Maliket Iraman so Mansiansian Aliing!
“Nia! Siak ondago ak a singa matakew. Mapalar so manpuyat, tan isinop to so saray kawes to.”—APOCALIPSIS 16:15.
1. Lapud asingger la so agew nen Jehova, anto so nailaloan tayo?
ASINGGER lay baleg ya agew nen Jehova, tan kabaliksan toy bakal! Diad pasingawey, anengneng nen apostol Juan so singa-patang a ‘balbalikas ya impuyan na saray demonyo’ a nipapaarap ed amin ya “arari,” odino manuley, na dalin. Pian gawaen so anto? Agayla, “pian tiponen da ra ya iparaan ed bakal na baleg ya agew na Dios, a Makapanyarin-amin”! Inyarum ni nen Juan: “Tinipon to ran pankakasakeyen ed pasen a dia ed Hebreo manngaran na Armagedon.”—Apocalipsis 16:13-16.
2. Siopa si Gog na Magog, tan antoy nagawa sano atakien toy totoo nen Jehova?
2 Agla manbayag, pakiwasen nen Jehova so elemento na sayan mapolitikan sistema pian deralen so Babilonia a Baleg, say sankamundoan ya imperyo na palson relihyon. (Apocalipsis 17:1-5, 15-17) Insan tiponen nen Gog na Magog, si Satanas a Diablo a nibantak ed kabangibang na dalin iray armada to tan impasyan onataki ed mareen tan singano anggapoy kalaban-laban a totoo nen Jehova. (Ezequiel 38:1-12) Balet onkiwas so Dios pian iliktar so totoo to. Satan so mananda ed ibetag na “baleg tan makapataktakot ya agew nen Jehova.”—Joel 2:31; Ezequiel 38:18-20.
3. Panon yon deskribien iray nagawgawa a nipasakbay diad Ezequiel 38:21-23?
3 On, iliktar nen Jehova so totoo to tan deralen so amin ya unor a pakasuysuyan ed sistema nen Satanas sano nasabi tayo so situasyon na mundo a tatawagen a Har–Magedon, odino Armagedon. Basaen pa so mapropetiko iran salita na Ezequiel 38:21-23, tan ilitrato pa ed kanonotan so eksena. Usaren nen Jehova so pakapanyari to pian ibulos so makadelap a balasobos na uran, makadesyang iran baton-granizo, manasibengbeng ya apoy, makapatey a salot. Walay inkatalagnaw ed sankamundoan legan a nawewetwet iray armada nen Gog, a manlalaban ira. Siopaman a natilak a kabusol na Makapanyarin-amin a Dios so napapatey legan a mamilagron isalba nen Jehova iray ariripen to. Sano manampot lay nipasakbay a ‘baleg a kairapan,’ anggapon balot so natilak a kabiangan na agmaridios a sistema nen Satanas. (Mateo 24:21) Balet, anggan diad ot-ot na ipapatey da, naamtaan na saray marelmeng no siopa so sengegan na kalamidad da. Onia so kuan na mananalon Dios tayo: “Nakabatan da a siak si Jehova.” Sarayan ekstra-ordinaryon ebento so nagawa ed agew tayo, legan na kiwawala nen Jesus.
Onsasabin Singa Matakew
4. Diad anton nengneng ya onsabi si Jesus a maneral ed sayan marelmeng a sistema na bengabengatla?
4 Onia so inkuan na niglorian Katawan a Jesu-Kristo: “Nia! Siak ondago ak a singa matakew.” Say isasabin singa-matakew et bigla, diad ag-iilaloan ya oras, sano maslak a totoo so nauugip. Sano onsabi si Jesus a singa sakey a matakew pian deralen iyan marelmeng a sistema, iliktar to iramay tuan aliing. Inkuanto ed si Juan: “Mapalar so manpuyat, tan isinop to so saray kawes to, ompan manakar a labos-lakseb, tan nanengneng da so kababaingan to.” (Apocalipsis 16:15) Antoy kabaliksan na saratan a salita? Tan panon itayon mansiansian aliing ed espiritual?
