No Akin ya Aliwan Milagro Lambengat so Mamalesay Pananisia

PANISIAAN so nanengneng. Ontan so panmoria na karaklan. Ikuan na arum a panisiaan da so Dios no ipatnag toy inkasikato diad mamilagron dalan. Nayari pa lagin ontan, balet say ontan kasin sisiaen so ontundas ed puron pananisia?

Konsideraen pa iray Israelitan di Core, Datan, tan Abiram. Ipapanengneng na Biblia a sikaray akatasi ed sarayan makapakelkelaw a milagro na Dios: say samploran bakbak ed Ehipto, say inkiliktar na nasyoy Israel ed Ambalangan Dayat, tan say impakatigway na Ehipsion Faraon tan say militar a puersa to. (Exodo 7:19–11:10; 12:29-32; Salmo 136:15) Nadngel met di Core, Datan, tan Abiram diad Palandey Sinai so impansalita nen Jehova manlapud tawen. (Deuteronomio 4:11, 12) Ingen, kayarin tuloy ya agawa irayan milagro, indaulo na taloran lalaki so panrebeldi ed si Jehova tan ed aturon ariripen to.​—Numeros 16:1-35; Salmo 106:16-18.

Ngalngalin 40 taon ed saginonor, naimatonan met na sakey a propetan manngaray Balaam so sakey a milagro. Anggan say anghelikon isasalet et ag-akaamper ed sikato ya ondapag ed kakabusol na Dios, saray Moabita. Anggaman ed ontan a milagro, inlolot ni nen Balaam tan tinmalindeg sumpad si Jehova a Dios tan say totoo To. (Numeros 22:1-35; 2 Pedro 2:15, 16) Balet, say kipapasen nen Balaam ya andiay pananisia so samet no ipareng ed kipapasen nen Judas Iscariote. Anggaman nagmaliw a maapit a kaiba nen Jesus tan akatasi ed dakel ya ekstra-ordinaryon milagro to, intapat nen Judas so Kristo diad talomplon piraso na pilak.​—Mateo 26:14-16, 47-50; 27:3-5.

Amta met na saray Judion relihyoson pangulo so dakerakel a milagro nen Jesus. Kayari ton pinaoli si Lazaro, inamin da ni ingen: “Sayan too manggawa na amayamay a tanda.” Balet kasin say impakanengneng da ed mabilay-lan Lazaro so amalemek ed kapusoan da tan amawalay pananisia ed sikara? Peteg ya andi. Imbes, ginetma ran pateyen si Jesus tan si Lazaro!​—Juan 11:47-53; 12:10.

Anggan say direktan isasalet na Dios et sinmaew a mamawalay pananisia ed saraman a marelmeng a totoo. Diad sakey ya inkagawa legan a walad sular na templo si Jesus, nanpikasin maksil: “Ama, pagloriaen moy ngaran mo.” Inmebat si Jehova ed sakey a boses a nanlapud tawen: “Sikato so pinagloriak tan sikatoy pagloriaen ko lamet.” Balet, sayan mamilagron ebento so ag-amawalay pananisia ed kapusoan na saramay wadman. Oniay ibabaga na Biblia: “Balet anggan nanggawa na amayamay a tanda ed arapan da, agni ra anisia ed sikato.”​—Juan 12:28-30, 37; ikompara so Efeso 3:17.

No Akin ya Ag-amawalay Pananisia Iray Milagro

Panon a siansian andian niray pananisia anta dakel laray milagro? Ompatnag a nagkalalo lan agnatalosan so impangipulisay na Judion relihyoson papangulo ed si Jesus sano isipen a diad mismon panaon na impangigapo to na ministeryo to, saray Judio ed interaminti et “manaalagar” la ed “say Kristo” odino say Mesias. (Lucas 3:15) Balet, say problema et no antoray aalagden da. Inaon na leksikograpon W. E. Vine so sakey a bantog ya iskolar na Biblia a mangibabagan saray Judio so nigalet ed ideyan say Mesias so mangiter ed sikara na “mangaraldalin a pambiktorya” tan “inkadaakan ed materyal.” Sirin, agda ilaloan so sakey a mapaabeba tan agmapolitikon Jesus na Nazaret, a pinmarungtal ed utel da bilang say tuan Mesias nen 29 K.P. Itatakotan met na saray relihyoson pangulo ompan mamuligar iray bangat nen Jesus ed walan onkukurang a kipapasen tan mameligro ed saray prominentin posisyon da. (Juan 11:48) Saray apadesiran ya ideya ra tan inkasiblet da so amulag ed sikara nipaakar ed kabaliksan na saray milagro nen Jesus.

