Tepet

◼ Panon a makatulong so amin pian napansiansia so matukoy a kipapasen diad saray miting ed kongregasyon?​—Deu. 31:12.

Lapud panamabli tayo ed si Jehova tan ed saray probisyon ton pantitipon ed kongregasyon, napapaseseg so amin ya onsabin masakbay tan akaparaan a paibangat ed sikato. Maabig a panoen nin unona iray yurongan ed arapan pian nausar na saramay walaay angkekelag nin ananak tan saramay sagpaminsan a naatrasado iray yurongan ed beneg. Antis ya onggapo so aral, nepeg ya i-set iray elektronikon gadyet pian agmakadisturbo. Ondaiset tan napaliisan iray pakadisturboan no pansiansiaen na amin ya inmatendi so marespeton awawey kaleganan na pantitipon.​—Ecl. 5:1; Fil. 2:4.

No onaatendi la iray balo ni a kabat tayo, maabig no sikaray abayan tayo ed yurongan. Nagkalalo lan makatulong iya no walaray ananak dan kaukolan a nipasal. Nayarin natan labat asali na pamilya so miaral. No ontan, maseguron mas labay da so onyurong ed beneg pian agtanton nadisturbo so arum no kaukolan day ompaway a magano pian asikasoey pankaukolan na ananak da. (Uli. 22:6, 15) Agnepeg ya onyurong iray pamilya a walaay angkekelag ya ananak ed pasen a bulos lan makapaningal-ingal iray ugugaw. Mas maabig no ompaway so ateng no disiplinaen odino asikasoen toy arum niran pankaukolan na ananak to tan kayari na satan et ompawil a tampol ed loob a kaiba ira.

Pansiasiansiaen na saray attendant so mareen a kipapasen a matukoy parad abung na panagdayew. Aasistian da iray pamilya tan saramay sagpaminsan a naatrasado a makaromog na yurongan. Payurongen da iray inmatendi diad mataktika tan makabat a paraan ya agmakadisturbo ed arum. Uusaren day maong a pakatebek sano walaray biglan pakadisturboan. No makakadisturbo la so sakey ya ugaw ed arum, onasingger so attendant pian ontulong.

Amin ya inmatendi’d panagaral so makatulong pian niwalay kipapasen a matukoy ed panaral nipaakar ed si Jehova tan say gagala to parad mareen tan matunong a balon mundo.​—Heb. 10:24, 25.