Aromog Koy Peteg a Kabaliksan na Bilay

Unong ed salaysay nen Gaspar Martínez

Saya so istoryay bilay ko bilang pobrin taga baryo a yinmaman ed syudad. Balet nanengneng yon say kayamanan ya atipon ko et aliwan samay mismon inilaloan ko.

BINMALEG ak ed anggapoy asenson baryo na Roja, rehyon a bandad amianen na Spain, nen dekada na 1930. Intundak so paneeskuelak nen manedad ak na samplora, balet ta diad saman et amtak lay manbasa tan mansulat. Naynay ak ed alog, kaibak iray anemiran agagik a manpapastol ed saray karnero tan mandadalus ed melag a dalin mi.

Lapud kairapay-bilay, inisip min importantin talagay kuarta tan kaykayarian. Makakaibeg kami’d saramay maaligwas so bilay da. Anggaman ontan, inkuan na obispo a say lugar mi so “sankarelihyosoan ed saray baryo a sakop to.” Agto naisip a diad saginonor et dakel so manaynan ed Katolisismo.

Pananap ed Bengatlan Magmaong

Inkasal koy Mercedes a taga met ed baryo mi, tan ag-abayag et awalaan kami sakey ya anak a laki. Nen 1957, inmalis kami ed asingger a syudad na Logroño, tan diad saginonor et tinmumbok iray amin a kapamilyak. Lapud anggapoy tanton inaral ko, amoriak a mairap so pananap na marakep a trabaho. Inisip ko no iner so pakaromogan ko na tulong. Kanian nananap ak ed librarya, anggaman agko amtay aanapen ko.

Ag-abayag et nadngel koy programa ed radyo a mangiyoopresi na kurson panagaral na Biblia panamegley na sulat. Sanen asumpal ko itan, akitongtong ed siak so pigaran Protestante. Aminpiga ak met ya inmatendi ed simbaan da, tan naimatonan koy kompetensiaan na saray prominentin membro ra. Kanian agak la pinmawil, tan inisip kon nayarin ontan met so amin a relihyon.

Amoriak no Anton Talagay Importante ed Bilay

Nen 1964, walay sakey a kalangweran a manngaran na Eugenio a dinmalaw ed abung mi. Sikatoy sakey a Tasi nen Jehova, relihyon ya agko nin balot nadngelan ed saman. Balet ta labalabay kon pantongtongan so nipaakar ed Biblia. Abaloan ko et magenap lay amtak ed Kasulatan. Diad impantongtong mi et insisitas ko met iray pigaran teksto ed Biblia a naaralan ko ed samay kurson panagaral na Biblia panamegley na sulat. Anggaman indepensak iray doktrinay Protestante, diad tua et agko iratan panisiaan.

Kayari na amiduan andukey ya impantongtong mi, aksobien kon singa ekspertoy Eugenio ed Biblia. Nandinayewan ko ta anggaman mas abebay aral to nen say siak, amta to no anton teksto so ibasa tan sarag ton ipaliwawa itan. Imbasa to ed Biblia a manbibilay tayo la ed kaunoran iran agew tan magano lan pagmaliwen na Panarian na Dios a paraiso so dalin. Asagyat ak ed satan.​—Sal. 37:11, 29; Isa. 9:6, 7; Mat. 6:9, 10.

Impaiyaralan ak na Biblia. Amin lawarin naaralan ko et balo ed siak, tan tinmanek itan ed pusok. Awalaan ak na pankanawnawan naromog so peteg a kabaliksan na bilay. Aromog kon siansia itan! Aliwa lan manuna ed siak so pansasagpot kon paasensoey bilay ko tan say panaanap na marakep a trabaho. No say sakit tan ipapatey et naandi, agta mas lalo ed saray arum nin problema?​—Isa. 33:24; 35:5, 6; Apo. 21:4.

Imbagak a tampol ed saray kakanayon ko iray nanaaralan ko. Maliket kon impaliwawa ed sikara so sipan na Dios a gawaen ton paraiso so dalin a panayaman na matoor a totoo ed andi-anggaan.

Inawat na Pamilyak so Katuaan

Ag-abayag, labindua kami lan mantitipon ed abung na pangamaen ko kada ngarem na Simba pian pantongtongan iray sipan na Biblia. Manga duara odino taloray oras min manaaral ed loob na sakey simba. Sanen anengneng nen Eugenio ya interesado so dakerakel a kakanayon ko, inyuksoy ton iyaralan so kada pamilya.

Wala ni ray arum a kakanayon ko diad Durango, melag a baley ya 120 kilometro so kaarawi to, tan anggapoy Tasi ditan. Kanian kayari taloy bulan, nambakasyon ak na pigaran agew pian bisitaen ko ra tan ipaliwawa’d sikara so balon sisisiaen ko. Diad saman et ngalngali samplora kamin mantotongtong kada labi, tan nasabi mi anggad palbangon. Malikeliket iran amin ya ondengel. Sanen onalis ak la, angitilak ak na pigaran Biblia tan literatura a base ed Biblia. Tan manlapu la’d saman et nantultuloy so komunikasyon mi.

