PINAGKATEMAN ARTIKULO: KASIN POSIBLE SO PAKAWALAAN NA MALIKET A BILAY?
Kasin Posible so Pakawalaan na Maliket a Bilay?
“Pitomploy taon labat so karukey na bilay mi, o walomplo no mabiskeg kami, anggaman ontan, ermen tan segsegang labat so iiter dad sikami.”—Salmo 90:10, Maung a Balita.
TALAGAN tua iratan a salita! Say bilay ed sayan mundo et napnoy “ermen tan segsegang.” Kanian ompan iisipen yo, ‘Posible kasi so pakawalaan na maliket a bilay?’
Imanoen tayo pay Maria. Dati et sikatoy aktibo, balet natan diad edad ton 84 et wala labat lad abung. Maksil ni memorya to, balet ta kinmapuy lay laman to. Kanian, panon a nibagan nawalaan na maliket a bilay?
Sika ey? Ompan nitepet mo met la no kasin say bilay mo et talagan maliket. Nayarin say trabahom et apasakey, makapakesaw tan makapasawa. Sakey ni, ompan agpisasalamatan na arum so trabahon gagawaen mo. Anggan marakep so bilay mo, ompan pampapagaan mo balet no antoy nagawad arapen. Wala ray panaon a maermen tan nade-depress ka. Ompan wala ray agpantatalosan tan kolkolan ed pamilya yo. Odino inateyan ka na inad-arom. Si André et maap-apit ed tatay to, balet ta biglan nansakit so tatay to tan inatey. Ansakisakit itan ed si André, tan singa aglan balot nipawil so datin liket to.
Antokaman a problema so aarapen tayo, walay tepet a kaukolan tayon ebatan: Kasin posible so pakawalaan na maliket a bilay? Naamtaan tayo so ebat ed impanbilay na sakey a too diad dalin manga 2,000 taon lay apalabas—si Jesu-Kristo. Anggaman dakel so dinalan ton irap, sikatoy awalaan na maliket a bilay. Magmaliw met a maliket so bilay tayo no aligen tayo so ehemplo to.