Ginawa Ra so Linawa nen Jehova

Atumangan so Pananisia na Atateng

PARAD saray Israelita, say kianak na lakin ugaw so sengegay baleg a panliliket. Kabaliksan na satan so pantultuloy na linya na kapolian tan pansiansia na tawir a dalin ed pamilya. Balet diad taon a ngalngalin 1593 K.K.P., say panilalak so ompatnag la ingen ya ayew imbes a bendisyon ed saray Hebreo. Akin? Lapud kapagaan a tuloy na Faraon na Ehipto ed itutulasok na populasyoy Judio ed teritoryan nasasakopan to, inganggan ton napapatey so amin a kapkapangiyanak a lalaki.​—Exodo 1:12, 15-22.

Legan na sayan kagulgulan getma a pamalanit ed rasa a nagmaliw si Amram tan Jocabed, sakey a Hebreon sanasawa, ya atateng ed malimgas ya ugaw a laki. Mainomay ya isipen so impakabaliw na gayaga ra sano nanonotan day dekreto nen Faraon. Ingen, diad inenengneng di Amram tan Jocabed ed anak da, mapekder dan dinisidin agpaulyanan, antokamay pansumpalan.​—Exodo 2:1, 2; 6:20.

Onkikiwas ed Pananisia

Diad loob na taloy bulan et inyamot di Amram tan Jocabed so anak da. (Exodo 2:2) Balet, saya so mapeligro lapud manaasinggeran so ayaman na saray Hebreo tan Ehipsio. Siopamay naromog a mamupuligar ed dekreto nen Faraon so seguradon nadusay ipapatey​—pati met say ugaw. Sirin, antoy gawaen na sarayan debotadon ateng pian manbilay so ugaw pati sikara?

Anipon si Jocabed na pigaran sanga na papiro (papyrus). Say papiro et sakey a malet a runo, a mipara’d kawayan, tan walaay nankatlon-suyok a talupak a singa gamet so kakapal to. Onlunggawit iya anggad 6 metro. Inusar na saray Ehipsyo iyan tanaman pian manggaway papel, ikamen, panlayag, sandalya, tan anlemew iran baloto.

Nanlaga si Jocabed na singa-kaban a baskit a dugarugan panginan ed anak to. Insan to pinoraporay ginalagalan pitek tan betun pian onelet so baskit et agnaloobay danum. Insan la inkarga nen Jocabed so anak to ed loob na balbaloto tan inlera to’d katalaiban ed gilig na Ilog Nilo.​—Exodo 2:3.

Aromog so Ugaw

Say anak nen Jocabed, a si Miriam, so nanayam ed asingger pian nasubaybayan toy ontumbok a nagawa. Insan sinmabi so anak nen Faraon pian manames ed Nilo.a Nayarin amta nen Jocabed a mabetbet so prinsesa ed sayan parti na Nilo kanian ginagala ton intilak so baskit diad mapalaway a pasen. Diad ontan a paraan, naimanon tampol na marikit nen Faraon so baskit ed katalaiban, tan tinawag toy sakey ed saray katulong to pian alaen iman. Sanen anengneng toy ugaw ed loob a manak-akis, naabagey to. Abidbir ton saya et sakey a Hebreo. Ingen, panon ton papatey so ontan a masanting ya ugaw? Likud ed naliliknan panangasi, nayarin naimpluensyaan so marikit nen Faraon ed bantog a sisiaen na Ehipsyo a say pakaloob ed tawen so mandependi ed rekord na gawgawan maabig legan na impanbilay na sakey.b​—Exodo 2:5, 6.

Si Miriam, a maniimano’d bandad arawi so inmasingger ed marikit nen Faraon. Oniay intepet to, “Manawag ka kasi naani mangawalo ed sakey ed saray bibii a Hebreas, pian isigsiwaan to ka ed saya ya ugaw?” Inmebat so prinsesa: “Laka pa sirin!” Batik si Miriam ed ina to. Agnambayag, si Jocabed so wala la’d arapan na anak nen Faraon. “Alam so saya ya ugaw ta kawaloen mo nisengeg ed siak,” so inkuan na prinsesa ed sikato, “et iter ko ed sika so upam.” Nayarin diad sayan pankanawnawa et amoria la na marikit nen Faraon a si Jocabed so ina na ugaw.​—Exodo 2:7-9.

Kinomponi nen Jocabed so anak to anggad impakapakso to.c Angiter iyay dakel a mablin pankanawnawa pian sikatoy nibangat nipaakar ed tuan Dios, si Jehova. Insan impawil nen Jocabed so ugaw ed marikit nen Faraon, ya angingaran na Moises ed ugaw a laki, a mankabaliksay “diad danum so angalaan ko’d sikato.”​—Exodo 2:10.

Leksion ed Sikatayo

Sigpot ya inanamot nen Amram tan Jocabed so antikey a pankanawnawa pian nibangat so anak da ed saray prinsipyo na tuan panagdayew. Nepeg met itan a gawaen na atateng natan. On, kapilitan so panggawa ra ed satan. Si Satanas a Diablo so ‘wala ed kaliberliber a singa omoang a leon a mananap na buagen to.’ (1 Pedro 5:8) Labalabay ton biktimaen iray papablien a tobonbalo​—lalaki tan bibii​—a nayarin magmaliw met a maabig ya ariripen nen Jehova. Anggapo so panangasi to’d saray kalangweran! Lapud saya, ipapasal na makabat ya atateng iray ankelag ya anak da pian ontakot ed tuan Dios, si Jehova.​—Uliran 22:6; 2 Timoteo 3:14, 15.

Unong ed Hebreos 11:23, say sagpot nen Amram tan Jocabed pian niyamot so anak da legan na unonan taloy bulan ed bilay to so nikurit bilang sakey a gawa na pananisia. Impanengneng na sarayan matakot-ed-Dios ya atateng so talek da’d manangiliktar a pakayari nen Jehova diad agda impamaulyan ed anak da, tan lapud saya a sikaray abendisyonan. Ipanengneng tayo met so mapeget ya itutumbok ed saray ganggan tan prinsipyo nen Jehova, a matalek ya antokaman ya iyabuloy nen Jehova ya onsabi’d sikatayo so mansumpal met lamlamang ed magnayon a pankaabiganan tan liket tayo.​—Roma 8:28.

[Saray paimano ed leksab]