Mas Dakel a Panamendision ed Balon Sipanan

“Si Jesus . . . so manamegley ed sakey a sipan a magmaong.”​—HEBREOS 8:6.

1. Siopay apaneknekan a ‘bini na bii’ a nisipan ed Eden, tan panon a sikatoy ‘asugatan ed mukor’?

KAYARI impankasalanan di Adan tan Eva, inukom nen Jehova si Satanas, samay amalikdo ed si Eva, a kuanto: “Mangyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:15) Sanen abautismoan si Jesus ed Ilog Jordan nen 29 K.P., say binin insipan diad Eden so asabin inmapireng la. Diad impatey to ed panamairapan a kiew nen 33 K.P., walay asumpal ed saman a kadaanan a propesiya. ‘Sinugat [nen Satanas] so mukor’ na say Bini.

2. Unong ed saray salitan mismo nen Jesus, panon a say impatey to et mangugungguna ed sankatooan?

² Maong, ta saman a sugat, anggaman makapaot-ot, so aliwan permanenti. Si Jesus so pinaoli manlapud inaatey diad imortal ya espiritu tan tinmokotok ed Ama to diad tawen, no iner et inter to so kablian na nipaagos a dala to bilang “panondon ed amayamay.” Kanian, tinmua iray mismon salita to: “Nakaukolan a nipaalagey so Anak na too. Pian siopaman a manisia wala ed sikato so bilay ya andi-anggaan. Ta ontanlay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Mateo 20:28; John 3:14-16; Hebreos 9:12-14) Walay importantin betang na balon sipanan diad kasumpalan na propesiya nen Jesus.

Say Balon Sipanan

3. Kapigan ya inmunan anengneng so inkurang na balon sipanan?

³ Kasakbayay impatey to, imbaga nen Jesus ed saray patumbok to a say nipaagos a dala to so ‘dala na [balon] sipanan.’ (Mateo 26:28; Lucas 22:20) Samploran agew kayari intokotok to ed tawen, naimano lay kikukurang na balon sipanan sanen nikalbo so masanton espiritu ed 120 a babangatan a nandaragup diad tagey a kuarto ed Jerusalem. (Gawa 1:15; 2:1-4) Impanengneng na inkitarok na sarayan 120 a babangatan ed balon sipanan a say “inmuna” a sipanan, say Ganggan a sipanan, so daan la.​—Hebreos 8:13.

4. Kasin say daan a sipanan so kinmulang? Isalaysay.

⁴ Kasin say daan a sipanan so kinmulang? Andin balot. Tua, lapud asalatan la itan natan, say Israel ed laman so agla espisyal a totoo na Dios. (Mateo 23:38) Balet nisengeg itan ed inkatunganga tan impangipulisay na Israel ed Alanaan a Sakey nen Jehova. (Exodo 19:5; Gawa 2:22, 23) Balet, sakbay ya asalatan so Ganggan, baleg so agawaan to. Diad loob na dakel a siglo et angitarok itan na dalan ed iyaasingger ed Dios tan proteksion manlapud palson relihyon. Lugan toray pataway na balon sipanan tan, tekep na saray naulit-ulit a bagat et angidemostra ed pirmin pankaukolan na too ed kibulos manlapud kasalanan tan ipapatey. On, say Ganggan so ‘managbangat a mangitarok ed Kristo.’ (Galacia 3:19, 24; Roma 3:20; 4:15; 5:12; Hebreos 10:1, 2) Balet, diad panamegley na balon sipanan a say nisipan a bendision diad si Abraham so namoria la ed inkagnap to.

Abendisionan a Nasyones ed Bini nen Abraham

5, 6. Diad manuna, ya espiritual a kasumpalan na Abrahamikon sipanan, siopay Bini nen Abraham, tan dinan a nasyon so inmunan abendisionan diad panamegley to?

⁵ Insipan nen Jehova ed si Abraham: “Dia ed ilalak mo so pakapiparalanan na saray amin a nasyon dia.” (Genesis 22:18) Diad silong na daan a sipanan, dakel a mauyamon sankaili so abendisionan diad impilimog da ed Israel, say nasyonal a bini nen Abraham. Balet, diad manunan espiritual a kasumpalan to, say Bini nen Abraham et sakey ya ayadyarin too. Insalaysay iya nen Pablo sanen inkuanto: “Agawa lanti so saray sipan ed Abraham, tan say ilalak to. Agto kuan: ‘Tan saray ilalak to,’ singa nipaakar ed dakerakel, noag ingen ed saksakey: ‘Tan say ilalak mo,’ a sikato si Kristo.”​—Galacia 3:16.

