Saray Apokripal ya Ebanghelyo​—Inyamot Iran Impormasyon Nipaakar ed si Jesus?

“ALIWAN basta-basta iyan adiskobre. Seguradon dakel so nasyodotan.” “Lapud saya et manguman so amta tayod Kristianismo nensaman.” Komento iratan na saray iskolar ya malikeliket ed inki-publish na “Ebanghelyo nen Judas” ya ibabaga ran abalang ed masulok ya 1,600 taon (walad tagey).

Interesado lamet iray totoo ed ontan iran apokripal ya ebanghelyo. Ibabaga na arum ya nabasad saraya iray importantin agawgawad bilay nen Jesus ontan met ed saray bangat to ya abaybayag kunon inyamot. Balet, anto iratay apokripal ya ebanghelyo? Talaga kasin ipapaamta na saratan iray tuan impormasyon nipaakar ed si Jesus tan ed Kristianismo ya anggapod Biblia?

Kanonikal tan Apokripal Iran Ebanghelyo

Diad baetan na 41 tan 98 C.E., insulat nen Mateo, Marcos, Lucas, tan Juan iray rekord a “mangisasalaysay ed bilay nen Jesu-Kristo.” (Mateo 1:1) Sarayan rekord et tatawagen met no maminsan ya ebanghelyo, a say labay ton ibaga et “maong a balita” nipaakar ed si Jesu-Kristo.​—Marcos 1:1.

Anggaman wala ray impappasan istorya tan arum nin rekord nipaakar ed si Jesus, sarayan apatiran Ebanghelyo labat so bibidbiren ya impuyan na Dios tan manepeg ya kabiangan na Masanton Kasulatan​—pakabasaan iraya na saray ‘tuan bengatla’ nipaakar ed impanbilay tan impanbangat nen Jesus. (Lucas 1:1-4; Gawa 1:1, 2; 2 Timoteo 3:16, 17) Kaiba irayan apatiran Ebanghelyo diad amin ya dagdaan iran listaan na Kristianon Griegon Kasulatan. Agbalot nakuestion ya sarayan Ebanghelyo et susto tan manepeg ya kabiangan na impuyan a Salita na Dios.

Diad inlabas balet na panaon, wala ni ray arum a sulsulat ya ebanghelyo met kuno. Saraya et tatawagen ya apokripal.a

Diad pansamposampot na komaduan siglo, insulat nen Irenaeus a taga Lyon ya saramay inmekal ed Kristianismo et nanggawa ra na “amayamay iran apokripal a sulat ya singa tua balet ta palso.” Kaibad saratan iray ebanghelyon “gawa-gawa da labat pian wetweten” iray totoo. Lapud satan et impasen ya delikado so pambasa tan nawalaan na apokripal iran ebanghelyo.

Balet, wala ray monghe tan managkopya nensaman ya angisinop tan nanggawa na saray kopya na saratan ya apokripal ya ebanghelyo. Nen koma 19 siglo, dakel so nainteresan ed saratan tan dakel so adiskobrin koleksion na nanduruman bersion tan edisyon na apokripa, kaiba lay pigaran ibabaga ran ebanghelyo. Diad panaon tayo et wala ray edisyon ya ni-publish ed dakel ya modernon lenguahe.

Saray Apokripal ya Ebanghelyo: Agnapanisiaan Iran Salaysay Nipaakar ed si Jesus

Nabasad dakel ya apokripal ya ebanghelyo so nipaakar ed totoon mataltalag ya abitla odino ag-ingen abitla ed samay apatiran kanonikal ya Ebanghelyo. Nabasa met kuno ditan iray ginawgawa nen Jesus nen sikatoy ugaw ni. Nia ray pigaran alimbawa.

◼ Say “Akadkaunan Ebanghelyo nen Santiago,” a tatawagen met ya “Say Inkianak nen Maria,” et nipaakar ed inkianak tan impanugaw nen Maria tan anggan say impiasawa tod si Jose. Mapatpatnag no akin ya adeskribe itan ya palson istorya tan alamat labat. Papapawayen na satan ya nansiansian birhen si Maria tan malinlinew ya insulat itan pian sikatoy pagalangan.​—Mateo 1:24, 25; 13:55, 56.