5. Anton uksoyan parad serbisyo ed templo so wala sanen wadiad dalin si Jesus?
5 Diad inkalapagan, agpa nalakseban so sakey a guardia no sikatoy nauugip legan na panbabantay to. Balet agawa itan diad templo ed Jerusalem sanen wadia ed dalin si Jesus tan manlilingkor diad templo ed Jerusalem iray dibisyon na saserdote tan Levitas. Saman so diad koma-11 a siglo K.K.P. ya inyareglo nen Arin David so nilasus a saserdote na Israel tan saray nilibon katulongan a Levita pian magmaliw a sakey ya organisasyon a tugyopen na 24 a dibisyon. (1 Awaran 24:1-18) Kada dibisyon na masulok a sanlibon nipasal a komikimey so mansusublayan ed sakey simban panaglingkor ed templo ya ag-onkulang ed duaran danay ed loob na sakey a taon. Balet, diad Piesta na Kobongkobong, amin a 24 dibisyon so wadman pian manlingkor. Kinaukolan met so kaaruman a tulong diad kada piesta na Paskua.
6. Siopay tutukoyen nen Jesus sanen inkuanton, “Mapalar so manpuyat, tan isinop to so saray kawes to”?
6 Sanen inkuan nen Jesus, “Mapalar so manpuyat, tan isinop to so saray kawes to,” nayarin tutukoyen to so sakey a paraan a tinumbok nensaman a manasaglawi ed guardian manbabantay diad templo. Onia so inkuan na Judion Mishnah: “Nansiansian akabantay iray saserdote diad taloran pasen ed Templo: diad Kamara na Abtinas, diad Kamara na Apuy, tan diad Kamara na Palbaan; tan saray levita diad duamplo tan sakey a paspasen: limara ed limaran wangalan ed Palandey na Templo, sanepat diad apatiran sukong to ed loob, limara ed limara ed saray wangalan na looban na Templo, apatira ed apatiran sukong to ed paway, tan sakey diad Kamara na saray Apay, tan sakey diad Kamara na Kurtina, tan sakey ed beneg na kawalaan na Yurongan na Panangasi [paway na atagey a padir na Sankamasantoan]. Say opiser ed Palandey na Templo so naynay ya onliber ed kada bantay a walaan na saray silewan ed arapan da, tan no walay bantay ya ag-onalagey tan ikuan ed sikato, ‘O opiser ed Palandey na Templo, niwala komoy kareenan ed sika!’ tan no mapatnag a sikatoy nauugip, sikatoy pekpeken to na baston to, tan sikatoy walaan na kanepegan a mamool ed kawes to.”—The Mishnah, Middoth (“Measurements”), 1, parapo 1-2, impatalos nen Herbert Danby.
7. Akin a kaukolan a mansiansian aliing iray saserdote tan Levitas a manbabantay diad templo?
7 Nansiansian aliing a sanlabi so dakel a Levita tan saserdote a manseserbin dibisyon pian manbantay tan amperen so siopaman ya agmalinis ya onloob ed saray lolooban na templo. Lapud say “opiser ed Palandey na Templo,” odino “say kapitan na templo,” so onliliber ed amin a 24 estasyon ed saray panaon na panbabantay ed labi, kada managbantay so kaukolan a mansiansian aliing diad puesto to no agto labay a nasabian ya agmanbabantay.—Gawa 4:1.
8. Antoray akinpaway a piguratibon kawes na Kristiano?
8 Saray alanaan a Kristiano tan kapara ran ariripen so kaukolan a mansiansian aliing ed espiritual tan alwaran day piguratibon akinpaway a kawekawes da. Saraya so akinpaway ya ebidensya na inkaturo tayo ed ministeryo diad espiritual a templo nen Jehova. Diad pamibidbir ed saya, walaan itayo na masanton espiritu na Dios, odino aktibon puersa, pian ontulong ed sikatayon sumpalen iray obligasyon tan gawaen iray pribilihyo tayo bilang manangiproklama na Panarian. Say pangibaliwala ed asainmin tayo bilang ministros na Dios so mangipeligro ed sikatayo ed pakasabian nen Jesu-Kristo, say Kapitan na baleg ya espiritual a templo. No sikatayoy nauugip ed espiritual diad satan a panaon, sikatayo so piguratibon nalakseban tan napoolan so simbolikon kawes tayo. Kanian panon itayon makapansiansian aliing ed espiritual?
No Panon Itayon Makapansiansian Aliing
9. Akin ya importanti so panagaral ed Biblia diad tulong na saray Kristianon publikasyon?
9 Say maseseg a panagaral ed Kasulatan diad tulong na Kristiano iran publikasyon so panpaligsa ed espiritual ya inkaliing. Say ontan a panagaral so manginlong ed sikatayo ed ministeryo, ontulong ed sikatayo ya arapen iray krisis, tan ibangat to’d sikatayo so dalan a mamaarap ed magnayon a liket. (Uliran 8:34, 35; Santiago 1:5-8) Kaukolan a say panagaral tayo et polido tan progresibo. (Hebreos 5:14–6:3) Say maong a tagano a regular a naaakan so makatulong ed sikatayo pian mansiansian aliing tan alerto. Mangamper itan ed ikapoy a nayarin tanda na malnutrisyon. Andian itayo na rason pian onkulang ed tagano tan magmaliw a mantuglep ed espiritual, lapud mangitatarya so Dios na daakan ya espiritual a tagano diad panamegley na alanaan a “matoor tan makabat ya aripen.” (Mateo 24:45-47) Say regular a pangan na espiritual a tagano diad panamegley na personal tan panpamilyan panagaral et sakey a paraan pian mansiansian aliing tan pian magmaliw a “mabunigas ed pananisia.”—Tito 1:13.
