Mankokompesal Iray Iglesia
“Say Papa so Mamapabista ed Iglesia.” “Say Inkisisyon tan Sumpa’d-Semitismo—Ipaparaan na Iglesia so Mea Culpa To.”a “Mea Culpa Parad Holocaust.” “Mipupulangan Iray Metodista ed Saray Indian ed Arawin Bukig.”
AKABASA ka ta la na onia iran manunan balita? Ompatnag ya ombebetbet, a saray iglesia et mangaako tan mipupulangan lapud agawaan da ed apalabas iran siglo. Mantutultuloy ya ipapabitar na media iray balon mea culpa na papa.
Sano Mipeperdonaan so Papa
Diad baetan na 1980 tan 1996, ‘inaksobi nen John Paul II so maawaran iran kasalanan na Iglesia odino akiperdonaan’ na ag-onkulang a 94 danay, kuan na komentaristay Vatican a si Luigi Accattoli ed libro ton Quando il papa chiede perdono (Sano Mipeperdonaan so Papa). Unong ed si Accattoli, “diad Iglesia Katolika, say papa labat so makanepegan a manggaway mea culpa.” Tan saya so nagagawa to, diad panutukoy ed sanka-kontrobersiaan iran ebento ed awaran na Katoliko—saray Krusada, guerra, pananuporta ed saray inkadiktador, inkaapag-apag ed iglesia, say sumpa’d-Semitismo, saray Inkisisyon, say Mafia, tan rasismo. Diad sakey a memorandum ya impawit nen 1994 ed saray kardinal (ya ikokonsidera na arum a sankaimportantian a dokumento ed legay inkapapa), improponi nen John Paul II so “sakey ya inkalapagan tan milenyal a panangikompesal na saray kasalanan.”
Pigaran obispo so anumbok ed alimbawa na papa. Nen Disyembre 1994 onia so inreport na peryodikon Il Giornale na Italya: “Dakel ya Amerikanon obispo so inmapireng ed telebisyon tan mapublikon mipeperdonaan.” Parad anto? Parad panagmelmelag ed problema’d saray pedophile a papari, diad kapasakitan na dakel a biktiman kalangweran. Nen Enero 1995 inreport na peryodikon La Repubblica so “sakey ya agnaparaan a balikas ed awaran na kaplesan a Katolisismo”—agbinaliwalay problema ed agpangas-asikaso nen Papa Pius XII nipaakar ed Holocaust. Nen Enero 1995 inreport na satan met lanlamang a peryodiko a say Aleman ya obispo so mipeperdonaan parad “dakel a kasalanan” na saray Romanon Katoliko ya anuporta ed saray krimen na saray Nazi. Nanduruman Protestantin iglesia so nisilong met ed dilin-kritisismo.
Akin?
Papasesegen itayo na Biblia a miperdonaan sano akapankasalanan itayo, tan dakel so mangirayew ed saray iglesia sano isilong day inkasikara ed dilin-kritisismo. (Santiago 5:16) Balet akin a gagawaen iya na saray iglesia? Panoy pangapekta na satan ed paraan na panmoria tayo ed sikara?
[Paimano ed leksab]
a Say Latin parad “dilin kasalanan ko,” so kabiangay dasal na Katoliko (say Confiteor odino, “mankompesal ak”), a leleg to et ulit-uliten na saray membroy iglesia iyan balikas.