Diad saginonor et impulisay na Judion relihyoson papangulo tan arum ni so mamilagron prueba a saray patumbok nen Jesus et nanggayagaan day madibinon panangabobon. Alimbawa, sanen tinambal na apostoles to so lakin piley nanlapulad inkianak to, intepet na mansyodot iran membro na atagey a korte na Judio: “Antoy gawaen tayo ed sarayan totoo? Ta peteg ed amin a manaayam ed Jerusalem, sakey a bantog a pakelaw so agawa ed panamegley da, et sikato so agtayo nayarin paandien. Balet, pian agla nibuyak ed baley, isebel tayo ed sikara manlapud natan ya ag-ira misalita ed siopaman diad ed sayan ngaran.” (Gawa 3:1-8; 4:13-17) Mabitabitar, sayan makapakelaw a milagro so ag-amalesa odino amawala na pananisia ed kapusoan na saraman a totoo.

Say ambisyon, kinon, tan agum so amaawet ed kapusoan na dakel. Ompapatnag ya onia so kaso di Core, Datan, tan Abiram, ya asalambit ed gapo. Angamper met ed arum so imon, takot, tan dakel niran makapasakit ya awawey. Napapanonotan itayo met, nipaakar ed saray matungangan anghel, dedemonyo, a datin apribilihyoan ed pakanengneng dan mismo ed lupa na Dios! (Mateo 18:10) Agda panduaruwaan so kiwawala na Dios. On, “saray demonyo sisiaen da met et manggiwgiw ira.” (Santiago 2:19) Balet, anggapoy pananisia ra ed Dios.

Say Kabaliksan na Tuan Pananisia

Say pananisia so mas ni nen say basta sisia. Satan met so mas ni nen say biglaan a nalikna ed sakey a milagro. Onia so ibabaga na Hebreos 11:1: “Say pananisia sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng.” Say indibidual a walaan na pananisia et kombinsido ed puso to a singa la asumpal so amin a bengatlan isisipan nen Jehova a Dios. Niarum ni, say agnasuppiat a prueba na agnanengneng iran inkapeteg so ontanlan kabiskeg a nikuan a say pananisian mismo so kasimbangan na satan ya ebidensia. On, say pananisia so nibasi ed ebidensia. Tan diad apalabas iran panaon, saray milagro so walaan na betang ed panamaaligwas ed pananisia odino say pakawalaan na satan. Kinmana iray tandan ginawa nen Jesus a mangombinsi ed arum a sikato so insipan a Mesias. (Mateo 8:16, 17; Hebreos 2:2-4) Mipadpara, say ontan iran langkap na masanton espirituy Dios, odino aktibon puersa, a singa say mamilagron panagtambal tan pansasalitay nanduruman salita so amaneknek a saray Judio so andian lay pabor to balet ta say panangabobon to natan so niyapasakey la ed Kristianon kongregasyon, ya inletneg na Anak to, si Jesu-Kristo.​—1 Corinto 12:7-11.

Sakey ed saray mamilagron langkap na espiritu et say abilidad a manpropesiya. Sanen naimatonan na saray agmananisia iyan milagro, arum so apakiwas a mandayew ed si Jehova, a mangiyaabawag: “Say Dios wala ed sikayo dia ed tua.” (1 Corinto 14:22-25) Balet, agginetma nen Jehova a Dios a saray milagro et magmaliw a permanintin kabiangan na Kristianon panagdayew. Kanian, insulat nen apostol Pablo: “Anggan wala ni so saray propesiya, mangangga ira; anggan wala niray salita, ontunda ira.” (1 Corinto 13:8) Sarayan langkap unong ed walan ebidensia et tinmunda diad impatey na apostoles tan saramay akaawat ed ontan iran langkap diad panamegley da.

Nakaindanan ta so totoo ya andian na pangibasiyan ed pananisia? Andi, lapud onia so imbaga nen Pablo: “Anggaman ontan agto [Dios] kinaindan ya anggapo so makatasi ed sikato, a nanggawa na maong, tan inikdan to kayo na saray uran a nanlapu ed tawen tan mabunga a panaon, a pinano to so saray kapusoan yo na tagano tan gayaga.” (Gawa 14:17) On, diad saray matuan-impanpuso a mabulos a mangilukas ed kanonotan tan kapusoan da ed saray ebidensyan akapaliber ed sikatayo, “saray bengatla ya agnanengneng a kien to [Jehova a Dios], say andi-anggaan a pakayari to tan inkadibino to nanengneng a manlapu ed inkapalsay mundo, natalosan ira unong ed saray bengatla ya agawa, pian anggapo so baraan da [saramay mangiburi ed Dios].”​—Roma 1:20.