⁶ On, si Jesus so Bini nen Abraham, tan diad panamegley To et saray nasyon so nabendisionan na superyor nen antokaman nin posibli parad Israel ed laman. On, say inmunan nasyon ya akaawat na sayan bendision et say Israel a mismo. Kayarin tuloy na Pentecostes 33 K.P., inkuan nen apostol Pedro ed sakey a grupo na Judios: “Sikayoray anak na saray propetas, tan say sipan a ginawa na Dios ed saray atateng yo, a nankuan ed Abraham, ‘Et dia ed polim nabendisionan so amin a sankabaley dia ed dalin.’ Say Dios, kayari impamaoli to ed bilay ed Aripen to a si Jesus, sikato so imbaki to ya inmuna ed sikayo, pian bendisionan to kayo, ya iyarawi to so sinansakey ed sikayo ed saray kaugsan yo.”​—Gawa 3:25, 26.

7. Antoran nasyon so abendisionan diad panamegley nen Jesus, say Bini nen Abraham?

⁷ Ag-abayag say bendision so ninatnat ed saray Samaritano insan diad saray Gentil. (Gawa 8:14-17; 10:34-48) Anganko diad baetan na 50 tan 52 K.P., sinulatan nen Pablo iray Kristiano ed Galacia diad Asia Minor: “Saray sulat, dia ed impakanengneng to nensaman a say Dios lapud pananisia patunongen to so saray Gentiles, inmuna ya impulong to so ebanghelyo ed Abraham, ya inkuanto: ‘Nabendisionan ira ed sika so saray amin a nasyones.’ Kanian saray mananisia nabendisionan ira sirin a makapinabang ed mananisia ya Abraham.” (Galacia 3:8, 9; Genesis 12:3) Anggaman dakel a Kristiano ed Galacia so “Gentiles,” abendisionan ira diad panamegley nen Jesus lapud pananisia ra. Diad anton dalan?

8. Parad Kristianos ed agew nen Pablo, say kabebendisionan diad panamegley na Bini nen Abraham et laktipen toy anto, tan pigara, diad kaunoran, so makaawat na ontan a panamendision?

⁸ Imbaga nen Pablo ed saray Kristianon taga-Galacia, antokamay abenegan da: “No sikayo kien kayo nen Kristo, ontan sirin ilalak kayo nen Abraham, tan mananawir unong ed sipan.” (Galacia 3:29) Parad saraman a taga-Galacia, say bendision diad panamegley na Bini nen Abraham et laktipen toy pakapibali ra ed balon sipanan tan pagmaliw a minanawir nen Jesus, kaiba nen Jesus diad bini nen Abraham. Agtayo amta so populasyon na inmunan Israel. Amta tayo labat so nagmaliwan to a “singa say buer a wala ed gilig na dayat dia ed karakel.” (1 Arari 4:20) Balet, amta tayo so pinal a bilang na nakaiba nen Jesus diad espiritual a bini​—144,000. (Apocalipsis 7:4; 14:1) Saraman ya 144,000 so pinmaway ed “balang kailalakan, tan salita tan baley, tan nasyon” na katooan tan kaiba a mangipakurang na panamendision ed arum nira na say Abrahamikon sipanan.​—Apocalipsis 5:9.

Sakey a Propesiyan Asumpal

9. Panon a saramay walad balon sipanan et walad akindalem da so ganggan nen Jehova?

⁹ Sanen ipasakbay so balon sipanan, insulat nen Jeremias: “‘Saya so sipan a gawaen ko naani ed abung na Israel kayari na saraman ya agew,’ kuanen Jehova. ‘Yan ko naani tunong ko ed saray akindalem a kabiangan da, tan dia ed puso ra sikato so isulat ko naani.’” (Jeremias 31:33) Ugali na saramay kabiangay balon sipanan a panlingkoran si Jehova lapud aro. (Juan 13:35; Hebreos 1:9) Say ganggan nen Jehova so nisulat ed kapusoan da, tan masimoon dan panpipilalekan a gawaen so linawa to. Tua, diad kadaanan ya Israel et walaray matoor a sinansakey ya inaro ran maong so ganggan nen Jehova. (Salmo 119:97) Balet, dakel so aliwan ontan. Ingen nansiansia iran kabiangan na nasyon. Anggapo so makapansiansia ed balon sipanan no say ganggan na Dios so agnisulat diad puso to.

10, 11. Parad saramay walad balon sipanan, diad anton dalan a si Jehova et ‘nagmaliw a Dios da,’ tan panon a sikato so naamtaan dan amin?

