“Mansiansian Aliing”
1 Kayari ton deneskribe iray importantin ebento a mananda ed saray kaunoran ya agew na sayan sistema na bengabengatla, pinaseseg nen Jesus iray babangatan ton “mansiansian aliing.” (Mar. 13:33, NW) Akin a nepeg a mansiansian aliing iray Kristiano? Lapud manbibilay tayo ed sankaatapan a panaon diad awaran na too. Agtayo labay so magmaliw a manteglep ed espiritual. Mansumpal itan ed agtayo la pamabli ed kimey ya ipapagawa nen Jehova ed sikatayo diad sayan panaon na anggaan. Anto itan a kimey?
2 Papaiyabawag nen Jehova ed totoo to dia ed intiron dalin so maong a balita nipaakar ed Panarian to—say alenleneg ya ilalo na katooan. Say maapit a pikimey ed organisasyon na Dios so mangipabidbir ed sikatayo bilang tuan Kristiano, a sinononot ed saray panaon tan ed panulong ed arum a makarengel ed “saray salita na maando a bilay.” (Juan 6:68) Diad maseseg a pibiang ed sayan sankaimportantian a kimey, nipatnag tayon sikatayoy aliing ed espiritual.
3 Apakiwas a Manpulong: Bilang Tastasi nen Jehova, nepeg itayon magmaliw a positibo nipaakar ed ministeryo tayo. Say panangaro ed Dios tan ed kaparan too so mamakiwas ed sikatayon mibiang a mismo ed kimey na panagpulong. (1 Cor. 9:16, 17) Diad panggawa’d satan, nisalba tayoy inkasikatayo ontan met ed saramay ondengel ed sikatayo. (1 Tim. 4:16) Komon ta determinado tayon mibiang a regular no posibli tan no nayadyari diad pangipulong ed sankaabigan a gobierno a niwala’d katooan ed kapiganman—say Panarian na Dios!
4 Say inkaganatan na ministeryo tayo so mangipaslep ed sikatayo ed importantin katuaan—say ibetag na baleg a kairapan so onsabi leleg a mibibiang ti ni ed sayan kimey. Lapud agtayo amta so agew tan oras kaukolan a mansiansia itayon aliing tan akaparaan ed amin a panaon, a masimoon a manmatalek ed si Jehova. (Efe. 6:18) Mantutultuloy so ilalaknab na panagpulong tayo. Balet magano lan mamantok so sankabalegan a kimey na panagpulong dia ed awaran na too.
5 Matoor a tumboken so ganggan nen Jesus a “mansiansian aliing.” Importantin tuloy natan iya nen say diad kapiganman. Onkiwas itayo komon tekep na inkaganatan. Natan tan diad agew-agew, mansiansia itayo komon ya aliing ed espiritual, alerto, tan aktibo ed panaglingkor ed si Jehova. On, ‘mansiansia [itayo komon] ya aliing tan pansiansiaey panlikas tayo.’—1 Tes. 5:6, NW.