Sakey a Balon Bilay Parad Inmuunan Atateng Tayo

IBABANGAT ta na Salitay Dios, say Biblia, ya amin so nailaloan a mantultuloy a manbilay diad mundo na saray espiritu ed ipatey? Andi, agto ibabangat itan. Ipaparungtal na Biblia so makapakelaw ya ilalon bilay kayari ipapatey, balet aliwan singa say iisipen na arum.

Kunsideraen so ibabaga na Biblia nipaakar ed inmunan ateng tayo, si Adan. Sikatoy pinorma nen Jehova manlapud “sapok na dalin.” (Genesis 2:7) Awalaan na pankanawnawa si Adan a manbilay ed ando lan ando ed liket diad dalin. (Genesis 2:16, 17) Anggaman ontan, sikatoy nanrebeldi ed maaron Manamalsa to, tan say resulta et ipapatey.

Iner so nakar nen Adan diad ipapatey? Inkuan na Dios ed sikato: “[Ompawil ka] ed dalin, ta sikato so angalaan ed sika. Lapu’d dabok ka, dia ed dabok ompawil ka.”​—Genesis 3:19.

Iner so kawalaan nen Adan sakbay a pinalsa nen Jehova manlapud dabok? Anggapo ni. Sikatoy anggapo’d kiwawala. Kanian sanen imbaga nen Jehova a si Adan so ‘ompawil ed dalin,’ say labay ton ibaga lambengat et andiay bilay lamet si Adan, a singa say dabok. Si Adan so ag ‘binmaliksat’ ed sakey a mundo na saray espiritun imuunan atateng pian magmaliw a manangiletneg to. Sikatoy aglinmabas ed sakey a bilay ya alay liket diad tawen nisay sagmaken so magnayon a panamairapan a pasen. Say mogmon pananguman a ginawa to et manlapud kipapasen a mabilay ya amaarap ed inka-anggapoy bilay, manlapud kiwawala ya amaarap ed agkiwawala.

Komustay nipaakar ed arum ed sankatooan? Kasin anggapo met la’d kiwawala iray kailalakan nen Adan diad patey? Oneebat so Biblia: “Amin [namparan totoo tan ayayep] onla ed sakey a pasen. Amin nanlapu ed dabok, tan amin ompawil ed dabok lamet.”​—Eclesiastes 3:19, 20.

Kipapasen na Inaatey

On, saray inatey so andiay bilay, agmakayarin makadngel, makanengneng, makasalita, odino manisip. Alimbawa, ibabaga na Biblia: “Saray mabilay amta ra a sikara ompatey ira; balet saray inaatey agda amta so bengatla . . . No panon so aro ra, ontan so gula ra tan siblet da, atawtaw ya abayag la.” Ibabaga met na Biblia: “Angapo so gawa, no kanonotan, no pakaamta, no kakabatan, dia ed Sheol [say lubok], a laen mo.”​—Eclesiastes 9:5, 6, 10.

Kanian, unong ed Salitay Dios, legan a mabilay ni totoo, amta ra so ipapatey. Balet, sano sikaray inatey, anggapo lay amta ra. Anggapo ra ed abay na bangkay da, a babantayan no antoy gawaen ed satan. Anggapo met lay panliliket nisay ot-ot, anggan say gayaga nisay ermen diad agkiwawala. Anggapoy amta na saramay inatey ed ilalabas na panaon. Say kipapasen dan agmakalikna so mas maitlek nen say antokaman ya ugip.

Amta nen Job, sakey ya aripen na Dios ed kadaanan a panaon, ya agmantultuloy so panbilay na totoo kayari ipapatey. Atalosan to met a no anggapoy isasalet na Dios et anggapo so ilalo na panbilay lamet. Inkuan nen Job: “Say too ompatey, tan napaabeba; on, say too yawat to so kamarerwa to, tan iner so kawalaan to? Dia ed ontan say too ondokol tan ag onbangon.” (Job 14:10, 12) Maseguron ag-inilaloan nen Job a sano ompatey et nakaiba toray inmuunan atateng to diad mundo na saray espiritu.

Say Ilalon Kioli

Lapud saray mabilay so anggapo la’d kiwawala diad patey, pinalesa nen Job so importantin tepet sanen intuloy toy nanupapet: “No say sakey a too ompatey, ombilay ta lamet?” Si Job a mismo so angebat ed saya: “Amin iray agew na pibabakal [panaon diad lubok] ko alagden ko, anga ed say kabolos ko onsabi. Ontawag ka [Jehova], et onebatak ed sika. Manpilalek ka ed gawa na saray limam.”​—Job 14:14, 15.