Anggapo ni Tasin nampulong ed Durango ed saman. Sanen asabin dinmalaw iray Tasi ditan, wala lay 18 a manatalaran a paiyaralan na Biblia. Mabulos iray Tasi a mangiyaral ed kada pamilya.

Balet, siansia nin aglabay nen Mercedes a naaralan so katuaan, aliwan lapud agto naawat iray bangat na Biblia, noagta lapud takot ed too. Sebel ed Spain so kimey na saray Tasi nen Jehova ed saman a panaon, kanian inisip ton ompan paekalen na gobierno so duaran anak mi ed eskuelaan tan busolen kami na kakaabay mi. Balet sanen anengneng ton aawaten na interon pamilya mi so katuaan, labay to met lay manaral na Biblia.

Diad loob na duay taon, 40 membro na pamilya mi so nagmaliw a Tasi tan abautismoan bilang simbolo na dedikasyon dan panlingkoran so Dios. On, saksakey lay gagala mi’d bilay. Aliknak a talagan walay agawaan kon makanakana. Abendisyonan kami na dakerakel ya espiritual a kayamanan.

Lalon Onyayaman Legan Ak ya Ontatatken

Diad tinmumbok a 20 taon, inyapasakey koy imanok ed pamabaleg ed duaran lalakin anak mi tan ed itulong ed kongregasyon. Sanen inmalis kami nen Mercedes ed Logroño, walay manga 20 labat a Tasi ed saman a syudad a walaay 100,000 a populasyon. Ag-abayag et akaawat ak na dakel iran responsabilidad ed kongregasyon.

Insan, nen 56 ko la, biglan nansara imay pabrikan pantratrabahoan ko, kanian naandian ak na anapan. Abayag ko lan pilalek so magmaliw a payunir, kanian pankanawnawak la ya. Melag labat so nanawat kon pension, tan kulang itan ed sikami. Nantrabaho met si Mercedes kanian asuportaan mi pamilya mi tan agkami kinmulang. Payunir ak ni anggad natan. Diad pana-panaon et manlilingkor si Mercedes bilang auxiliary payunir, tan talagan panliliketan toy manpulong.

Diad apalabas a pigaran taon, regular a mangititilak si Mercedes na saray magasin tayo ed sakey a kalangweran a biin manngaran na Merche, ya akapanaral lay Biblia sanen ugaw ni. Labalabay nen Merche a basaen iray literatura tayo, tan naimano nen Mercedes a papablien nin siansia nen Merche so katuaan. Diad kaunoran et sikatoy impaiyaralan na Biblia tan inmaligwas ed espiritual. Balet, si Vicente, say masiken to, et mainum tan anggapoy permanentin trabaho to. Kanian agto nalegpet so pamilya to tan lapud satan a bisyo to et ngalngali nabuyak so panamaley da.

Imbaga nen akulaw ko ed si Merche a nakatongtong ko komoy Vicente, tan akapantongtong kamin siansia. Kayari pigaran imbisitak, sikatoy impaiyaralan met la na Biblia. Kalkalnan anguman si Vicente, tan pigay agew ton nitunda so panag-inum to. Insan nen kien et sakey simba lan masulok ya agla maniinum. Asabi panaon a talagan sigpot to lan nitunda iyan bisyo. Sankaimanoy impanguman na itsura to, tan wala lay pankakasakey da bilang pamilya. Natan et manaayam la ran sankapamilyaan ed Canary Islands tan baleg so nitutulong da ed melag a kongregasyon diman.

Sano Papawilen Koy Apalabas

Anggaman inaatey la so pigara ed saray kakanayon kon akapanaral nensaman na Biblia, siansia nin ondarakel so kakanayon kon mangaawat ed katuaan, tan talagan benendisyonan kami na Dios. (Uli. 10:22) Makapalikliket a nanengneng ya amin lawarin niyaralan na Biblia, 40 taon lay apalabas, kaiba la ray anak tan apo ra, et siansian nin matoor a manlilingkor ed si Jehova!

On, dakerakel lay kakanayon ko natan a nagmaliw a Tasi, say arum ed sikara et manlilingkor bilang mamatatken, ministeryal a lingkor, tan payunir. Say panguloan ya anak ko tan say asawa to et manlilingkor ed sangan opisina na saray Tasi nen Jehova diad Madrid, Spain. Sanen nampabautismo ak, manga 3,000 kami labat a Tasi diad Spain. Natan et masulok kami lan 100,000. Talagan panliliketan koy sigpot-panaon a ministeryo, tan misalsalamat ak ed Dios lapud nauusar koy bilay ko ed panseserbi ed sikato. Anggaman abebay aral ko, diad panapanaon et makapanlilingkor ak bilang kasandin manangasikaso na sirkito.

Agni abayag et akabatan kon ngalngali anggapo lay manaayam diman ed binalegan kon baryo. Lapud irap na bilay, apilitan iray totoo a taynan iray dalin tan abung da pian naagwat ira ed kairapan. Makapaliket ta dakel ed saramay inmaalis, kaiba ak la, et akaromog na espiritual a kayamanan. Aromog mi so peteg a kabaliksan na bilay tan anggapo lay makapipara’d liket na panagserbi ed si Jehova.

[Litrato ed pahina 32]

Amin lawari ed pamilya nen Agin Martínez a walad katuaan