Nagagawa ta ni Mamilagron Panagtambal?
“MANISIA ka ed Jesus pian natambal!” Saray diparan a singa saya so anisiaan nen Alexandre, membro na Ebanghelikon relihyon, a say iyinum toy tambal parad sakit to et pakapatnagay anggapoy pananisia to. Kombinsidon say pananisia to lambengat so mangitarok la na mamilagron iyabig to. Si Benedita, masimoon a Katoliko, so atenyeg a tuloy sanen abalitaan toray milagron panagtambal diad santuaryo na Aparecida do Norte, diad estadoy São Paulo, Brazil. Diad saray orasyon ya imbangat na panginaen to, nampikasi si Benedita ed Our Lady of Aparecida, San Antonio, tan arum a “sasantos” parad pakapanyarin makatambal na saray mansasakit.
Mapatnag, anggan natan et dakel nin siansiay manisia ed mamilagron panagtambal—balet akin? Maseguro, arum so nadidismaya sano agnapakepa na saray doktor so pansakit, ot-ot, tan paniirap na saray inad-aro ra, nagkalalo la ed ananak da. Liknaen na saramay manasagmak na manbayag a sakit a lapud kabili na modernon panagtambal et anggapoy uges na panali ra’d panagtambal ed panamegley na pananisia (faith healing). Nababantayan na arum ed TV iray nanduruman relihyon tan indibidual a mangiyoopresi na pakatambal ed AIDS, pirmin gonigon, kanser, inkaatiris, alta presyon, tan dakel niran beblay. Balanglan manisisia ed saratan odino andi, nayarin onkonsulta ira ed sikara bilang ultimon remedyo. Anggaman say arum a manisian say pansasakit da et manlalapud mauges iran espiritu so manisip ya anggapoy nagawaan na inkalapagan a panagtambal.
Diad biek a dapag, walaramay sumpan tuloy, mangokondena ni ingen, ed ideyan milagron panagtambal na inaatey a “sasantos” odino mabilay iran managtambal. Unong ed Jornal da Tarde, moriaen nen immunologist a Dráusio Varella a satan a sisiaen et “panleglemew ed pananisia na saray palpalaran tan desperado.” Inyarum to ni: “Lapud paniilalo’d saray milagro, nayarin ibaliwala na dakel so kaimportantian na medikal a panagtambal lapud sarayan managpalikdo.” Tan oniay ipapaliwawa na The New Encyclopædia Britannica: “Diad apalabas et nisisiglaot iray ag-inkalapagan a panagtambal ed sagradon paspasen tan relihyoso iran ritual, tan onkikiling so medikal a siensia a saratan ya amin a panagtambal et manlalapud normal a paraan na panaghipnotismo a nipapakurang ed paborabli iran kipapasen.” Dakel niran siansiay manisia a sikaray talagan atambal lapud milagro. Parad sikara et epektiboy panpatambal!
Amta na saramay mikabisado ed Biblia ya amaabig si Jesu-Kristo na saray mansasakit diad dakel ya inkagawa, a ginawa iya diad “pakapanyari Dios.” (Lucas 9:42, 43) Kanian panumamengan da, ‘Kasin siansia ni a manpapakurang tan pansesengegan na saray mamilagron panagtambal so pakapanyari na Dios?’ No ontan, akin a saray pansasalin mantambal et agda nagawaay nipaseguro iran resulta? Kasin lapud kulang so pananisia odino melag so donasyon na pasienti? Manepeg kasi parad Kristiano a mamilagron manpatambal sano sikatoy manasagmak na ot-ot odino anganko et agnatambal a sakit? Tan kasin naulit ni so ag-onsaew a nengneng na mamilagron impantatambal nen Jesus? Naamtaan moray ebat ed sarayan importantin tepet diad ontumbok ya artikulo.