Say Arum a Karnero tan say Balon Sipanan

“Saray sankaili . . . , balang sakey a manngilin ed agew a sabaton ed panamabli to ed sikato a singa sagrado, tan kinawaloto so saray sipan ko. Anggan sikara yakar kora ed masanto a palandey ko.”—ISAIAS 56:6, 7.

1. (a) Unong ed pasingawey nen Juan, anto so nasusumpal legan a napupugeran so dagem na panangukom nen Jehova? (b) Anton makatantandan ulop so anengneng nen Juan?

DIAD komapat a pasingawey diad libro na Apocalipsis, anengneng nen apostol Juan so makaderal a dagem na panangukom nen Jehova a napupugeran kaleganay pangukompleto’d katatakan na amin a membro na “say Israel na Dios.” Unona irayan nabendisionan diad panamegley nen Jesus, say prinsipal a kabiangan na bini nen Abraham. (Galacia 6:16; Genesis 22:18; Apocalipsis 7:1-4) Diad satan met lanlamang a pasingawey, ya anengneng nen Juan so “sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita . . . , manakis ira ed baleg a bosis, a kuanda: ‘Say Inkilaban ed Dios tayo a wala a manyurong ed trono, tan dia ed Kordero.’” (Apocalipsis 7:9, 10) Diad impangikuan a: ‘Say Inkilaban tayo . . . dia ed Kordero,’ ipapanengneng na baleg ya ulop a sikara met so nabebendisionan diad panamegley na Bini nen Abraham.

2. Kapigan so inyapireng na baleg ya ulop, tan panon ya akabatan itan?

² Sayan baleg ya ulop so abidbir la nen 1935, tan natan et walaay bilang a masulok a limaran milyon. Nidesigna a niliktar ed baleg a kairapan, saray membro to so nibiig parad andi-anggaan a bilay sano ibiig nen Jesus so “saray karnero” manlapud “saray kanding.” Saray Kristiano na baleg ya ulop so kabiangan na say “arum a karnero” ed ilustrasyon nen Jesus nipaakar ed saray kasimpukokan. Ilaloan da so pambilay a maando ed paraison dalin.​—Mateo 25:31-46; Juan 10:16; Apocalipsis 21:3, 4.

3. Panon a saray alanaan a Kristiano tan arum a karnero so mandumaan no nipaakar ed balon sipanan?

³ Parad 144,000, say bendision na Abrahamikon sipanan so nipakurang diad panamegley na balon sipanan. Bilang napibali ed sayan sipanan, sikaray niwalad “silong na grasya” tan “ed silong na ganggan nen Kristo.” (Roma 6:15; 1 Corinto 9:21) Kanian, say 144,000 lambengat a membro na Israel na Dios so matukoy a mibibiang ed saray emblema legan na Memoryal na impatey nen Jesus, tan diad sikara lambengat so akisipanan nen Jesus nipaakar ed Panarian. (Lucas 22:19, 20, 29) Saray membro na baleg ya ulop na Israel na Dios so agnapibali ed balon sipanan. Balet, mililimog ira ed Israel na Dios tan miayam ed “dalin” da. (Isaias 66:8) Kanian makatunongan ya ibagan sikara met so nisilong ed agkanepegan a panangasi nen Jehova tan nisilong ed ganggan nen Kristo. Anggaman ag-ira napibali ed say balon sipanan, nabenepisioan ira ed satan.

“Saray Sankaili” tan “say Israel na Dios”

4, 5. (a) Unong ed si Isaias, anton grupo so manministro ed si Jehova? (b) Panon so pakakasumpal na Isaias 56:6, 7 ed say baleg ya ulop?