◼ Say “Infancy Gospel of Thomas” et nipaakar ed impanugaw kuno nen Jesus​—manlapud edad ya 5 anggad 12​—tan akasulat ditan iray pigaran agnapanisiaan ya milagron ginawa to. (Nengnengen so Juan 2:11.) Si Jesus kuno et benger, paweg, tan maangat ya ugaw, ya uusaren toy ekstraordinaryon pakayari to pian ombawid saray maestro to, kakaabay da, tan saray kaugawan to. Arum ed sikara kuno et binulag, piniley, odino pinatey to ni ingen.

◼ Nabasad arum nin apokripal ya ebanghelyo a singa say “Ebanghelyo nen Pedro” iray agawgawa kuno ed bista, impamatey, tan inkioli nen Jesus. Say arum a singa say “Saray Ginawa nen Pilato,” a kabiangay “Ebanghelyo nen Nicodemo,” et nipaakar ed totoon sangkot ed saratan ya agawgawa. Saray impormasyon tan totoon nabasa ditan et inimbento labat kanian ag-iratan napanmatalkan. Papapawayen na “Ebanghelyo nen Pedro” ya anggapoy kasalanan nen Poncio Pilato tan imposible so deskripsion na satan ed inkioli nen Jesus.

Say Epekto na Saray Apokripal ya Ebanghelyo ed Kristianismo

Nen Disyembre 1945, diad asingger ed Nag Hammadi, Upper Egypt et walay akotkot na saray tagad ’man ya 13 papiron manuskrito a pakabasaay 52 a sulsulat. Sarayan dokumento ya nisulat nen komapat a siglo et ginawa kuno na saray grupon onsusuporta ed Gnosticism. Say Gnosticism et impanlalaok a bangat na mysticism, paganism, Greek philosophy, Judaism, tan Kristianismo, kanian makapuy so epekto na satan ed saray Kristiano.​—1 Timoteo 6:20, 21.

Unong ed “Ebanghelyo nen Tomas,” “Ebanghelyo nen Felipe,” tan “Ebanghelyo na Katuaan” ya kaibad koleksion ya tatawagen a “Nag Hammadi Library,” saray misteryoson Gnostikon ideya et nanlapun mismo kuno ed si Jesus. Say balon adiskobre ya “Ebanghelyo nen Judas” et panisiaan ya insulat nen panaon na Gnosticism. Ditan et positibo so impaneskribe ed si Judas ta sikato labat kunoy apostol ya akatalos ed si Jesus. Unong ed sakey ya eksperto ed sayan ebanghelyo, si Jesus et adeskribe bilang “managbangat tan manangipaamtay karunongan tan kakabatan, aliwan manangisalba ya inatey parad kasalanan na mundo.” Ibabangat balet na saray impuyan ya Ebanghelyo ya inatey si Jesus bilang bagat a panondon ed kasalanan na mundo. (Mateo 20:28; 26:28; 1 Juan 2:1, 2) On, ginawa iray Gnostikon ebanghelyo aliwan pian pabiskegen so pananisiad Biblia, noagta pian pakapuyen itan.​—Gawa 20:30.

No Akin a Superyor Iray Kanonikal ya Ebanghelyo

No nengnengen tayo iray apokripal ya ebanghelyo, mapatpatnag ya palso iratan. Malinlinew ya ag-iratan impuyan na Dios no ikomparad saray kanonikal ya Ebanghelyo. (2 Timoteo 1:13) Saray angisulat ed saratan et agdan balot akabat si Jesus tan saray apostol to, kanian anggapoy nabasa ditan ya inyamot iran impormasyon nipaakar ed si Jesus tan Kristianismo. Saratan et aliwan susto, gawa-gawa labat, tan peken rekord ya agbalot makatulong pian mas nakabat tayoy Jesus tan naaralan iray bangat to.​—1 Timoteo 4:1, 2.

No nipaakar balet ed saramay nansulat ed saray kanonikal ya Ebanghelyo, si Mateo tan Juan et kaibad 12 ya apostol nen Jesus; si Marcos et akaiba nen apostol Pedro tan si Lucas et akaulop nen apostol Pablo. Insulat day Ebanghelyo diad panangigiya na masanton espiritu na Dios. (2 Timoteo 3:14-17) Nibaga tayo sirin a karga la na sarayan apatiran Ebanghelyo so amin ya impormasyon a kaukolan pian manisia itayon “si Jesus so Kristo ya Anak na Dios.”​—Juan 20:31.

[Paimano ed leksab]

[Picture Credit Line ed pahina 18]

Kenneth Garrett/National Geographic Stock