Asingger Lay Mamilagron Katambal na Katooan

“AG-ITAYO ni akanengneng na onia.” So inkuan na saray akatasi ed mamilagro tan tampol ya impamaabig nen Jesus ed paralitikon laki. (Marcos 2:12) Pinaabig met nen Jesus iray bulag, umel, tan saray piley, tan ontan met so ginawa na saray patumbok to. Diad anton pakapanyari a ginawa nen Jesus itan? Antoy papel na pananisia? Anton pakaliwawaan so isisinag na sarayan inmunan-siglon eksperiensia ed mamilagron panagtambal natan?​—Mateo 15:30, 31.

“Say Pananisiam Pinaabig Toka”

Labalabay na saray managtambal natan a salambiten so inkuan nen Jesus ed sakey a biin 12 taon lan manpaparala a nanpatambal ed sikato: “Say pananisiam pinaabig toka.” (Lucas 8:43-48) Impatnag ta na balikas nen Jesus a say inyabig na bii et nandependi’d pananisia to? Kasin alimbawa itan na “panagtambal ed panamegley na pananisia” a singa gagawaen natan?

Sano basaen tayon maong so rekord na Biblia, naamtaan tayon diad maslak ya inkagawa et agkinaukolan nen Jesus tan saray babangatan to ed saray mansasakit so pananisia ra sakbay daran tinambal. Say biin asalambit ed tagey so inmasingger tan anggapon balot so imbaga to a nankalkalnan diniwit toy kawes nen Jesus diad benegan tan “tampol a tinmunda so pambulos na dala to.” Diad sananey nin inkagawa, pinaabig nen Jesus so lakin kaiba na saramay linman angerel ed sikato. Pinaabig to ni ingen so toon agto amta no siopa si Jesus.​—Lucas 22:50, 51; Juan 5:5-9, 13; 9:24-34.

Sirin, antoy papel na pananisia? Sanen walad distritoy Tiro tan Sidon si Jesus tan saray babangatan to, linmay sakey a biin taga-Canaan tan inkelyaw to: “Kasian mo ak komon, O Katawan, sika Anak nen David. Say ana’ko a bii papairapen a tuloy na sakey a demonyo.” Isipen pay inkaandiay-ilalo to legan ton iyeey-ey: “Katawan, tulongan mo ak!” Lapud napnoy panangabagey, inyebat nen Jesus: “O bii, baleg so pananisiam; nagawa ed sika so unong na kaliktan mo.” Tan inmabig so anak ton bii “nanlapu ed saman ya oras.” (Mateo 15:21-28) Malinlinew, nasasaglawi so pananisia, balet siopan pananisia? Imanoen a say inrayew nen Jesus et say pananisia na ina, aliwan say mansasakit ya anak. Tan pananisia ed anto? Diad itatawag to’d Jesus bilang “Katawan, sika Anak nen David,” mapublikon binidbir na bii a si Jesus so insipan a Mesias. Satan so aliwan basta balikas na pananisia ed Dios odino pananisia ed pakapanyari na managtambal. Sanen inkuan nen Jesus a, “Say pananisiam pinaabig toka,” say labay ton ibaga et no agda panisiaan a sikato so Mesias et agnampatambal komon ed sikato iray maniirap.

Manlapud sarayan Makasulatan ya alimbawa, natalosan tayo a say impanpapaabig nen Jesus so duman tuloy ed kaslakan a nanenengneng tayo odino nikuan natan. Anggapoy pakapatnagan a ma-emosyon​—paneyag, pankantoris, pandageyem, panalingataw, tan arum nira​—manlapud karaklan tan agnanalipogpog si Jesus. Niarum ni, agbalot sinmaew si Jesus a mamaabig ed saray walaay beblay ya ibabaraan ton andian iray pananisia odino lapud agmabunlok so apay da.

Panagpaabig ed Panamegley na Pakapanyari Dios

Panon ya agawa so panagtambal nen Jesus tan saray babangatan to? “Wala ed sikato so pakapanyari Katawan [Jehova, NW] a manambal,” so ebat na Biblia. (Lucas 5:17) Kayari sakey ya impanambal, kuan na Lucas 9:43, “nikelawan ira ya amin ed baleg a pakapanyari Dios.” Matukotukoy, ag-impaimano nen Jesus so inkasikato bilang say managtambal. Diad sakey ya inkagawa, inkuanto’d toon amapawayan toy panamairap na demonyo: “Onla ka ed abung mo ed saray kakaarom, tan ibagam ed sikara no panon kabaleg so bengabengatla a say Katawan [Jehova, NW] ginawa to nipaakar ed sika, tan no panon so panangasi to ed sika.”​—Marcos 5:19.

