Say Misteryo ed Inkamasakit

NANTAI SO MELAG NIN OWMADJI. Nanaburido si Hawa, ya ina to, ompan na-dehydrate; abalitaan ton aganggano ni labat ya inatey so anak na kapinsan to lapud satan. Labay na bai nen Owmadji, katulangan a bii nen Hawa, ya awiten si Owmadji ed albolaryo na sakey a tribu. “Walay mauges ya espiritun mangidadapoy sakit ed ugaw,” so inkuanto. “Sikatoy agmo labay a sulongan na galing a pansumbra, kanian onggagapo la natan iray problema!”

SAYAN kipapasen so kaslakan ed dakel a parti na mundo. Panisiaan na nilasus minilyon a say agnanengneng a pansesengegay sakit et saray mauges ya espiritu. Tua kasi iya?

Impamabrika ed Misteryo

Nayarin agmo mismon panisiaan a saray agnanengneng ya espiritu so pansesengegay sakit. Diad tua, nayarin pankelawan mo no akin ya ontan so isipen na sakey, lapud ta niparungtal la na saray sientista a say pansesengegan na maslak iran sakit et saray mikrobyo tan bakterya. Balet, tandaan ya aglawas kabisado na sankatooan so nipaakar ed sarayan virus a lelesaay sakit. Anggad sanen naimbento nen Antonie van Leeuwenhoek so mikroskopyo nen koma-17 siglo, nanengneng la na too iray angkekelantingot ya organismo. Anggaman wala la itan, atalosan lambengat ed siensia so manunan siglaotan na saray virus tan sakit makasengeg ed saray adiskobre nen Louis Pasteur nen koma-19 siglo.

Lapud ag-amta na maslak ed awaran na too iray pansesengegay sakit, dakel so atibukel iran an-anito, pati say teorya ya amin a sakisakit et papalesaen na saray mauges ya espiritu. Insuheri na The New Encyclopædia Britannica so sakey a paraan no panon iyan atibukel. Inkuan na satan a sinalin tinambal na saray akadkaunan managtambal so mansasakit diad panamegley na nambabangil a klase na lamot, bulobulong, tan antokaman nin naala ra. No maminsan et epektibo so arum ed saraya. Insan iyarum la na managtambal ed proseso na pantatambal to so dakel niran maaniton ritual tan ag-agamil, pian nadisimula so peteg a tambal. Diad ontan et seseguroen na managtambal a mantultuloy nin manpatambal ed sikato so totoo. Diad onian paraan, say medisina so alimbos na misteryo, tan asagyat so totoo ya onkerew na tulong ed panamegley na labas lay pakayari na too.

Siansian uusaren ed pigaran daldalin irayan akaugalian lan paraan na panagtambal. Dakel so mankuan a say sakit so manlalapu ed saray espiritu na inaatey laran inmunan atateng. Ibabaga met na arum a say Dios so panlalapuay sakit tayo kanian say beblay et dusan parad saray kasalanan tayo. Anggano natatalosan la na walaay pikakabat a totoo so biolohikon klase na sakit, siansian tatakotan da ni iray impluensian labas lay pakayari na too.

Lapud sayan katatakot, aanamoten na saray manananem tan akaugalian laran managtambal so totoo. Anto sirin so nepeg tayon panisiaan? Makatulong kasi so panilalo ed saray espiritu pian naasikaso so bunigas tayo? Anto so ibabaga na Biblia?