¹⁰ Inkuan ni nen Jehova nipaakar ed saramay walad balon sipanan: “Siak naani so Dios da, et sikara naani baley ko.” (Jeremias 31:33) Diad inmunan Israel dakel so nandayew ed dirios na nasyones, balet ta Israelitas niran siansia. Diad basiyan na balon sipanan, pinawala nen Jehova so sakey ya espiritual a nasyon, “say Israel na Dios,” pian onsalat ed Israel ed laman. (Galacia 6:16; Mateo 21:43; Roma 9:6-8) Balet, anggapo so nansiansian kabiangan na balon espiritual a nasyon no itunda toy mandayew ed si Jehova tan sikato labat.

¹¹ Inkuan met nen Jehova: “Sikara amta ra ak naani ya amin, manlapu ed kamelagan ed sikara angga ed kabalbalegan ed sikara.” (Jeremias 31:34) Diad Israel, dakel so bastabasta angibaliwala ed si Jehova, diad pangibabagan: “Si Jehova agnaani manggawa na maong, agmet naani manggawa na mauges.” (Sofonias 1:12) Anggapo so mansiansian kabiangan na Israel na Dios no ibaliwala toy Jehova odino dutakan toy puron panagdayew. (Mateo 6:24; Colosas 3:5) Saray espiritual ya Israelitas so “totoo ya amta ra so Dios da.” (Daniel 11:32) Panliketan da so ‘mangala na pikakabat ed saksakey a tuan Dios tan ed Jesu-Kristo.’ (Juan 17:3) Say pangamta ra’d si Jesus so mamaaralem na pikakabat da ed Dios ta, diad nikaduman paraan et si Jesus so “angipaliwawa ed [Dios].”​—Juan 1:18; 14:9-11.

12, 13. (a) Diad anton basiyan a mameperdona si Jehova ed saray kasalanan na saramay walad balon sipanan? (b) No nipaakar ed kaperdona na saray kasalanan, panon a say balon sipanan et superyor nen say daan a sipanan?

¹² Diad kaunoran, insipan nen Jehova: “Perdonaen ko naani inkauges da, tan agko la naani nonoten so kasalanan da.” (Jeremias 31:34b) Laktipen na Ganggan nen Moises so nilasus iran nisulat a totontonen a kinaukolan ed Israelitas a tuloken. (Deuteronomio 28:1, 2, 15) Amin ya onsumlang ed Ganggan so angiyapay na saray bagat pian sakbongay kasalanan da. (Levitico 4:1-7; 16:1-31) Panisiaan na dakel a Judio a napatunong ira diad dilin kimkimey da unong ed Ganggan. Balet, amoria na Kristianos ya agdan balot nakimeyan so inkatunong diad dilin kimkimey da. Agda napaliisay pankasalanan. (Roma 5:12) Diad silong na balon sipanan, say matunong a talindeg ed arap na Dios so posibli lambengat diad basiyan na bagat nen Jesus. Balet, say ontan a talindeg so sakey a regalo, agkanepegan a panangasin manlalapud Dios. (Roma 3:20, 23, 24) Siansian kakaukolanen nen Jehova so katutulok ed ariripen to. Kuanen Pablo a saramay walad balon sipanan so ‘nisilong ed ganggan nen Kristo.’​—1 Corinto 9:21.

¹³ Kanian, parad saray Kristiano met wala so bagat parad kasalanan, balet sakey a mamablin tuloy nen say saramay bagat ed silong na Ganggan a sipanan. Insulat nen Pablo: “Balang saserdote [ed silong na Ganggan a sipanan] tua a walan manlingkor ya inagew-agew tan isaklang to a maminpigapiga so saray dilin nanpapara a bagat, ya agda nayarian a balot ya ekalen so saray kasalanan. Et ingen sikato [Jesus], sanen insaklang to so saksakey a bagat lapu ed saray kasalanan dia ed andi-anggaan, inmirong ed nikawanan na Dios.” (Hebreos 10:11, 12) Lapud saray Kristiano a walad balon sipanan et mangaagamil na pananisia ed bagat nen Jesus, iyaabawag ira nen Jehova a matunong, ya anggapoy kasalanan, tan sirin et kualipikadon naturo bilang espiritual ya ilalak to. (Roma 5:1; 8:33, 34; Hebreos 10:14-18) No bilang ta mankasalanan ira lapud atooan ya ag-inkayadyari, nakerew da so panamerdona nen Jehova, tan diad basiyan na bagat nen Jesus, perdonaen ira nen Jehova. (1 Juan 2:1, 2) Balet, no pilien da so kurson ginagalan pankasalanan, nabalang da so matunong a talindeg da tan pribilihyon pakapibali ed balon sipanan.​—Hebreos 2:2, 3; 6:4-8; 10:26-31.