Lapud nanpapaabig si Jesus tan saray apostol to diad pakapanyari na Dios, mainomay a talosan no akin ya aglawas kaukolan so pananisia na tatambalen pian natambal. Balet, kapilitan ed biang na managtambal so mabiskeg a pananisia. Kanian, sanen agnapapaway na saray patumbok nen Jesus so mabiskeg a demonyo, imbaga nen Jesus ed sikara so rason: “Nisengeg ed melag a pananisia yo.”​—Mateo 17:20.

Gagala na Mamilagron Panagtambal

Anggaman dakel so impantatambal nen Jesus ed intiron mangaraldalin a ministeryo to, agto ginemtan a manuna so ‘panagtambal a ministeryo.’ Say mamilagron panagtambal to​—ya agton balot pinambayar iray totoo odino kinerewan na antokaman a donasyon​—so onkomadua labat ed manunan kimey to, salanti say ‘panangipulong to’y ebanghelyo na panarian.’ (Mateo 9:35) Ibabaga na rekord a diad sakey ya inkagawa “inawa’ tora, tan akisalitaan tora nipaakar ed panaria’y Dios, et saray nankaukolan na pananambal tinambal tora.” (Lucas 9:11) Diad salaysay na Ebanghelyo, mabetbet a tinawag si Jesus a “Managbangat” balet agbalot tinawag a “Managtambal.”

Sirin, akin a mamilagron nantatambal si Jesus? Manuna et pian iletneg so pakabidbiran ed sikato bilang say insipan a Mesias. Sanen agmakatunongan ya inpisok si Juan a Managbautismo, labay ton naseguron asumpal toy angibakian na Dios ed sikaton gawaen. Imbaki to iray mismon babangatan to ed si Jesus tan intepet: “Sika’man so onla dia, ono alagden mi’ sananey?” Imanoen so imbaga nen Jesus ed saray babangatan nen Juan: “Onla kayo la, tan ibaga yo ed Juan so saray bengatlan narengel tan nanengneng yo. Saray bulag awaten da’y pakanengneng da, tan saray piley manakar ira, saray akating alinisan ira, tan saray telek makadngel ira, tan saray inaatey inmoli ra ed bilay, tan nipulong ed saray duruka so maong a balita.”​—Mateo 11:2-5.

On, say bengatlan aglambengat nantatambal si Jesus noagta nanggagawa met na saray milagro a nirekord diad saray Ebanghelyo so mapekder ya angiletneg na pakabidbiran to bilang ‘samay onla dia,’ say insipan a Mesias. Agla kaukolan na siopaman ya ‘alagdey sananey.’

Mamilagron Panagtambal Natan?

Sirin, nepeg tayo ta’n ilaloan a paneknekan na Dios so pakapanyari to natan diad panamegley na panagtambal? Andi. Lapud mamilagron kimkimey a ginawa to diad panamegley na pakapanyari na Dios, andi-duaruwan niletneg nen Jesus a sikato imay Mesias ya insipan na Dios ya onsabi. Nirekord ed Biblia iray makapanyarin gawa nen Jesus pian nabasa na amin. Agla kaukolan a paneknekan na Dios so pakapanyari to diad pangulit ed saratan a gawa ed kada kailalakan na totoo.

Makapainteres, saray panagtambal tan arum nin mamilagron kimey so makakombinsi labat ed sakey a kipapasen. Walara ingey akatasi ed saray milagro nen Jesus ya agmanisian sikatoy tutulongan na mangatatawen ya Ama to. “Anggan nanggawa na amayamay a tanda ed arapan da, agni ra anisia ed sikato.” (Juan 12:37) Satan so rason a, kayari impaningbat ed nanduruman mamilagron langkap​—panangipropesiya, pansalitay nanduruma, panagtambal, tan arum ni​—ya initer na Dios ed nanduruman membro na inmunan-siglon Kristianon kongregasyon, apuyanan si apostol Pablo a mangibaga: “Anggan wala ni so saray propesiyas, mangangga ira; anggan wala niray salita, ontunda ra; anggan wala niray karunongan, naerep ira. Ta amta tayo so arum, tan propetaan tayo so arum; et bangno say ayadyari so ondateng, say agni ayadyari so naekal.”​—1 Corinto 12:28-31; 13:8-10.