Diad arum a panangibaga et anggaman asagmak nen Job so agkiwawala, sikatoy agnilingwanan na Dios. Awalaan na pananisia si Job ya onsabi panaon sano “ontawag” si Jehova a Dios ed sikato ya ombilay diad panamegley na kioli.

Impanengneng nen Jesu-Kristo, say Anak na Dios, a say ilalo nen Job a kioli so realistiko. Pinaneknekan nen Jesus a saray inatey so nibangon. Panon? Diad impamaoli ton mismo! Anggapo diman pian paolien si Job, balet legan a wadia’d dalin et peteg a pinaoli nen Jesus so anak a laki na sakey a balo ed syudad na Nain. Imbangon met nen Jesus ed bilay so 12-años ya anak a bii na lakin manngaran a Jairo. Tan pinaoli to so kaaro ton si Lazaro, ya apat agew lan inatey.​—Lucas 7:11-15; 8:41, 42, 49-56; Juan 11:38-44.

Niarum ni ed sarayan milagro, sinaglawi nen Jesus so nipaakar ed baleg a kioli ed arapen. Inkuanto: “Onsabi horas, ya amin so saray wala ed saray lobok narengel da so voces to, et onpaway ira.” (Juan 5:28, 29) Diad saginonor, si apostol Pablo, ya inusar nen Jehova a mamaoli ed sakey a balolaki, so angibalikas met a sisiaen toy kioli ed arapen. Inkuanto: “Wala so ilalok ed Dios, . . . ya wala naani kioli ed bilay na saray matunong tan ag matunong.”​—Gawa 20:7-12; 24:15.

Sarayan Makasulatan a reperensya nipaakar ed kioli ed arapen so agmanutukoy ed mantultuloy a bilay diad pasen na saray espiritu. Saratan so mangituturo ed panaon sano minilyon ed inaatey so ompawil ed bilay diad pisikal iran laman dian mismo ed dalin. Sarayan apaoli so aliwan totoon anggapoy atandaan ed akaunan bilay da diad dalin. Sikaray agniyanak lamet a singa saray kapangiyanak. Imbes, sikaray magmaliw a parehon persona sanen inatey ira, a walaan na pareho iran pakanodnonotan tan personalidad. Mainomay dan nabidbir so inkasikara tan ontan met ed arum. Agaylan gayaga itan legan a sarayan totoo so makapiulop-lamet ed saray kaaro tan kapamilya ra! Tan agaylan makapaligsa so pakapikabat ed inmuunan atateng tayo!

Kioli a Mamaarap ed Bilay diad Tawen

Agta imbaga nen Jesus a say arum et onla’d tawen? On, imbaga to. Diad labin sakbay a napapatey, inkuanto: “Dia ed abung nen Amak walaray amayamay a panayaman; . . . Et no onlaak tan mangiparaanak na pasen ya onkana’d sikayo, onlaak dia lamet, tan awaten ta kayo ed inkasiak; pian no iner so kawalaan ko, diman makapanayam kayo met.” (Juan 14:2, 3) Mitotongtong ed saman si Jesus ed matoor ya apostoles to, balet agkabaliksan na saray salita to ya amin a maong a totoo so onla ed tawen.

Impanengneng nen Jesus a saramay napaoli ed tawen so nepeg a makakapet ed saray kakaukolanen likud ed basta panbilay na pagmaliw a maong. Sakey a kakaukolanen et say pakawalaan na suston pikakabat ed si Jehova tan saray gagala to. (Juan 17:3) Sananey niran kakaukolanen et say pangagamil na pananisia ed dondon bagat nen Jesu-Kristo tan katutulok ed Dios. (Juan 3:16; 1 Juan 5:3) Nilikud ed saya, sakey nin kakaukolanen et say pagmaliw a “niyanak lamet” bilang bautismadon Kristianon tinagibi masanton espiritu na Dios. (Juan 1:12, 13; 3:3-6, NW) Kaaruman nin kakaukolanen parad mangatatawen a bilay et say panagsungdo a singa ginawa nen Jesus, a pinaneknekan ton matoor ed Dios anggad patey.​—Lucas 22:29; Apocalipsis 2:10.

Wala so rason parad saratan ya atagey a kakaukolanen. Saramay napaolin onla’d tawen so walaan na importantin kimey a gawaen. Amta nen Jehova ya agbalot sitatalonan nipakurang na saray gobierno na too iray bengatla’d dalin. Kanian inyuksoy toy sakey a mangatatawen a gobierno, odino Panarian, a manguley ed sankatooan. (Mateo 6:9, 10) Si Jesus so magmaliw ya Ari na satan a Panarian. (Daniel 7:13, 14) Say pigaran apili manlapud dalin tan apaolin onla’d tawen so manarin kaiba to. Impasakbay na Biblia a sarayan apaoli so magmaliw a “panarian tan sacerdote nipaakar ed Dios mi; et manari ra ed tapew na dalin.”​—Apocalipsis 5:10.