⁴ Oniay insulat nen propeta Isaias: “Saray sankaili a mikasakey ed Jehova, a manlingkor ed sikato, tan mangaro ed ngaran nen Jehova, a magmaliw ira ya ariripen to, balang sakey a manngilin ed agew a sabaton ed panamabli to ed sikato a singa sagrado, tan kinawalo to so saray sipan ko. Anggan sikara yakar kora ed masanto a palandey ko, tan gawaen ko ra naani a malikeliket ed abung ko a panagpikasian. Saray napoolan a bagbagat da tan saray bagat da naawat ira naani ed tapew na altar ko.” (Isaias 56:6, 7) Diad Israel, kabaliksan na saya a “saray sankaili,” aliwan-Israelitas, so mandayew ed si Jehova​—aroen so ngaran to, tulokey kondisyones ed Ganggan a sipanan, ngilinay Sabbath, tan mangiyapay na saray bagat ed templo, say ‘abung a panagpikasian’ ed Dios.​—Mateo 21:13.

⁵ Diad agew tayo, “saray sankaili a mikasakey ed Jehova” et say baleg ya ulop. Saraya so manmiministro ed si Jehova a kaibay Israel na Dios. (Zacarias 8:23) Mangiyaapay ira na parehon bagbagat a singa say Israel na Dios. (Hebreos 13:15, 16) Mandadayew ira ed espiritual a templo na Dios, say ‘abung a panagpikasian’ to. (Ikompara so Apocalipsis 7:15.) Kasin ngingilinan day sinimban Sabbath? Saray alanaan nisay arum a karnero so agniganggan a manggawa na onia. (Colosas 2:16, 17) Balet, inkuan nen Pablo ed saray Hebreon Kristiano: “Wala so nakdaan ni sirin a sakey a panpainawa nipaakar ed baley na Dios. Ta say linmoob ed panpainawa to, dili a sikato nanpainawa met ed saray kimey to unong a say Dios tinmunda ed saray kimey to.” (Hebreos 4:9, 10) Saraman a Hebreo so linmoob ed sayan “panpainawa” sanen nampasakop ira ed “katunongan na Dios” tan nampainawa ed panasalin ikatunongay inkasikara diad kimkimey na say Ganggan. (Roma 10:3, 4) Panggagayagaay alanaan iran Gentil a Kristiano so parehon painawa diad panpapasakop da’d inkatunong nen Jehova. Miuulop ed sikara so baleg ya ulop ed satan a painawa.

6. Panon ya isisilong na arum a karnero natan na inkasikara ed balon sipanan?

⁶ Niarum ni, isisilong na arum a karnero so inkasikara ed balon sipanan no panon a saray sankaili ed inmuna so sinmilong ed Ganggan a sipanan. Diad anton dalan? Aliwan diad pagmaliw a napibali ed satan noagta diad panpasakop ed saray ganggan a nisiglaot ed satan tan diad pangungguna manlapud saray areglo to. (Ikompara so Jeremias 31:33, 34.) Singa saray alanaan a kaiba ra, nisulat ‘ed puso’ na baleg ya ulop iray ganggan nen Jehova. Inadaro tan tutuloken dan maong iray ganggan tan prinsipyo nen Jehova. (Salmo 37:31; 119:97) Singa saray alanaan a Kristiano, kabat da si Jehova. (Juan 17:3) Komusta balet so panaggalsim? Manga 1,500 taon sakbay na inkatibukel na balon sipanan, pinaseseg nen Moises iray Israelita: “Galsiman yo sirin so baog a dapit arap na puso yo.” (Deuteronomio 10:16; Jeremias 4:4) Bangta say kapilitan a panaggalsim ed laman so apaandi la kabansag na say Ganggan, namparan saray alanaan tan arum a karnero so nepeg a ‘galsiman’ so kapusoan da. (Colosas 2:11) Kaunoran, peperdonaen nen Jehova iray lingo na say arum a karnero diad basiyan na nipaagos a ‘dala ed sipan’ nen Jesus. (Mateo 26:28; 1 Juan 1:9; 2:2) Ag-ira tatagibien na Dios bilang espiritual ya ilalak, a singa gagawaen to ed 144,000. Balet talagan idedeklara to so arum a karnero a matunong, no panon a nideklara met a matunong si Abraham bilang kaaro na Dios.​—Mateo 25:46; Roma 4:2, 3; Santiago 2:23.