Aliwan magenap so basta panisia ed kiwawala na Dios. Onia so impaseseg nen Pablo: “Agkayo miaabobon unong ed sayan mundo, no ag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” (Roma 12:2) Nagawaan iya ed maseet a panaral na Kasulatan diad tulong na saray Kristianon palapagan, a singa sayan magasin. Say pananisian nibasi ed suston pikakabat ed Salita na Dios, say Biblia, so aliwan maletey odino ataptapew. Saramay natetebek day linawa na Dios tan manusumpal ed satan unong ed pananisia so mangisasaklang na sagradon serbisyo ed Dios.​—Roma 12:1.

Panisiaan Anggano Agnanengneng

Walay irap-irap nen apostol Tomas a panisiaan so inkioli nen Jesus manlapud inaatey. Onia so inyabawag nen Tomas, “No agko nanengneng ed saray lima to so tinalos na saray pasak, tan iyan ko so tamorok ed nanlapuan na saray pasak, tan itobong ko so limak ed diking to, agak manisia.” Sanen nankinon-too si Jesus ed saginonor diad laman ya angiparungtal na saray sugat na inkipasak to, paborablin kinmiwas si Tomas ed milagro. Balet, inkuan nen Jesus: “Mapalar so saray ag-akanengneng, et anisia ira.”​—Juan 20:25-29.

Natan, minilyon ed Tastasi nen Jehova so “manaakar . . . ed pananisia, aliwan lapud pakanengneng.” (2 Corinto 5:7) Anggano agda anengneng iray milagron nirekord ed Biblia, panisiaan dan tuloy a saraya so agawa. Aagamilen na Tastasi so pananisia ed Dios tan say Salita to. Diad tulong na espiritu to, natatalosan daray bangat na Biblia tan say sankatalonggaringan a tema to​—say kiyalangon na inkasoberano nen Jehova a Dios diad panamegley na mangatatawen a Panarian to. (Mateo 6:9, 10; 2 Timoteo 3:16, 17) Tekep na baleg a pakakagunggunaan da, sarayan puron Kristiano so mangiyaaplika ed makabat a konseho na Biblia ed bilay da. (Salmo 119:105; Isaias 48:17, 18) Aawaten daray agnasuppiat a prueba a saray propesiya ed Biblia so mangipapabidbir ed panaon tayo bilang “kaunoran iran agew,” tan panisiaan dan asingger la so insipan a balon mundo na Dios. (2 Timoteo 3:1-5; Mateo 24:3-14; 2 Pedro 3:13) Parad sikara et sakey a gayaga so panginabang na pikakabat ed Dios ed arum. (Uliran 2:1-5) Amta ra a diad panamegley lambengat na panagaral ed Kasulatan a saramay manaanap ed Dios so peteg a makaromog ed sikato.​—Gawa 17:26, 27.

Nanonotan mo ta si Albert, ya asalambit ed akaunan artikulo? Pigaran agew kayari na ag-impakaebatan ed pikakasi to nipaakar ed sakey a milagro, sikatoy binisita na sakey ed Tastasi nen Jehova, sakey ya akulaw ya angitilak ed sikato na pigaran nibasi-ed-Biblian literatura. Kayari ton man et inawat nen Albert so sakey a libren panagaral na Biblia ed ayaman. Legan a lalon nakakabatan to so mensahe na Biblia, say inkadismaya to so nagmaliw ya inkagayaga. Amoria to met lamlamang ya aromog to la so Dios.

Onia so ipapaseseg na Kasulatan: “Anapen yo si Jehova natan ta naromog yo ni. Ontawag kayo ed sikato natan ta asingger ni.” (Isaias 55:6) Nagawaan mo iya, aliwan diad pantalaran ed sakey a modernon-agew a milagro a nanlapud Dios, noagta diad pangamor na suston pikakabat ed Salita to. Saya so kapilitan, lapud saray milagro so aglambengat mamawalay pananisia.

[Litrato ed pahina 5]

Anggan say mamilagron inkioli nen Lazaro so ag-amakiwas ed kakabusol nen Jesus pian mangagamil na pananisia

[Saray litrato ed pahina 7]

Say pananisia so nepeg a nibasi ed suston pikakabat ed Biblia