Siempre, importanti parad pankaabigan tayo so pananisia ed Dios. Balet, say pangibase pananisia ed palson sipasipan na panagtambal et mansumpal labat ed pakadismaya. Sakey ni, nipaakar ed panaon na anggaan, oniay impasakbay nen Jesus: “Onalagey naani so saray tilatilan Kristo, tan tilatilan propetas, tan mangipanengneng ira naani na ankabaleg a tanda tan pakpakelaw, pian mangibalang ira, no nayari, pati saray pinili.” (Mateo 24:24) Likud ed panangibalang tan panamalikdo, wadtan met iray panangipatnag na demonikon pakayari. Bilang resulta, saray ibabagan agnipaliwawan ebento so agtayo nepeg a pankelawan, tan saraya so peteg ya aliwan basiyan parad puron pananisia ed Dios.

Lapud anggapoy anggan sakey natan a makapanpaabig a singa ed ginawa nen Jesus, kasin pakaskasi tayo la? Andin balot. Diad tua, saramay pinaabig nen Jesus so diad kaunoran et nansakit lamet. Amin da so tinmatatken tan inaatey. Aganggano labat iray epektoy inyabig da. Balet, say mamilagron impantatambal nen Jesus so walaan na magnayon a kabaliksan lapud iyaanino na saratan so bendisyon ed arapen.

Kanian, kayari impangusisa ed Salita na Dios, say Biblia, si Alexandre tan Benedita, ya asalambit ed inmuna, so agla manisia ed modernon panagtambal ed panamegley na pananisia tan espiritistikon panagpaabig. Anggaman ontan, kombinsido ira a say mamilagron panagtambal et aliwan bengatlan apalabas. Akin ya ontan? Singa minilyon ed sankamundoan, sikaray maniilalo ed saray bendisyon na panagtambal diad silong na Panariay Dios.—Mateo 6:10.

Anggapo Lay Sakit tan Ipapatey

Singa anengneng tayo ed akadkauna, say manunan gagala na ministeryo nen Jesus et aliwan say panambal ed saray mansasakit tan arum niran panagmilagro. Imbes, ginawa ton manunan kimey so panangipulong ed maong a balita na Panariay Dios. (Mateo 9:35; Lucas 4:43; 8:1) Satan a Panarian so instruminto na Dios ed panumpal ed mamilagron katambal na katooan tan ed pangekal na amin a deral ya inbunton na kasalanan tan ag-inkayadyari ed atooan a pamilya. Panon tan kapigan ton sumpalen iyan amin?

Diad pangipapasakbay ed arawi nin arapen, inikdan nen Kristo Jesus so apostol ton Juan na mapropetikon pasingawey: “Natan sinmabi la so kilalaban, tan say pakayari tan say nanarian na Dios tayo, tan say pakauley nen Kristo to!” (Apocalipsis 12:10) Ipapanengneng na amin ya ebidensia a nanlapulad 1914 say baleg a sumusumpa na Dios, si Satanas, so nibasileng diad kabangibang na dalin, tan say Panarian so onkukurang la natan bilang inkapeteg! Nitrono la si Jesus bilang Ari na Mesianikon Panarian tan akaparaan la natan a mamasimbalo ed dalin.

Diad asingsingger lan arapen, say mangatatawen a gobierno nen Jesus so manguley ed intiron matunong a balon sosyedad na too, bilang resulta et sakey a “dalin a balo.” (2 Pedro 3:13) Sirin antoy magmaliw a kipapasen? Nia so maglorian paunan-pasimar: “Akanengneng ak na sakey a tawen a balo tan sakey a dalin a balo; ta say ona a tawen tan say ona a dalin linmabas lara . . . Tan punasen to [Dios] so amin a lua ed kamataan da, tan andi-gapo la naani ipatey, tan anggapo la naani onnangis o dageyem, o ot-ot. Ta saray ona a bengatla sikara so linmabas la.”—Apocalipsis 21:1, 4.

Nilitratom ta ed kanonotan mo no antoy itsura na bilay sano nagawa lay mamilagron panagtambal ed katooan? “Say manaayam agto naani ikuan: ‘Mabeblay ak.’ Saray ombaley a manayam diman napaandi naani inkauges da.” On, gawaen na Dios so agbalot nagawaan na saray managtambal. “Inakmon to so patey ed ando la ando.” Peteg, “say Katawan a Jehova punasen to naani so saray lua ya onagus ed saray amin a lupa.”​—Isaias 25:8; 33:24.

[Litrato ed pahina 7]

Diad silong na Panariay Dios say katooan so mamilagron natambal