10. Panon a makatulong ed sikatayo iray Kristianon miting, asamblea, tan kombension pian mansiansian aliing ed espiritual?
10 Saray Kristianon miting, asamblea, tan kombension so ontutulong ed sikatayo a mansiansian aliing ed espiritual. Saratan so mangitatarya na panamaseseg tan pankanawnawa pian ‘manaayatan ed sakey tan sakey ed aro tan ed maabig iran gawa.’ Nagkalalo lan kaukolan itayon mantitipon a regular legan a “manasingger so agew.” Peteg ya asingger la natan itan ya agew. Satan so “agew nen Jehova,” sano alangonen to so inkasoberano to. No talagan importanti itan ya agew ed sikatayo—tan nepeg ya ontan—‘agtayo paulyanan so pantitipon tayo.’—Hebreos 10:24, 25; 2 Pedro 3:10.
11. Akin a nibaga a say Kristianon ministeryo so makana ed espiritual ya inkaliing?
11 Say intiron-puson pibibiang ed Kristianon ministeryo so makana ed inkaliing ed espiritual. Say regular tan maseseg a pibibiang ed panangipulong na maong a balita so mamasiansia ed sikatayo ya alerto. Iikdan itayo na ministeryo tayo na dakel a pankanawnawan mangitongtong ed totoo nipaakar ed Salita na Dios, say Panarian to, tan saray gagala to. Makapenek so pantasi ed kabkaabungan, panagpawil, tan pangikondukta na saray panangiyaral na Biblia ed ayaman diad saray publikasyon a singa say Pikakabat a Mangitonton ed Andi-Anggaan a Bilay. Pinaneknekan na mamatatken ed kadaanan ya Efeso a binangatan ira nen Pablo ed “lapag, tan dia ed saray kaabungan.” (Gawa 20:20, 21) Siempre, arum a matoor a Tastasi nen Jehova so walaan na seryoso iran problema ed bunigas a mangaamper ed ministeryo ra no maminsan, balet sikaray manaanap na paraan pian ibaga ed arum so nipaakar ed si Jehova tan ed say pananguley to tan makagamor na baleg a gayaga diad panggawa ed ontan.—Salmo 145:10-14.
12, 13. Antoray rason a nepeg tayon paliisan so inkalablabas ed tagano tan iinumen?
12 Say ipaliis ed inkalablabas so ontulong ed sikatayo a mansiansian aliing ed espiritual. Sanen mansasalita nipaakar ed kiwawala to, pinaseseg nen Jesus iray apostol to: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit. Ta ontan so isabi to ed saray amin a manaayam ed tapew na amin a dalin.” (Lucas 21:7, 34, 35) Say inkasiba tan panagbuek so agbalot mitunosan ed saray prinsipyo na Biblia. (Deuteronomio 21:18-21) Oniay ibabaga na Uliran 23:20, 21: “Agka miulop ed saray mainum na alak, ed saray masiba a mangan na laman. Ta say managbuek tan say masiba onduka ra, tan say kayepyep kawesan to so too ed kapilatpilat.”—Uliran 28:7.
13 Balet, anggano agni akasabi ed satan a punto so sobran panangan tan alablabas a panaginom, pandiwengdiwengen toy too, panngirasen to ni ingen tan mapaulyan ed panggawa na linaway Dios. Natural labat, walaray kapagaan a manasaglawi ed bilay na pamilya, bunigas, tan arum ni. Balet, magmaliw itayon maliket no iyuna tayo so intereses na Panarian ed bilay tayo tan makapanmatalek ya itaryaan itayo na mangatatawen ya Ama tayo. (Mateo 6:25-34) No andi, “satan ya agew” so onsabi ed sikatayo a singa “patit,” ompan singa sakey ya akaamot a kalot a mangalot ed sikatayon agnaliklikas odino bilang sakey a tapang, a singa saramay mangayat tan insan manapang ed agmalikas ya ayayep. Agnagawa iya no mansiansia itayon aliing, sigpot a makaamta a manbibilay itayo ed “panaon na anggaan.”—Daniel 12:4.