Kasin makakapet ed saray kakaukolanen so baleg a bilang na totoo parad mangatatawen a kioli? Andi. Anggaman ag-ira kinmulang, maslak ed saramay nanaugip ed patey so agkualipikado. Dakel so awalaan na daiset odino andiay pankanawnawan makaamta’d katuaan nipaakar ed si Jehova tan ed saray gagala to. Sikaray nambilay tan inatey ya andian na antokaman a pikakabat ed si Jesu-Kristo odino ed Panarian na Dios.

Tinawag nen Jesus iramay onla’d tawen a “melag a pulok.” (Lucas 12:32) Diad saginonor et niparungtal a say bilang na saramay “sinaliw manlapud dalin” pian miuley ed Kristo diad tawen et 144,000. (Apocalipsis 14:1-3; 20:6) Bangta say 144,000 so baleg lan bilang pian mangokupa ed “amayamay a panayaman” a tinukoy nen Jesus, satan so melag lambengat sano ikumpara ed binilyon a totoon inilalak nen Adan.​—Juan 14:2.

Saray Ebento Sakbay na Mangaraldalin a Kioli

Repasoen tayo pay asingbat tayo la. Unong ed Biblia, saramay inatey so andiay bilay diad ipapatey ya anggad sikaray paolien nen Jehova a Dios. Arum so napaoli ed bilay diad tawen, a ditan et sikaray miuley ed si Jesu-Kristo diad gobierno na Panarian. Maslak a totoo so napaoli ed dalin, pian magmaliw ya uuleyan na satan a Panarian.

Diad panamegley na mangaraldalin a kioli et sumpalen nen Jehova so gagala to parad dalin. Pinalsa nen Jehova itan ‘pian panayaman.’ (Isaias 45:18) Saya so ginetman permanentin ayaman na sankatooan. Kanian, inkanta na salmista: “Saray tawen, salanti saray katawenan, kien ira nen Jehova. Bangbalet say dalin inter to ed saray anak na totoo.”​—Salmo 115:16.

Sakbay ya onggapoy kioli ed bilay ed dalin, baleg iran pananguman so nepeg a nagawa. Nayarin mipakna kan aggagala na Dios a napanoy dalin na bakal, polusyon, krimen, tan karawalan. Sarayan problema so pinalesa na totoo ya andian na respeto ed Dios tan ed saray matunong a ganggan to. Kanian, say Panarian na Dios so ‘mamagbag ed saramay mamabagbag ed dalin’​—sakey a baleg a kundang diad panumpal na linawa to ed dalin. (Apocalipsis 11:18) Deralen na Panarian so amin a marelmeng a totoo, ya itilak iray matunong pian manbilay ed dalin ya ando lan ando.​—Salmo 37:9, 29.

Paraiso ed Dalin

Saramay apaoli ed alinisan a dalin so magmaliw a maulimek, maasikason totoon manggagaway kaptekan. (Ipareng so Mateo 5:5.) Diad silong na maaron panangasikaso na Panariay Dios, sikaray manbilay a maliket diad kaligenan. Ipapanengneng na Biblia so makapakelaw a deskripsyon ed saray kipapasen a niwala ditan: “Punasen [na Dios] so amin a lua ed kamataan da, tan andi gapo la naani ipatey, tan angapo la naani onnangis o dageyem, o ot-ot. Ta saray ona a bengatla sikara so linmabas la.”​—Apocalipsis 21:4.

On, say dalin so pagmaliwen a sakey a paraiso. (Lucas 23:43) Isipen pay kabaliksan na satan! Saray ospital tan nursing home so agla nakaukolan. Diad Paraiso, saramay papairapen natan na saray epektoy itatatken so ombiskeg tan ombunigas lamet. (Job 33:25; Isaias 35:5, 6) Anggapo laray punerarya, sementeryo, tan lubolubok. Diad panamegley na Panarian to, ‘akmonen [nen Jehova] so patey ed ando lan ando.’ (Isaias 25:8) Saratan a bendisyon so maseguron mankabaliksay sakey a balon bilay parad sikatayo tan parad inmuunan atateng tayo.

[Litrato ed pahina 7]

Saramay apaoli ed dalin so magmaliw ya uuleyan na Panarian