7. Anton ilaloan so nilulukas natan ed arum a karnero, a nideklaran matunong a singa met ed si Abraham?

⁷ Parad saray 144,000, say kideklaran matunong so angilukas ed panilalo ran miuley ed si Jesus diad mangatatawen a Panarian. (Roma 8:16, 17; Galacia 2:16) Parad say arum a karnero, say kideklaran matunong bilang kakaaro na Dios so mangiyaabuloy ed sikaran nasayakop so ilalon andi-anggaan a bilay diad paraison dalin—balanglan diad kiliktar ed Armagedon bilang kabiangan na baleg ya ulop odino diad “kioli ed bilay na saray matunong.” (Gawa 24:15) Agaylan pribilihyo so pakawalaay ontan ya ilalo tan pakapagmaliw a kaaro na Soberanoy uniberso, a “manayam ed tabernakulo” to! (Salmo 15:1, 2) On, namparan saray alanaan tan arum a karnero so nabebendisionan diad makapakelaw a dalan diad panamegley nen Jesus, say Bini nen Abraham.

Babaleg ya Agew na Pananakbong

8. Anto so ililitrato na Agew na Pananakbong iran bagat ed silong na Ganggan?

⁸ Sanen sisingbaten so balon sipanan, pinanonotan nen Pablo iray managbasa to nipaakar ed tinaon ya Agew na Pananakbong ed silong na Ganggan a sipanan. Diad satan ya agew et niyaapay iray nanbiigan a bagat—say sakey et parad makasaserdoten tribu nen Levi tan say sakey et parad saray 12 agmakasaserdoten tribu. Abayaglan nisalaysay iya a mangililitrato ed baleg a bagat nen Jesus a mangungguna ed namparan 144,000 a walaay mangatatawen ya ilalo tan ed minilyon a walaan na mangaraldalin ya ilalo.a Impanengneng nen Pablo a diad kasumpalan et saray gungguna na bagat nen Jesus so nipakurang diad panamegley na babaleg ya Agew na Pananakbong ed silong na balon sipanan. Bilang Atagey a Saserdote ed sayan babaleg ya agew, inter nen Jesus so ayadyarin bilay to bilang pananakbong a bagat ta pian nakapet so ‘maandon karondon’ parad totoo.​—Hebreos 9:11-24.

9. Diad impibilang ed balon sipanan, anto so nasayakop na Hebreon alanaan a Kristianos?

⁹ Dakel a Hebreon Kristiano ed inmunan siglo so siansian “mapilit iran manumpal na [Mosaikon] Ganggan.” (Gawa 21:20) Matukotukoy, sirin, a pinanonotan ira nen Pablo: “[Si Jesus] so manamegley na sakey a balon sipan, pian bangta wala so sakey ya inatey a nisengeg ed pananondon ed saray kasalanan ya agawa ed lepsag na inmunan sipan saray atawag awaten da komon so sipan na tawir ya andi-anggaan.” (Hebreos 9:15) Say balon sipanan so angibulos ed Hebreon Kristianos manlapud daan a sipanan, ya angiwalwal ed inkamakasalanan da. Maong ta wala so balon sipanan, nasayakop da la so “sipan na [mangatatawen a] tawir ya andi-anggaan.”

10. Diad anto so pisalamatan na saray alanaan tan arum a karnero ed Dios?

¹⁰ “Siopaman” a “manisia ed Anak” so nagunggunaan ed dondon bagat. (Juan 3:16, 36) Inkuan nen Pablo: “Si Kristo nisaklang ed aminpinsan pian awaten to so saray kasalanan na saray dakel; ompatnag naani dia ed komadua, agnipaakar ed pangekal na kasalanan, noag lapu ed kilalaban na saray manaalagar ed sikato.” (Hebreos 9:28) Natan, saramay masimoon a manaanap ed si Jesus et laktipen da iramay manbibilay nin alanaan a Kristianos na Israel na Dios tan minilyon a manitibukel ed baleg ya ulop, a walaan met na andi-anggaan a tawir. Pisasalamatan na namparan klase so Dios lapud balon sipanan tan ed manangiter-bilay iran bendision a sasaglawien na satan, pati say babaleg ya Agew na Pananakbong tan say serbisyo na Atagey a Saserdote, si Jesus, diad mangatatawen a Sankasantosan.

