Tepet

◼ Panon a makatulong iray attendant ed atateng diad panulong ed ananak dan napansiansia so manepeg ya ugali diad saray miting?

Natural labat a magalaw iray ugugaw, ag-apasal a manyurong a mabayag. Kanian, kayari na miting et manbatikbatik la ra tan usilan day arum ya ugugaw diad Kingdom Hall odino diad arum a panmimitingan, diad paradaan, odino diad dadalanan. Balet, tua unong ed proverbio a: ‘Say ugaw a napaulyan et makapabaing ed ateng to.’​—Uli. 29:15.

Makapaermen ya ibaga, walaray mamasiken tan akukulaw lan agagi ya asakitan lapud adumbo ira na ugugaw tan atumba ira. Saya so sengeg na agmanepeg ya irap tan agmet kapilitan a panggastosan na atateng tan say kongregasyon. Parad dilin kaligenan na ugugaw tan salimbeng na arum, agnaabuloyan a manbatikbatik tan manay-ayam ed loob odino paway na Kingdom Hall so ugugaw.

Saray atateng so walaan na Makasulatan a responsabilidad ya ipasal so ananak a respetoen da iray pasen na panagdayewan tayo. (Ecl. 5:1a) Diad saray Kristianon miting, asamblea, tan kombension tayo, apabtangan iray attendant ya imanoen dan “nagawa komon so sarayan amin ed kasimpitan” tan walaay “uksoy.” (1 Cor. 14:40; Col. 2:5) Nepeg a mansiansia iran alerto sakbay, legan, tan kayari na programa, diad loob man tan ed paway. No batikbatik odino magulo so ugaw, mapangasin patundaen na attendant so ugaw, tan ipaliwawa to ed ugaw no akin ya aliwan marakep iratan a kagagawa. Kaukolan met a mapangasin bagaan so ateng na ugaw nipaakar ed problema tan ed pankaukolay pangasikaso ed ugaw. Nepeg komon ya onkiwas so ateng a mitunosan ed satan.

Natalosan a saray kapanyanak tan melag ya ugugaw so nayarin onakis odino magulo no maminsan legan na miting. Marakep no onsabi iray attendant na 20 minutos sakbay ya onggapo so programa, pian nireserba ra so sampot a duaran dasig a yurongan diad hall parad atateng a malabay ya onyurong ditan a kaiba iray ananak da. Amin tayo so nepeg a mitulongan ya agyuyurongan iratan a nigana ed sikara.

No magulo so ugaw, nepeg ya asikasoen na ateng. No agnapatunda na ateng tan makakadisturbo la, mapangasin ibaga na attendant a no labay na ateng et ipaway to ni so ugaw. Sano imbitaan tayon miaral iray balo ni a kaibay ugaw nin ananak da, kaukolan tayon miabay ed sikara tan tulongan tayo ira no manakis odino magulo iray ugugaw ed arum a paraan.

Mangitarok ed sikatayo na gayaga so pakanengneng ed ugugaw ed amin ya edad diad Kingdom Hall tan ed pakaimaton tayo ed saray maabig a kondukta ra ed loob na abung na Dios. (1 Tim. 3:15) Diad panrespeto ra ed areglo nen Jehova parad panagdayew, sikaray makapangigalang ed sikato tan sikaray naapresia na amin diad kongregasyon.