14. Akin a nepeg itayon masimoon a manpikasi?
14 Say masimoon a pikakasi so sananey a tulong ed espiritual ya inkaliing. Diad baleg a propesiya to, onia so impaseseg nen Jesus: “Balet manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa, tan makaalagey kayo ed arap na Anak na too.” (Lucas 21:36) On, ipikasi tayo sirin a naynay komon a wala itayo ed dapag nen Jehova tan panggayagaan so naabobonan a talindeg sano si Jesus, say Anak na too, so onsabin maneral ed sayan marelmeng a sistema na bengabengatla. Parad dilin pankamaongan tayo tan ed saray kapananisiaan tayo ya ipipikasi tayo, kaukolan itayon ‘mansiansian aliing ed pikakasi.’—Colosas 4:2; Efeso 6:18-20.
Naoopot Lay Panaon
15. Antoy nagagawaan na serbisyo tayo bilang managpulong na inkatunong?
15 Legan tayon tatalaranan so baleg ya agew nen Jehova, andi-duaruwan panpipilalekan tayon gawaen so anggaan na nayarian tayo ed serbisyo to. No masimoon tayon ipikasi iya ed sikato, “sakey a baleg a puerta a mangitonton ed aktibidad” so nilukas ed sikatayo. (1 Corinto 16:8, 9, NW) Diad aturon panaon na Dios, mangukom si Jesus tan ibiig to so matunong ‘iran karnero’ a makana ed andi-anggaan a bilay manlapud agmaridios ‘iran kanding’ a makanepegan na maandon kadederal. (Juan 5:22) Aliwan sikatayo so mangibiig ed saray karnero manlapud saray kanding. Balet say serbisyo tayo natan bilang managpulong na inkatunong so mangiiter ed totoo na pankanawnawa pian pilien so bilay ed serbisyo na Dios tan diad ontan et nawalaan na ilalo ed kibiig parad bilay sano “onsabi [Jesus] ed gloria to.” Say inkatikey na natitilak a panaon parad sayan sistema na bengabengatla so mamapalalo ed pankaukolan parad intiron-puso ya aktibidad legan tayon aanapen iramay “tinandaan ed bilay ya andi-anggaan.”—Mateo 25:31-46; Gawa 13:48.
16. Akin a nepeg itayon magmaliw a maseseg a manangiproklama na Panarian?
16 Naopot so panaon parad mundo ed agew nen Noe, tan magano met lan naopot parad sayan sistema na bengabengatla. Magmaliw tayo sirin a maseseg a manangiproklama na Panarian. Ontatalona so panagpulong tayo, lapud kada taon et nilasus nilibo so nababautismoan bilang simbolo na dedikasyon da ed Dios. Sikaray magmamaliw a kabiangan na abenditon organisasyon nen Jehova—‘totoo to tan karkarnero na pastolan to.’ (Salmo 100:3) Agaylan gayaga so pakapibiang ed panagpulong na Panarian a mangitatarok na ilalo ed dakerakel sakbay a “say baleg tan makapataktakot ya agew nen Jehova”!
17, 18. (a) Legan a manpupulong itayo, anton reaksion so kaukolan tayon ilaloan manlapud arum? (b) Antoy seguradon manalona ed saray managludlurey?
17 Singa si Noe, walaan itayo na suporta tan proteksion na Dios. On, saray totoo, saray nankinon-toon angheles, tan saray Nefilim so nanludlurey ed mensahe nen Noe, balet satan so ag-amatunda ed sikato. Natan, arum so manludlurey sano ipabitar tayoy pirmin ebidensya a manbibilay itayo la ed “kaunoran ya agew.” (2 Timoteo 3:1-5) Say ontan a panagludlurey so kasusumpalan na propesiya na Biblia nipaakar ed kiwawala nen Kristo, lapud onia so insulat nen Pedro: “Dia ed kaunoran ya agew onsabi so saray managlurey a pati panaglurey, a manakar irad dilin lawan da. Tan kuanda: ‘Iner so kawalaan na sipan ed idateng to? Ta nanlapu la ed saman so agew ya inkaplag dad ugip na atateng, ganagana a bengatla, ontutuloy a singa nen gapo na inkapalsa.’”—2 Pedro 1:16; 3:3, 4.