Say Daan tan Balon Sipanan

14. Anton panaggalsim so kinaukolan ed silong na Ganggan a sipanan? ed silong na balon sipanan?

¹⁴ Saray lalaki ed daan a sipanan so agalsiman bilang tanda a sikaray nisilong ed Ganggan. (Levitico 12:2, 3; Galacia 5:3) Kayari inggapo na Kristianon kongregasyon, liknaen na arum a saray aliwan-Judion Kristiano so nepeg a nagalsiman. Balet saray apostol tan mamatatken ed Jerusalem, diad inkiwanwan ed Salitay Dios tan ed masanton espiritu et atebek dan agla kapilitan iya. (Gawa 15:1, 5, 28, 29) Pigaran taon ed saginonor, inkuanen Pablo: “Ta aliwan Judio so Judio ed paway lambengat, tan aliwan galsim so galsim a wala ed paway na laman. Ingen ta matua a Judio so Judio ed dalem to; tan say galsim sikato so galsim na puso ed espiritu, aliwan dia ed letra.” (Roma 2:28, 29) Say literal a panaggalsim, anggan ed saray Judio ed laman, so andian na espiritual a kablian ed imaton nen Jehova. Parad saramay walad balon sipanan, say puso, aliwan say laman, so nepeg a nagalsiman. Amin a walad kanonotan, pilalek, tan motibasyon da ya agmakapaliket odino agmalinis ed imaton nen Jehova so nepeg a naekal.a Dakel natan so mabilay a testimonya ed pakayari na masanton espiritu a pasimbaloen iray padron na kanonotan diad onian dalan.​—1 Corinto 6:9-11; Galacia 5:22-24; Efeso 4:22-24.

15. Panon a napanparengan so Israel ed laman tan say Israel na Dios no nipaakar ed maarin pananguley?

¹⁵ Diad areglo na Ganggan a sipanan, si Jehova so Ari na Israel, tan asabi panaon ya inagamil to so inkasoberano to diad panamegley na atooan ya arari diad Jerusalem. (Isaias 33:22) Si Jehova so Ari met na Israel na Dios, espiritual ya Israel, tan nanlapulad 33 K.P., sikatoy nanuuley la diad panamegley nen Jesu-Kristo, ya akaawat na “amin a pakauley . . . ed tawen tan dia ed dalin.” (Mateo 28:18; Efeso 1:19-23; Colosas 1:13, 14) Natan, bibidbiren na Israel na Dios si Jesus bilang say Ari ed mangatatawen a Panarian na Dios, a niletneg la nen 1914. Si Jesus so magmaong a tuloy ya Ari nen sikara ni ingen di Hezekias, Josias, tan arum niran matoor ya ari ed kadaanan ya Israel.​—Hebreos 1:8, 9; Apocalipsis 11:15.

16. Anton klase na inkasaserdote so Israel na Dios?

¹⁶ Say Israel so aliwa lambengat a sakey a panarian noagta awalaan na alanaan ya inkasaserdote. Nen 33 K.P., sinalatan na Israel na Dios so Israel ed laman tan nagmaliw ya “aripen” nen Jehova, “saray tasi” to. (Isaias 43:10) Saray salita nen Jehova ed espiritual ya Israel a nirekord ed Isaias 43:21 tan Exodo 19:5, 6 so niyaaplika sirin ed Israel na Dios. Say balon espiritual a nasyon na Dios sirin so “apili a kapolian, peteg ya inkasaserdote, masantos a nasyon, sakey a baley na Dios a dilin kayarian to,” a responsabli ed ‘kibelyaw na karlangan nen Jehova.’ (1 Pedro 2:9) Amin na Israel na Dios, lalaki tan bibii, so manibukel na kolektibon inkasaserdote. (Galacia 3:28, 29) Bilang say segundaryon kabiangan na say bini nen Abraham, nibaga ra la natan: “Manggayaga kayo, sikayo a nasyon, a pati ombaley to.” (Deuteronomio 32:43) Saramay kabiangay espiritual ya Israel a wala ni ed dalin so manibukel ed “say matoor tan makabat ya aripen.” (Mateo 24:45-47) Dia lambengat ed pilimog ed sikara so pakapangisaklang ed Dios na naabobonan a sagradon serbisyo.