Okupado ed Sagradon Serbisyo

11. Tekep na alinisan iran konsiensia diad panamegley na bagat nen Jesus, anto so namparan panliliketan a gagawaen na saray alanaan tan arum a karnero?

¹¹ Diad sulat to ed Hebreos, indanet nen Pablo so superyor a kablian na bagat nen Jesus ed areglo na balon sipanan no ikompara ed panangiyapay lapud kasalanan ed silong na daan a sipanan. (Hebreos 9:13-15) Nayarian na magmaong a bagat nen Jesus a ‘linisan iray konsiensia tayo nisengeg ed saray inatey a gawa pian makapanlingkor tayo ed Dios a mabilay.’ Parad Hebreon Kristianos, laktipen na “saray inatey a gawa” so “saray kasalanan ya agawa ed lepsag na inmunan sipan.” Parad Kristianos natan, laktipen na saratan iray kasalanan ya agawa ed apalabas a tuan nagbabawian tan pinerdona la na Dios. (1 Corinto 6:9-11) Diad inkalinisan na saray konsiensia, saray alanaan a Kristiano so mangisasaklang na ‘lingkor ed Dios a mabilay.’ Pati met so baleg ya ulop. Lapud alinisan iray konsiensia ra diad panamegley na “dala na Kordero,” wala ira’d baleg ya espiritual a templo na Dios, a ‘panlilingkoran da ed agew tan labi.’—Apocalipsis 7:14, 15.

12. Panon tayon nipanengneng a walaan tayo na “napno a katuaan na pananisia”?

¹² Niarum ni, inkuan nen Pablo: “Onsingger itayo komon ed puso a matua, ed napno a katuaan na pananisia, a walan awalsikan so saray kapusoan tayo pian nalinisan itayo ed sakey a mauges a konsiensia tan naurasan so laman tayo ed danum a malinew.” (Hebreos 10:22) Panon tayon nipanengneng a walaan itayoy “napno a katuaan na pananisia”? Pinaseseg nen Pablo iray Hebreon Kristianos: “Mansiansia itayo komon a malet tan agnagiing ed panangiparungtal na [mangatatawen ya] ilalo tayo; ta matoor iman so angisipan. Tan manpapagalangan itayo ed sakey tan sakey pian manaayatan itayo ed aro tan dia ed saray maabig a gawa. Ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:23-25) No mabilay so pananisia tayo, agtayo met “paulyan so saray panmumuyong tayo.” Panliketan tayon ayatey agagi tayo tan paayat ed sikara diad aro tan ed saray maabig a gawa tan pakapabiskeg parad makanan kimey a panangiwakawak na ilalo tayo ed publiko, balanglan satan et mangaraldalin odino mangatatawen.​—Juan 13:35.

Say “Maandon Sipan”

13, 14. Diad antoran dalan a say balon sipanan et maando?

¹³ Anto so nagawa sano say unor a kabiangay 144,000 et namoria da lay mangatatawen ya ilalo ra? Kasin ontunda lan onaplikay balon sipanan? Diad satan a panaon, anggapo lay membro na Israel na Dios ed dalin. Amin a napibilang ed sipanan so kaiba la nen Jesus “dima’d panarian nen Ama” to. (Mateo 26:29) Balet nanonotan tayoray salita nen Pablo ed sulat to ed saray Hebreo: “Say Dios na kareenan . . . lapu ed talonggaring na dala na maandon sipan, inuli to ya inawit ed saray inatey so sankabalgan a pastor na saray karnero.” (Hebreos 13:20; Isaias 55:3) Diad anton pantalos a say balon sipanan et maando?

