Antoy Gungguna ed Paningbat Nipaakar ed Relihyon?

PIUGAGEP na atateng ya alagden iray unaan a balikas ya ibesngaw na kapangiyanak da. Sano narengel da so naulit a naamil a silaba, anganko “Mama” odino “Dada,” panliketan da itan. Tampol dan ibalita iya ed kaaro tan kaabay. Saray ununan salita na kapangiyanak so talagan makapaliket a maong a balita.

Saray tanol, nenengnengen, tan saray samyong a nalikas na saray liknaan na ugaw so managdag ed sikaton onkiwas. Siempre, nandurumay ikiwas. Balet no, kayari pigaran panaon et ag-onkiwas so kapangiyanak ed sarayan panamasagyat, manepeg lambengat a panaburidoay atateng a nayarin walay depektoy aligwas na anak da.

Labalabay na saray kapangiyanak so totoon kabat da. Sano aampopoen na ina so kapangiyanak, gendagendat ya oniimis iya. Anggaman ontan, say kidwit na ombibisitan kanayon so nayarin pansengegay iyakis to, ya ag-anggan ingen paampopo. Maslak ed kakanayon a makakaeksperiensia ed saya so ag-ontunda. Legan a sikaray nakakabisado na kapangiyanak, naliliketan ira sano anggapo lay samben na pagmaliw ya agkabkabat, tan kalkalnan onimis so kapangiyanak.

Mipadpara, masuyat so dakel a wala la’d suston edad ya itongtong iray relihyoson sisiaen da ed sakey ya agda kabat a tuloy. Nayarin agda natalosan no akin a kaliktan na sakey ya agkabkabat a pantongtongan so nipaakar ed personal a pamaakaran​—say relihyon. Say resulta et aabuloyan dan niwalay samben ed baetan da tan saramay manotongtong nipaakar ed Manamalsa. Agda ni ingen labay a pantongtongay nisipor a kualidad na sankatooan, say pilalek a mandayew.

Diad tua, magmaliw tayon interesadon makaaral nipaakar ed Manamalsa tayo, tan say pangitongtong ed arum so mangipasen ed sikatayon makaaral. Tua itan, lapud say Dios so abayag lan nisisiglaot ed lukas a pitatalosan. Nengnengen tayo no panon.

‘Ontalineng tan Manaral’

Say inmunan impitalosan na Dios ed too et diad si Adan ed tanamanan na Eden. Ingen, kayari impankasalanan di Adan tan Eva, mas nilabay day onamot sanen tinawag ira na Dios, sanen labay toy mitongtong ni malaglaem ed sikara. (Genesis 3:8-13) Anggaman ontan, inrekord na Biblia iray detalye na lalaki tan bibiin angapresya ed pitatalosan ed Dios.

Akitalosan so Dios ed si Noe nipaakar ed manasingger a kadederal na marelmeng a mundo ed agew to, a nagmaliw si Noe a “managpulong na katunongan.” (2 Pedro 2:5) Bilang sangiyan na Dios ed kailalakan to, aglambengat angidemostra na pananisia si Noe ed saray pidedeneng na Dios ed too, noagta mapublikon inyabawag to met so inkasikaton walad dapag nen Jehova. Anton kiwas so naimatonan nen Noe? Makapaermen, maslak ed kapanaonan to so “ag da akabkabatan anga ed sinmabi’ delap, et iyanor to ra ya amin.” (Mateo 24:37-39) Balet maong labat parad sikatayo, ta pitoran membro na pamilya nen Noe so tinmalineng, tinmulok ed saray bilin na Dios, tan akaliktar ed sankagloboan a Delubio. Sikaray nanlapuan na amin a totoon manbibilay natan.

Saginonor, akitalosan so Dios ed interon nasyon, say kadaanan ya Israel. Diad panamegley nen Moises, inter ed sikara na Dios so Samploran Ganggan tan ag-onkulang ya 600 niran kaukolan met ya unoren a ganggan. Inilaloan nen Jehova ya amin iratan so tuloken na saray Israelita. Inderihe nen Moises a kada komapiton taon, legan na tinaon a Piesta na saray Kobongkobong et kaukolan a basaen a maksil so Ganggan na Dios. “Pantitipon mo naani totoo,” imbilin to, “saray lalaki tan bibii, tan saray ankelag tan say sangkailim ya wala ed loob na saray polongpintom.” Parad anton gagala? “Ta pian narengel [talinengen, NW] da tan natombok [aralen, NW] da tan ontakot ira ed Jehova a Dios yo, tan sumpalen da a gawaen so saray amin a salsalita na kaptekan.” Amin so kaukolan ya ontalineng tan manaral. Isipen pay agaylan gayaga ran paningbat ed nadngelan da!​—Deuteronomio 31:10-12.

