“Dakel so Mankabusol ed Siak”

ISTORYAY BILAY KO:

Binmaleg ak ed Santiago, say capital na Chile. Diad lugar mi, normal labat so druga, dakel so gang, tan mabetbet so krimen. Limay taon ko ni labat nen pinatey day tatay ko. Insan nen kien, akiamong si nanay ko ed lakin busangel. Lanang to kamin bubugbogen. Anggad natan et agko ni nalingwanan iraman ya agawa.

Kanian binmaleg ak met ya bayolenti. Labalabay koy heavy-metal iran togtog, buanges ak, tan nandruga ak met. Kaiba ak a lanang ed gulo na saray managlakoy druga, tan aminpiga da ak ya sinalin pateyen. Aminsan, amay kalaban min gang et angupa na kabkabat a managpatey pian pateyen ak. Asaksak to ak ya aminsan balet akatakas ak. Wala met so grupo na managlakoy druga ya tinutokan da ak na paltog ed ulok tan ibitay da ak ni ingen lawari.

Nen 1996, ginmusto ak ed biin say ngaran to et Carolina, tan nankasal kami nen 1998. Nen inyanak so panguloan mi, natatakot ak ta ompan naalig koy stepfather ko, ya sakitan ko met so pamilyak. Kanian nampatulong ak ed rehabilitation center diad lugar mi. Nampatambal tan nampa-therapy ak, balet anggapo met lanlamang so agawa. Anggapoy angumanan ko. Anggan daiset deperensya, ompetang a tampol so ulok, insan ak la manggulo. Sinalik laingen so manbikkel pian agko la nasakitay pamilyak. Maong labat ta agak atuloyan.

Abayag ak lan ateista, balet labay koy manisia ed Dios. Kanian akila ak ed sakey ya evangelical a relihyon. Diad saman balet et manaaral lay asawak na Biblia ed Saray Tasi nen Jehova. Kakkabusol ko ray Tasi, tan ayew-ayewen ko ra. Balet kalmado ra labat. Aliwan onman so ilaloan kon reaksion da.

Aminsan, imbaga nen Carolina ya basaen kod Bibliak so Salmo 83:18. Malinlinew ya abasak ditan ya say ngaran na Dios et Jehova. Abigla ak ta diad relihyon ko, ibabangat da so nipaakar ed dios, balet aliwan nipaakar ed si Jehova. Nen bandad gapo na taon 2000, nanaral ak met la na Biblia ed saray Tasi.

NO PANON YA INUMAN NA BIBLIA SO BILAY KO:

Diad panaaral koy Biblia, linmemew so liknaan ko nen naamtaan kon si Jehova et makasi tan maperdonan Dios. Alimbawa, ibabaga na Exodo 34:6, 7 ya si Jehova et ‘Dios a mapangasi tan maaro, matantan ya onsanok, tan daakan ed maaro ya abig na linawa, tan katuaan, a mangigagana na maaro ya abig na linawa ed saray nilibo, mamerdona na inkauges, tan impakasumpa, tan kasalanan.’

Pero siansia nin aliwan mainomay parad siak so pangiyaplikad saray nanaaralan ko. Inisip kon agko lan talaga nauman so ugalik. Balet no wala ray panaon ya agko nakontrol so sanok ko, papabiskegen nen Carolina so liknaan ko. Ipapanonot tod siak ya nanenengneng nen Jehova iray sagpot ko. Lapud suporta to, agak sinmuko ya gawaen so makapaliket ed si Jehova, anggano mabetbet kon nalikna ya singa anggapo lay pag-asak.

Aminsan, impabasad siak nen Alejandro, amay angibangat ed siak na Biblia, so Galacia 5:22, 23. Nabasad saratan ya bersikulo ya say bunga na espiritu na Dios et “aro, gayaga, deen, andukey a panag-anos, kaabigan, kamaongan, pananisia, inkaulimek, panangontrol ed dili.” Imbagad siak nen Alejandro ya nawalaan ak na ontan iran kualidad no mandepende ak ed masanton espiritu na Dios, aliwan diad sarilik. Anguma-uman so panagnonot ko lapud satan!

Nen kien, inmatendi ak ed kombension na Saray Tasi nen Jehova. Lapud anengneng ko ya maayos tan malinis ira, tan singa ra sanaagi, akombinse ak ya saya lay tuan relihyon! (Juan 13:34, 35) Nampabautismo ak nen Pebrero 2001.

MARAKEP IRAN RESULTA:

Bayolenti ak nensaman, balet inuman ak nen Jehova pian magmaliw ak ya mareen a too. Singa ak nikutekutep ed lunek balet inagwat ak nen Jehova. Antak ya dakel so mankabusol ed siak, tan agko ra natetel. Balet natan, maliket ak ya manseserbi ed si Jehova kaibay asawak tan duaran anako.

Agmakapanisia ray kakanayon tan datin kakaarok ya anguma-uman ak la. Kanian, pigara ed sikara et interesado met ya manaral na Biblia. Pribilehyok ya tulongan so arum ya nakabat day Jehova. Malikeliket ak no nanenengneng ko met ya uumanen na Biblia so bilay da!