¹⁴ Unona, aliwan singa say Ganggan a sipanan, agbalot itan nasalatan. Komadua, saray resulta na inkikurang to so permanenti, a singa met ed inkaari nen Jesus. (Ikompara so Lucas 1:33 ed 1 Corinto 15:27, 28.) Say mangatatawen a Panarian so walaan na magnayon a pasen ed saray gagala nen Jehova. (Apocalipsis 22:5) Tan komatlo, mantultuloy a nagunggunaan so arum a karnero ed aregloy balon sipanan. Legan na Sanlibon Taon ya Uley nen Kristo, itultuloy na matoor a totoon “panlingkoran [si Jehova] ed agew tan labi ed templo” a singa gagawaen da la natan. Agla nonoten nen Jehova iray kasalanan da ed apalabas ya aperdona la ed basiyan na “dala na sipanan” nen Jesus. Mantultuloy dan panggayagaan so matunong a talindeg bilang kakaaro nen Jehova, tan say ganggan to so siansian akasulat ed kapusoan da.

15. Deskribien so relasyon nen Jehova ed mangaraldalin iran managdayew ed balon mundo.

¹⁵ Kasin nibaga la’d satan nen Jehova nipaakar ed sarayan aripen a totoo: ‘Siak so Dios da, tan sikaray totook’? On. “Sikato so manayam naani ed sikara, tan sikara naani baley to. Tan say Dios met lanlamang so wala naani ed sikara.” (Apocalipsis 21:3) Magmaliw iran “kampamento na saray sasantos,” mangaraldalin a representanti na “syudad ya inararo,” say mangatatawen a nobya nen Jesu-Kristo. (Apocalipsis 14:1; 20:9; 21:2) Amin na saya so posibli lapud pananisia ra ed nipaagos a “dala na sipanan” nen Jesus tan ed panagpasakop da ed mangatatawen ya arari tan saserdotes, a sanen walad dalin et Israel na Dios.​—Apocalipsis 5:10.

16. (a) Antoran posibilidad so manatalaran ed saray napaoli ed dalin? (b) Antoran bendision so onsabi ed sampot na sanlibon taon?

¹⁶ Komusta balet iray inaatey ya apaoli ed dalin? (Juan 5:28, 29) Sikara met so naimbitaan a “pakapikapalaranan” diad panamegley nen Jesus, say Bini nen Abraham. (Genesis 22:18) Kaukolan ya aroen da met so ngaran nen Jehova, manministro ed sikato, mangiyapay na naabobonan a bagbagat, tan mangisaklang na sagradon serbisyo diad abung a panagpikasian to. Saramay manggawa ed ontan so makaloob ed painawa na Dios. (Isaias 56:6, 7) Diad sampot na sanlibon taon, amin a matoor so nitarok la’d atooan ya inkayadyari diad panagministro nen Jesu-Kristo tan ed kapara ton saserdoten 144,000. Sikaray magmaliw a matunong, ya aglabat nideklaran matunong bilang kakaaro na Dios. Sikaray “pinmawil a binmilay,” nagnap lan bulos ed atawir ed si Adan a kasalanan tan ipapatey. (Apocalipsis 20:5; 22:2) Agaylay pagmaliwan na satan a bendision! Manlapud punto de bista tayo natan, ompatnag a say makasaserdoten kimey nen Jesus tan 144,000 so nasumpal la’d satan. Saray bendision na babaleg ya Agew na Pananakbong so niyaplika’d satan ed inkagnap. Niarum ni, “iter [nen Jesus] so panarian ed Dios tan Ama” to. (1 Corinto 15:24) Niwalay kaunoran a subok parad katooan, insan si Satanas tan saray demonyo to so deralen a maando.​—Apocalipsis 20:7, 10.