18 Nayarin onia so iisipen na kaplesan-agew iran managludlurey: ‘Anggapo met so panguumanan nanlapulad impamalsa. Tuloytuloy so bilay, mamangan, uniinom, mangaasawa, tan mamapabaleg na pamilya iray totoo. Anggano presenti si Jesus, agto ipaakseb so panangukom ed agew ko.’ Agaylan sikaray nalilingo! No ag-ira ompatey manlapud arum a sengegan ed sayan bekta, say makapataktakot ya agew nen Jehova so pihon maneral ed sikara a singa say makadesyang a kadederal ed Delap so angangga ed marelmeng a kailalakan diad agew nen Noe.—Mateo 24:34.
Kaukolan Itayon Mansiansian Aliing
19. Panoy pangipasen tayo ed panaggaway-babangatan ya aktibidad?
19 No dedikado itayo ed si Jehova, komon ta agtayon balot komon natangguyor ed pakaugip diad agsuston panagkatunongan. Saya la so panaon pian mansiansian aliing, pian mangagamil na pananisia ed madibinon propesiya, tan pian gawaen so komisyon tayon ‘manggawa na babangatan ed totoo ed amin a nasyones.’ (Mateo 28:19, 20) Legan ya aarapen na sayan sistema so pinal a kasampotan to, anggapo lay babaleg a pribilihyo tayo nen say panlingkor ed si Jehova a Dios diad silong na panangidirehi nen Jesu-Kristo tan mibiang ed sankamundoan a panagpulong ed “sayan maong a balita na panarian” sakbay ya onsabi so anggaan.—Mateo 24:14; Marcos 13:10.
20. Anton alimbawa so inletneg nen Caleb tan Josue, tan antoy ipapanengneng na kurang da parad sikatayo?
20 Arum ed totoo nen Jehova so manlilingkor la ed sikato ed loob la na saray dekada, ompan ed intiron bilay. Tan anggano kapkapangabrasa tayo ni labat ed tuan panagdayew, komon ta magmaliw itayon singa si Israelitan Caleb, a ‘sigpot ya anumbok ed si Jehova.’ (Deuteronomio 1:34-36) Sikato tan si Josue so akaparaan a tuloy ya onloob ed Insipan a Dalin ag-abayag kayari inkiliktar na Israel ed inkaaripen diad Ehipto. Balet, saray wala-lad-edad ya Israelita ed inkalapagan so andian na pananisia tan kaukolan a manpasen na 40 taon ed kalawakan, a ditan so inateyan da. Inanosan di Caleb tan Josue so kairapan a naabet da ed amin na satan a panaon, balet diad kaunoran saraman a duaran lalaki so linmoob ed insipan a dalin. (Numeros 14:30-34; Josue 14:6-15) No ‘sigpot tayon tumboken si Jehova’ tan mansiansian aliing ed espiritual, manggayaga itayon onloob ed insipan na Dios a balon mundo.
21. Antoy naeksperiensia tayo no mansiansia itayon aliing ed espiritual?
21 Malinlinew a papaneknekan na ebidensya a manbibilay itayo la ed panaon na anggaan tan lapud satan et asingger la so baleg ya agew nen Jehova. Aliwa la iyan panaon a panteglep tan mapaulyan ed panggawa na madibinon linawa. Nabendito itayo labat no mansiansia itayon aliing ed espiritual tan alwaran tayoray pinagka-kawes tayon pakabidbiran bilang Kristianon ministros tan ariripen nen Jehova. Komon ta determinado itayon ‘manpuyat, mansiansia ed pananisia, manugali a singa ugali na laki, tan onbiskeg.’ (1 Corinto 16:13) Bilang ariripen nen Jehova, komon ta balang sakey ed sikatayo so ontalindeg a malet tan manpakpel. Diad ontan et sakey itayo ed saramay akaparaan sano ombetag so baleg ya agew nen Jehova, a sitotoor a manlilingkor a kaiba na saray maliket a mansiasiansian aliing.
Panon yon Ebatan?
◻ Panon yon ukeran so piguratibon akinpaway iran kawes tayo, tan panon tayoran nisinop?
◻ Antoray pigaran paraan ed pansiansian aliing ed espiritual?
◻ Akin ya ilaloan tayoray managludlurey, tan panoy pangipasen tayo ed sikara?
◻ Panoy pangipasen tayo ed panaggaway-babangatan a kimey ed sarayan kaunoran ya agew?
[Blurb ed pahina 16]
Niwala ed Kristianos so masanton espiritu na Dios pian ontulong ed sikaran mansiansian aliing tan manumpal ed saray susumpalen da
[Litrato ed pahina 15]
Determinado ka ta a mansiansian aliing ed espiritual tan isinop so piguratibon akinpaway iran kawes mo?