Report na Saray Manangiyabawag na Panarian

Panagpulong ed Magulon Panaon

IMPASAKBAY nen apostol Pablo a “dia ed saray kaonoran ya agew onsabi so saray panaon a maatap [a mairap a pidenengan].” (2 Timoteo 3:1) Agaylan apaneknekan a tua iratan a salita! Abayag lan nasasagmak na totoo ed El Salvador ed Sentral Amerika so ampait a kapetegan na saya. Diad loob na masulok a sakey a dekada, satan a bansa so atalonaan na guerra sibil ya angitarok na sinagem tan ipapatey ed nilibon totoo. Asumpal la natan iman a bakal, balet mansiasiansia ni kairapan. Biglan dinmakel so krimen kayari bakal. Diad agano ni et inkuan na sakey a komentarista na telebisyon: “Say karawalan tan takewan so singano tagano tayo la ed inagew-agew.”

Apektado met iray Tasi nen Jehova ed sayan daluyon na saray krimen. Nilooban na saray matakew so dakel a Kingdom Hall tan inala iray kagawaan ed sound. Aminpigan saray grupo na armadon tobonbalo so linmusob ed saray Kingdom Hall kaleganay Kristiano iran miting, a nantakew na kuarta, saray relo, tan arum niran ankablin bengatla manlapud saray onaatendi. Legan a susumpalen daray inagew-agew ya aktibidades da, pigaran Tasi so pinatey na saray matakew.

Anggaman ed sarayan babeng, saray Tasi nen Jehova ed El Salvador so mantutultuloy a mamapasyan mangipulong na maong a balita. Gagawaen da iya bilang katutulok ed makasulatan a ganggan: “Say evangelio kaokolan ya nipulong ya unona ed saray amin a naciones.” (Marcos 13:10) Dakel ni ed sayan dalin so manpipilalek ed ilalo na Panarian ya iyoopresi na Biblia, tan panbabanikelan na saray Tasi a sabien so balang sakey ed sikara. Napapaneknekan ya epektibon paraan na panagpulong so impormal a panagtasi.

Legan a manpapatambal ed sakey ya ospital, inusar na sakey a Tasi so amin a pankanawnawa pian katongtongen so arum a pasyenti nipaakar ed saray sipan na Dios ed arapen, a singa say naromog ed Biblia. Onia so intagleey na sakey a graben pasyenti: “Asingger ak lan ompatey!” Balet say maermen ya awawey na pasyenti so ag-anismaya ed Tasin mangipanabang ed maong a balita na Panariay Dios. Imbes, sikatoy nambasan maksil parad laki manlapud libron Makapambilay Kayo na Ando lan Ando ed Paraiso diad Dalin, ya impalapag na saray Tasi nen Jehova. Kalabas na pigaran agew, pinmaway ed ospital so Tasi, a maermen a mannononot nipaakar ed toon asingger lan ompatey.

Apatiran taon ed saginonor say Tasi so kaukolan a manpatambal ed sananey ya ospital. Legan a wadman, inmasingger ed sikato so sakey a pasyenti tan nankuan: “Natandaan mo ak ni?” Saman imay lakin akabat to apatiran taon ed apalabas, saman imay lakin ompatey la lawari! Agaylan magayagan surpresa sanen sikatoy nilakap na laki tan imbaga nin: “Natan et sakey ak lan Tasi nen Jehova!” Inawat na laki so ilalon iyoopresi na Biblia nipaakar ed arapen, nanaral na Biblia a kaibay Tastasi nen Jehova, tan indedika toy bilay to ed si Jehova. Sikato so aglambengat sakey a Tasi noagta sikatoy mibibiang ed sigpot-panaon a ministeryo bilang regular pioneer a ngalngalin manduay taon la.

Diad sayan kaso, saray bini na katuaan ya intanem ed sakey ya impormal a paraan so akasabi ed sakey a manamablin puso. Sayan pribilihyon itulong ed totoo a makaaral na katuaan so mamapakiwas ed saray tuan Kristiano pian ituloy so panagpulong a kimey, anggaman ed sarayan “panaon a maatap a mairap a pidenengan.”