17. Nisesengeg ed gayagan manatalaran ed sikatayo, anto so kaukolan a determinadon gawaen na balang sakey ed sikatayo?

¹⁷ Anton betang, no wala bilang, so sumpalen na “maandon sipan” ed onggapo lan makapalikliket a panaon? Aliwan sikatayo so mangibaga’d satan. Antokamay niparungtal la nen Jehova so magenap la natan. Pankelkelawan to itayo tekep na galang. Isipen pa—andi-anggaan a bilay bilang kabiangan na “saray tawen a balo tan dalin a balo”! (2 Pedro 3:13) Komon ta anggapoy mamakapuy ed pilalek tayon tawiren itan a sipan. Say italindeg a malet so nayarin agmainomay. Inkuanen Pablo: “Ta wala so pakapankaukolan yo ed anos, pian, dia ed kayari na panggawa yo na linaway Dios, awaten yo so sipan.” (Hebreos 10:36) Balet, tandaan, antokaman a probleman talonaan, antokaman ya isusumpan labanan, so anggapoy kuenta no ikompara’d gayagan manatalaran ed sikatayo. (2 Corinto 4:17) Kanian, anggapo komon ed sikatayo so “onsener pian pakabalangan.” Imbes, paneknekan tayo komoy inkasikatayo ya iba na saray walaan na pananisia ed kilalaban na kamarerwa.” (Hebreos 10:39) Amin tayo komon so walaan na sigpot a panagmatalek ed si Jehova, say Dios na saray sipanan, diad magnayon a kabendisionan na balang sinansakey ed sikatayo.

[Paimano ed leksab]

Kasin Atalosan Yo?

◻ Nilikud ed alanaan a Kristianos, sioparay nabebendisionan diad panamegley na Bini nen Abraham?

◻ Diad kabebendisionan diad panamegley na balon sipanan, panon a say arum a karnero so singa proselitas ed silong na daan a sipanan?

◻ Panon a say arum a karnero et nabendisionan diad panamegley na areglo na babaleg ya Agew na Pananakbong?

◻ Akin a tinawag nen Pablo so balon sipanan a “maandon sipan”?

[Kahon ed pahina 21]

Sagradon Serbisyo Diad Templo

Mandadayew so baleg ya ulop a kaiba na alanaan a Kristianos diad mangaraldalin a lolooban na baleg ya espiritual a templo nen Jehova. (Apocalipsis 7:14, 15; 11:2) Anggapoy rason ya ibagan sikaray walad nibiig a Korte na saray Gentil. Sanen wadiad dalin si Jesus, wala so Korte na saray Gentil ed templo. Balet, diad madibinon apuyanan iran plano na saray templo nen Solomon tan Ezequiel, anggapoy probisyon parad Korte na saray Gentil. Diad templo nen Solomon, wala so akinpaway a lolooban a ditan et saray Israelita tan proselita, lalaki tan bibii, so naniiban nandayew. Saya so mapropetikon padron na mangaraldalin a lolooban na say espiritual a templo, ya akanengnengan nen Juan na baleg ya ulop a mangisasaklang na sagradon serbisyo.

Balet, saray saserdote tan Levita labat so makaloob ed dadalem a lolooban, a kawalaay baleg ya altar; saray saserdote labat so makaloob ed say Masanto; tan say atagey a saserdote labat so makaloob ed Sankasantosan. Say dadalem a lolooban tan say Masanto so natatalosan a mangiyaanino ed nikaduman espiritual a kipapasen na alanaan a Kristianos ed dalin. Tan say Sankasantosan so mangililitrato ed say tawen a mismo, a pakaawatan na alanaan a Kristianos na imortal a bilay a kaibay mangatatawen ya Atagey a Saserdote ra.​—Hebreos 10:19, 20.

[Litrato ed pahina 23]

Nisesengeg ed gayagan manatalaran ed sikatayo, ‘nawalaan tayo komon na pananisia ed kipreserban mabilay na kamarerwa’