NO PANON YA NAPATUNDA SO PAMBUBUSOLAN

4 | Taloen so Pambusol Diad Tulong na Dios

Ibabangat na Biblia:

“Say bunga na espiritu et aro, liket, kareenan, anos, kaabigan, kamaongan, pananisia, inkaulimek, panangontrol ed sarili.”—GALACIA 5:22, 23.

No Antoy Labay ton Ibaga:

Sarag tayon nitunda so pambusol diad tulong na Dios. Iter tod sikatayo so masanton espiritu to pian nawalaan tayo na saray kualidad tan ugali ya kailangan tayo. Kanian imbes ya bukor tayon labanan so pambusol, mas maong no mantiwala tayod tulong na Dios. No ontan, naeksperiensya tayo may imbaga nen apostol Pablo, say kuan to: “Walay biskeg kon arapen so amin a bengatla lapud samay mangiiter ed siak na pakayari.” (Filipos 4:13) Tan nibaga tayo met iya: “Say tulong ko et manlapud si Jehova.”—Salmo 121:2.

No Antoy Nagawaan Mo:

“Bayolenti ak nensaman, balet inuman ak nen Jehova pian magmaliw ak ya mareen a too.”—WALDO

Manpikasi ka ed si Jehova tan impapusom ya kerewen ed sikato so masanton espiritu to. (Lucas 11:13) Kerew mod sikato ya ikdan to ka na balibali iran ugali. Aral moy ibabaga na Biblia tungkol ed saray kualidad ya panlaban ed pambusol singa say aro, deen, anos, tan kontrol ed sarili. Mananap kay paraan pian nipanengneng mo iratan. Tan miulop kad saramay ontan met so kualidad tan ugali ra. Natulongan da ka pian “napakiwas [kan] mangaro tan manggaway maabig iran kimey.”—Hebreo 10:24; paimanod leksab.

Tuan Eksperiensya—WALDO

Nitunda Toy Pambusol tan Inkabayolenti

Aliwliway impanugaw nen Waldo tan binmaleg ya bayolenti. Imbaga to: “Kaiba ak a lanang ed gulo na saray managlakoy druga . . . Aminsan, amay kalaban min gang et angupa na kabkabat a managpatey pian pateyen ak. Asaksak to ak ya aminsan balet akatakas ak.”

Nen nampaiyaral na Biblia ed Saray Tasi nen Jehova so asawa nen Waldo, agto itan agustoan. Imbaga to: “Kakkabusol ko ray Tasi, tan ayew-ayewen ko ra. Balet kalmado ra labat.”

Asabi panaon, nampaiyaral met la na Biblia si Waldo. Imbaga to: “Siansia nin aliwan mainomay parad siak so pangiyaplikad saray nanaaralan ko. Inisip kon agko lan talaga nauman so ugalik.” Pero, walay naaralan tod Biblia ya akatulong na baleg ed sikato.

Impaliwawa nen Waldo: “Aminsan, impabasad siak nen Alejandro, amay angibangat ed siak na Biblia, so Galacia 5:22, 23. . . . Imbagad siak nen Alejandro ya nawalaan ak na ontan iran kualidad no mandepende ak ed masanton espiritu na Dios, aliwan diad sarilik. Anguma-uman so panagnonot ko lapud satan!”

Lapud nantiwala si Waldo ya sikatoy tulongan na Dios, nakal ya siansia ed puso to so pambusol. Imbaga to: “Agmakapanisia ray kakanayon tan datin kakaarok ya anguma-uman ak la.” Onia ni imbaga to: “Bayolenti ak nensaman, balet inuman ak nen Jehova pian magmaliw ak ya mareen a too.”