Masulok a limaran siglo ed saginonor, inorganisa na ari na Juda a si Josafat, iray prinsipe tan saray Levita ed sakey a kampanyan pangibangon ed puron panagdayew ed si Jehova. Nambaroy irayan lalaki ed amin a syudad na Juda legan a babangatan iray mibabaley ed saray ganggan nen Jehova. Diad pananingbat ed saraya diad publiko, indemostra na ari so inkakpel to parad tuan panagdayew. No nipaakar ed saray sakop to, sikaray kaukolan ya ondengel tan manaral.​—2 Awaran 17:1-6, 9.

Pantasi Diad Panamegley na Tongtongan

Imbaki na Dios so dilin Anak to, si Jesus, ed dalin pian onkanan Sangiyan To. (Juan 1:14) Legan a natatasian na taloran babangatan so impanguman nen Jesus ed nengneng ed arap da, nadngel da so mismon boses na Dios a mangiyaabawag: “Sikatoya so inarok ya Anak, a sikato’y panliketan ko’n maong; sikato so dengelen yo.” (Mateo 17:5) Sikaray mabulos a tinmulok.

Mipadpara, impaiyabawag nen Jesus ed apostoles to iray gagala na Dios ed arum. Balet sanen ngalngalin anem bulan lay nakekeraan ed ministeryo’d dalin, impakabat nen Jesus a say kimey na panagpulong na Panariay katawenan so ontanlan malaknab a nakakaukolay dakel nin babangatan. Binangatan toray 70 no panon ya itongtong so Panariay Dios ed saray sankaili tan insan imbaki toran mangilaknab ed satan a mensahe ed publiko. (Lucas 10:1, 2, 9) Sakbay a tuloy na impawil to’d Ama to ed tawen, pinaseseg nen Jesus iray patumbok to a manseet a mangitongtong ed arum nipaakar ed sayan mensahe, a mangigaganggan ni ingen ed sikara: “Onla kayo sirin, tan mangawa kayo na saray babangatan ed amin a naciones, . . . Ya ibangat yo ra’n mangonor na amin a bengabengatla ya ingangan ko ed sikayo.” (Mateo 28:19, 20) Diad sankamundoan, susumpalen na saray tuan Kristiano natan itan a kimey diad pangitotongtong na maong a balita na Panariay Dios ed kapara ran totoo. Sarayan diskusyon so mamapakayari ed sikaran mantasi ed katuaan nipaakar ed Manamalsa, si Jehova.​—Mateo 24:14.

Mareen, Makapabiskeg Iran Tongtongan

Panon ya itongtong na saray babangatan nen Jesus iray sisiaen da ed arum? Agda kaukolan a pasyodoten iray sumusumpa, nisay misangsangan ed sikara. Imbes, kaukolan dan anapen iramay mangawat ed maong a balita tan insan da iparungtal so Makasulatan ya ebidensyan manuporta ed satan. Siempre, naiimano na Dios iray kiwas na saramay nakakatongtong na saray babangatan na Anak to, a singa ed inyabawag nen Jesus: “Say mangawat ed sikayo, awaten to ak, tan say mangawat ed siak awaten to so angibaki ed siak.” (Mateo 10:40) Agaylan panangikaindan ed Dios sanen maslak ed kapanaonan nen Jesus so angipulisay ed mensahe to!

‘Say aripen na Katawan agkaukolan a mikolkol,’ insimbawa na Kristianon apostol a si Pablo. Imbes, sikato so “[kaukolan] a maamo ed ganagana, maong a mangibangat, matpel, a bangatan to a matayarno so saray masumpa; ag la piga no say Dios iter to ed sikara so panagbabawi pian nakabatan da so tua.” (2 Timoteo 2:24, 25) Mangitatarok na maabig ya alimbawa so paraan na impangiyabawag nen Pablo ed maong a balita ed saray totoo ed Atenas, Gresya. Sikatoy akikatunongan ed saray Judio ed sinagoga ra. Diad saray tindaan et inagew-agew ya akitongtong ed “saramay nibanbanan wadman, NW.” Anggaman anggapoy-duaruwan pigara ed sikara so malabay lambengat ya ondengel ed balo iran ideya, si Pablo so nansalitan diretsaan tan diad mapangasin paraan. Siningbat to ed saray dumerengel to so mensahe na Dios, ya amaseseg ed sikaran magbabawi. Say kiwas da et mipadparan tuloy ed kiwas na totoo natan. “Saray arum sikatoy inelekan da, et saray arum inkuan da: Dengelen mi ka ed [no] maminsan lamet nipaakar ed saya.” Agla impilit nen Pablo a parukeyen so tongtongan. Walan nipulong la so mensahe to, sikatoy ‘pinmaway ed pegley da.’​—Gawa 17:16-34.

Diad saginonor, imbaga nen Pablo ed saray membro na Kristianon kongregasyon ed Efeso ya ‘antokaman a pakapinabangan et agto pinaulian ya impaliwawa nisay imbangat ed lapag, tan dia ed saray kaabungan.’ Tan sikato ni ‘sigpot ya angipatua ed panpatauli ed Dios tan say pananisia ed Jesu-Kristo ed saray Judio tan saray Griego.’​—Gawa 20:20, 21.