Panarian na Dios​—Say Pinal a Kasumpalan

17. Anton kiyanak so naeksperiensia na saramay walad balon sipanan?

¹⁷ Saray Israelitan niyanak kayari na 1513 K.K.P. so akapibilang ed Ganggan a sipanan ed kiyanak. Saramay ibiang nen Jehova ed balon sipanan so makaeksperiensia met na kiyanak​—diad kaso ra, espiritual a kiyanak. Sinalambit nen Jesus iya ed say Fariseon Nicodemo sanen inkuanto: “Tua, tua, kuanko ed sika, No say sakey a too agnianak a napasimbalo, agto nanengneng so panariay Dios.” (Juan 3:3) Say 120 a babangatan ed Pentecostes 33 K.P. so inmunan ag-ayadyarin totoon akasagmak na sayan balon kiyanak. Niyabawag a matunong ed silong na balon sipanan, naawat da so masanton espiritu bilang “sanla” ed maharlikan tawir da. (Efeso 1:14) Sikaray “nianak ed espiritu” pian magmaliw ya atagibin ananak na Dios, a pinagmaliw toran agagi nen Jesus tan sirin et “mitatawir ed Kristo.” (Juan 3:6; Roma 8:16, 17) Say pagmamaliw dan ‘nianak lamet’ so angilukas na dalan parad marakep iran iilaloan.

18. Say pagmamaliw a nianak lamet so mangitatarok na pankanawnawa ed anton makapakelaw iran iilaloan parad saramay walad balon sipanan?

¹⁸ Sanen amegley ed balon sipanan, wala ni ginawa nen Jesus a sipanan ed saray patumbok to, a kuanto: “Manuro ak ed sikayo na sakey a panarian, a singa say Amak anuro ed siak.” (Lucas 22:29) Sayan sipanan ed Panarian so mangitatadia na dalan ed kasumpalan na makatantandan pasingawey, a nirekord ed Daniel 7:13, 14, 22, 27. Anengneng nen Daniel so “singa sakey ya anak na too” a naiikdan na maarin autoridad na “say Inkadaan na Saray Panaon,” si Jehova a Dios. Insan anengneng nen Daniel so “saray sasanto kinayarian da so panarian.” Si Jesus imay ‘singa anak na too’ a, nen 1914, akaawat na mangatatawen a Panarian manlapud si Jehova a Dios. Saray alanaay-espiritun babangatan to so “saray sasanto” a minabang ed sikato ed satan a Panarian. (1 Tesalonica 2:12) Panon?

19, 20. (a) Para ed saramay walad balon sipanan, anto so pinal, maglorian kasumpalan na sipan nen Jehova ed si Abraham? (b) Anto nin tepet so nakakaukolan a konsideraen?

¹⁹ Kayari ipatey da, sarayan alanaan, singa si Jesus, so apaoli manlapud inaatey bilang imortal ya espiritun pinalsa pian manserbin kaiba ra bilang arari tan saserdote ed tawen. (1 Corinto 15:50-53; Apocalipsis 20:4, 6) Agaylan maglorian ilalo! “Manari ra ed tapew na dalin,” aliwa labat lan diad dalin na Canaan. (Apocalipsis 5:10) Kasin ‘kayarianen da naani pulongpinto na kakabusol da’? (Genesis 22:17) On, diad desididon paraan, sano naimatonan day kadederal na masebeg a relihyoson balangkantis, say Babilonia a Baleg, tan sano sarayan apaolin alanaan so miiba ed si Jesus ed panagpastol ed nasyones tekep na ‘setron balatyang’ tan ed panmekmek ed ulo nen Satanas. Diad ontan et nawalaan ira na betang ed pakasumpal ed pinal a detalye na propesiya ed Genesis 3:15.​—Apocalipsis 2:26, 27; 17:14; 18:20, 21; Roma 16:20.

²⁰ Siansia, nitepet tayo, Kasin say Abrahamikon sipanan tan say balon sipanan et lalanoren to labat irayan 144,000 a matoor a kakamarerwa? Andi, walaray agdirektan kabiangan na sarayan sipanan a nabendisionan diad panamegley da, a singa nanengneng tayo ed ontumbok ya artikulo.

[Paimano ed leksab]

Kasin Nanonotan Yo?

◻ Kapigan ya inmunan anengneng so inkurang na balon sipanan?

◻ Anto so agawaan diad panamegley na daan a sipanan?

◻ Siopa so manunan Bini nen Abraham, tan ed anton uksoy a saray nasyon et abendisionan diad panamegley na satan a Bini?

◻ Parad 144,000, anto so pinal a kasumpalan na Abrahamikon sipanan tan say balon sipanan?

[Litrato ed pahina 15]

Say kaperdonay kasalanan so walaay araldalem a kabaliksan parad saramay nisilong ed balon sipanan nen saramay nisilong ed daan a sipanan