Tepetepet na Saray Manbabasa
Anto so labay ya ibaga na say managtipon sanen inkuan ton “sakey a laki ed sanlibo so aromog ko, balet diad amin na saraya et anggapoy aromog kon bii”?—Eclesiastes 7:28, NW.
Pian sustoy pakatalos tayo ed sarayan impuyan a salita, nepeg tayo nin amtaen no antoy panmoria na Dios ed saray bibii. Singa bilang, tinukoy na Biblia so abalo a manugang a bii nen Noemi a si Rut, a “sakey ya ekselentin bii.” (Rut 3:11, NW) Inkuan met na Uliran 31:10 a say maong ya asawan bii et ‘arawi nen saray rubi so bili to.’ Anto sirin so labay ya ibaga na ari na Israel nensaman a si Solomon sanen inkuanton: “Akaromog ak . . . na sakey a tuan laki ed sanlibo, balet agak balot akaromog na sakey a tuan bii”?—Moffatt.
Ipapabitar na akapaliber a teksto a maseguron say moral na saray bibii ed panaon nen Solomon et abeba. (Eclesiastes 7:26) Nayarin say manunan sengegan na saya et say impluensya na saray dayon bibii a mandadayew ed Baal. Anggan si Arin Solomon a mismo et naimpluensyaan na dakel a dayon kaasawaan to. Sikatoy “angasawa na piton lasus a prinsesas, tan angiyamong ni na talon lasus ya arum iran bibii,” kuan na Biblia, tan “tinangguyor dan onarawi ed Dios” pian mandayew ed saray palson dirios. (1 Arari 11:1-4, Maung a Balita) Abeba met iray estandarte ed moral na saray lalaki, ta diad sanlibo et wala labat lay sakey a matunong a laki, singa anggapo lanlamang. Onia so konklusyon nen Solomon: “Nia, saya lambengat so aromog ko a say Dios ginawa to so too a maptek; balet sikara nananap ira na dakerakel a palpaltaw.” (Eclesiastes 7:29) Sayan konklusyon et parad amin a katooan, aliwa labat a parad lalaki. Kanian, nepeg a moriaen iray salita a naromog ed Eclesiastes 7:28 bilang komento ed inkalapagan a kipapasey moral na saray totoo ed panaon nen Solomon.
Balet, wala ni posiblin kabaliksan na sayan bersikulo. Nayarin propesiya met iya, ta anggapon balot so bii a nasnaspot a tinmulok ed si Jehova. Balet ta walay lakin akapanggawa ed satan, salanti, si Jesu-Kristo.—Roma 5:15-17.
[Litrato ed pahina 31]
“Sakey a laki ed sanlibo”