Ipaparungtal na sarayan Makasulatan ya alimbawa no panon so impangitongtong na matoor ya ariripen na Dios ed panaon na Biblia nipaakar ed relihyon. Ontan met natan, situtulok ya itotongtong na Tastasi nen Jehova so relihyon ed kapara ran totoo.

Mabungan Tuloy Iran Tongtongan

‘Denglen so Salita na Dios.’ ‘Talingen iray ganggan to.’ Agaylay kabetbet a nipapatnag iratan a simbawa ed Biblia! Makakiwas ka ed sarayan Biblikon panangiwanwan diad ontumbok a pankanawnawan mitongtong ed sika iray Tasi nen Jehova. Talinengen so mensahen itatarok da ed sika manlapud Biblia. Sayan mensahe et aliwan makapulitika noagta mangidadalangirang ed mangatatawen a gobierno na Dios, say Panarian to. Saya so paraan na Dios ed pangekal ed saray sengegan na kaplesan-agew iran gutgutan. (Daniel 2:44) Kayari to et iyuksoy na sayan uley na Dios manlapud tawen a say interon dalin et pasimbaloen a pagmaliwen a sakey a paraison singa say tanamanan na Eden.

Sakey a datin detektib na pulisya so mabetbet a mangipupulisay ya ontalineng sano mitongtong iray Tasi nen Jehova ed sikato nipaakar ed Biblia. Balet lapud idaraak na krimen a kaukolan ton arapen, sikatoy adismaya ed saray kapetegan ed bilay. Kanian imbaga to’d tinmumbok a Tasin dinmalaw ed sikato ya usisaen toy ebidensya na mensahe Biblia. Nigapo so maparanay a tongtongan. Anggaman aminpigan danay ya inmalis na ayaman so pulis, sigagayagan inanap na saray Tasi so kada balon lugar to pian nituloy so tongtongan. Diad kaunoran et inaksobi na opiser: “Say ebidensyan aanapen ko so wadman ed Masanton Kasulatan a mismo. No agnanseet iraman a Tasi a mitongtong ed siak, ompan wadman ak ni tan maniisip no anton talagay kabaliksay bilay. Diad tua et naaaralan ko la so katuaan, tan usaren koy nakekeraan a kabiangan na saray agew ko ed pananap ed arum a manaanap ed Dios a singa siak met ed inmuna.”

Sisisimoon a labay na saray interesadon dumerengel a makaamta na nagkalalo. Makanepegan lambengat ya ilaloan daray rason ed saray sisiaen a niparungtal. (1 Pedro 3:15) No panon a maupapet so sakey ya ugaw ed saray ateng to tan maniilalon ebatan da iratan, makanepegan lambengat ya ilaloan moray Tasi a mangiter ed sika na mapekder iran ebat. Makaseguro ka a sigagayaga iran ompawil tan isingbat a nagkalaloy mensahe na Biblia.

Ompan walaan ka la na daiset ya amta nipaakar ed Biblia. Nayarin namomoriam a say iilaloan na Dios ed sika et mankakaukolan na pigaran pananguman ed kabibilay mo. Agmasuyat a mangemtan ed saray pamaakaran lapud takot a nairapan ka ed saray kakaukolanen na Dios. Saratan so mangitarok ed sika na tuan liket. Naapresyam iya legan a kalkalna kan onaaligwas.

Manuna ed amin, kunsideraen no siopa si Jehova, no anto so iilaloan to ed sika, tan no anto so iyoopresi to. Kerewen ed saray Tasi ya ipanengneng ed sika no antoy ibabaga na Biblia. Sukayan so ibabaga ra ed dilin kopyam a Biblia. Diad pakaamtam a makatunongan iray Tasi ed ipaparungtal bilang katuaan nipaakar ed relihyon, agpanduaruwaan a labay mon usisaen niray dakel nin maabig a bengatla a nipanabang da ed sika manlapud Kasulatan.​—Uliran 27:17.

Sika so naabrasan mangimaton ed saray Tasi ed lokal a pantitiponan da, ed Kingdom Hall. Makadngel ka ditan na saray makagunggunan diskusyon ed Salita na Dios. Nanengneng mo no panon a panggagayagaan na saramay presenti diman ya itongtong ed balang sinansakey so nipaakar ed saray gagala na Dios. Abuloyan mo irayan Tasi ya ontulong ed sika pian naamtaan so katuaan nipaakar ed linawa na Dios parad sikatayo natan. Onkiwas ed imbitasyon na Dios a pantongtongan so tuan panagdayew tan awaten so imis na abobon to, anggan say maandon bilay ed Paraiso.​—Malaquias 3:16; Juan 17:3.

[Litrato ed pahina 5]

Prangkaan a sinaglawi nen Noe so gagala na Dios

[Saray litrato ed pahina 7]

Singa ginawa nen Pablo diad kadaanan ya Atenas, ibabangat na Tastasi nen Jehova iray katuaan na Biblia ed arum