14:19; Colosas 3:13-15.

Komatlo, say pamerdona ed arum so ontutulong ed sikatayon natandaan a sikatayon mismo so mankakaukolan na panamerdona. On, “amin nankasalanan, tan makulang ira ed gloria na Dios.”​—Roma 3:23.

Kaunoran, say pamerdona ed arum so mangiiter na dalan pian perdonaen na Dios iray kasalanan tayo. Inkuan nen Jesus: “No perdonaen yo ’ray totoo ed kaugsan da, say Ama yo’n mangatatawen perdonaen to kayo met.”​—Mateo 6:14.

Isipen pa so dakel a bengatlan maseguron walad kanonotan nen Jesus diad ngarem na ipapatey to. Sikato so mapaga nipaakar ed saray babangatan to, say kimey a panagpulong, tan nagkalautla ed katooran to’d si Jehova. Ingen, anggaman maniirap a tuloy ed panamairapan a kiew, anto so imbaga to? Kabiangan na saray kaunoran a salita to et, “Ama, perdonam ira.” (Lucas 23:34) Nayarian tayon aligen so nagnap ya alimbawa nen Jesus diad pamerdona ed balang sinansakey manlapud puso.

[Paimano ed leksab]

[Saray litrato ed pahina 5]

Atalosan mo ta so punto na ilustrasyon nen Jesus nipaakar ed agmanamerdonan aripen?

[Saray litrato ed pahina 7]

Say pamerdona ed arum so mamapalesa na maabig iran siglaotan tan mangitatarok na liket