Talaga Kasin Wala ni so Mangiyaansakit?
“Saray lua na saray naaposan” so manag-agus. Inlua iratan na saray biktimay dakerakel a “gawa na panaglames” diad intiron mundo. Mabetbet a liknaen na saramay nabibiktima ya “andian ira na managligliwa” —ya anggapon talagay mangiyaansakit ed sikara.—Eclesiastes 4:1.
ANGGAMAN ed sayan iyaagus na saray lua, ag-aabageyen na arum so paniirap na kapara ran totoo. Agda lilimenen so panpapairap na arum a totoo, a singa say saserdote tan say Levita ed ilustrasyon nen Jesu-Kristo nipaakar ed samay lakin tinambangan, tinakewan, tan pateypateyan a tinaynan ed dalan. (Lucas 10:30-32) Basta maong so kipapasen da tan saray pamilya ra, anggapoy pibabali ra ed arum. Singa da ibabagan, “Antoy pibabalik ey?”
Agtayo nepeg a pankelawan iya. Impasakbay nen apostol Pablo a diad “saray kaunoran ya agew” et dakel a totoo so magmaliw ya ‘anggapoy aro ra ed nianakan.’ (2 Timoteo 3:1, 3) Paneey-eyan na sakey a makakaimano so napapatnagan lan agmanangiyansakit iran awawey. Inkuanton: “Say datin pilosopiya tan tradisyon na Irlandya nipaakar ed panangiyansakit tan itutulong so nasasalatan la na balon prinsipyo na pagmamaliw a binubukor.” Diad sankamundoan, pankikimeyan tan aalaen na totoo so parad inkasikaran dili, ya anggapo lawari so pibabali ra ed sasagmaken na arum.
Pankaukolan ed Sakey a Mangiyansakit
Maseguron nakaukolan a walay mangiyansakit. Alimbawa, nonoten pa so nipaakar ed begtebegtew a too diad Alemanya ya “aromog ya akayurong ed arap na TV to—limay taon la kayari na impatey to ed Krismas.” Sayan “diborsiado, baldado lan begtebegtew,” a naandian lay ilalo lapud makapaermen iran eksperiensia to ed bilay, so ag-alimen angga ed inkaupot lay imbangko to ya ibabayar ed panaabang to. Anggapon balot so talagan angiyansakit ed sikato.
Isipen pa met iray pakaskasin biktima na saray makapanyari tan maagum a diktador. Diad sakey a lugar, ngalngali 200,000 a totoo (kakapat na populasyon) so “inatey lapud inkalames tan eras” kayari na maramsak ya impanamsam ed dalin da. Odino isipen pa so nipaakar ed saray ugugaw a nidunget ed ngalngali agnaakon panagduksa. Inkuan na sakey a report: “Abalbaleg so porsiento na ugugaw [ed sakey a nasyon] ya akanengneng na dakerakel ya inkaruksa—panagpatey, panagpekpek, panagpasoot, a no maminsan et ginawa na arum iran katayatdang.” Natalosan mo no akin a mansibsibek a nitepet na sakey ya abiktima na ontan iran ag-inkahustisya, “Talaga kasin wala ni so mangiyaansakit ed siak?”
Unong ed sakey a report na Nasyones Unidas, nakaukolan a pasaragen na 1.3 bilyon a too ed mairap iran bansa so kantidad a kulang na sakey a dolyar (U.S.) kada agew. Manuumameng ira no kasin wala ni so mangiyansakit. Ontan met ed nilibon naniibakwit ya, unong ya inkuan na sakey a report ed The Irish Times, “so nidunget ed aglabalabay a pakapanayam ed refugee camp odino ed bansan agmakapanustuni ed sikara odino diad panalin ompawil ed binalegan dan dalin a siansia nin natatabek [odino, bubuyaken] na bakal odino etnikon inkaapag-apag.” Inlaktip met na satan a report iyan makapagonigon a nagagawa: “Ilikdem moy matam, manbilang kay anggad talora, wala lay sakey ya ugaw ya aragas. Sakey ed 35,000 ya ugugaw so ompatey natan lapud kabibigot odino ed sakit a napaliisan ni.” Agpankelawan a dakerakel so onkekelyaw lapud gonigon tan panoot-ot!—Ikompara so Job 7:11.
Kasin amin na saya so ginetman magmaliw ya onia? Diad tua, wala ni kasi so aglambengat mangiyansakit noagta walaan met na pakayarin mamatunda ed paniirap tan mamaabig ed amin ya ot-ot a nasasagmak na totoo?
[Picture Credit Line ed pahina 2]
Cover and page 32: Reuters/Nikola Solic/Archive Photos
[Picture Credit Line ed pahina 3]
A. Boulat/Sipa Press