‘Nagawa Komon so Amin a Bengatla Parad Pakapabiskegan’
1 Sano midedeneng ed agagi tayo, nepeg a gawaen tayo so maabig parad pakapabiskegan da. Kabaliksan na saya a mapaga itayo nipaakar ed pakasalimbengan na kipapasen da ed espiritual. No say trabaho tayo et manasaglawi na panangipresenta ed sakey a produkto odino serbisyo, kaukolan ya alwaran tayon agtayo nigapol iray agagi tayo.—2 Cor. 6:3; Fil. 1:9, 10.
2 Walaray akibali ed nanduruman nengneng na negosyo, ya ipasen daray kaparan Kristiano bilang posiblin kustomer. Papasesegen na pigaran managlako ya organisasyon iray ahente ra a moriaen da bilang posiblin kustomer so amin a totoo—pati iramay karelihyonan da. Mangoorganisa so arum ya agagi na angkabaleg iran pantitipon na Tastasi diad gagalan pasesegen iran mibali ed negosyo. Iprepresenta na arum so anapan da diad pangiyarap na agkekerewen iran babasaen, brosyur, impormasyon ed Internet, odino video tan cassette tape ed kapananisiaan. Manepeg kasi parad sakey a Kristiano ya usaren iray mateokratikon koneksion pian anamoten iray espiritual ya agagi to? Andi!—1 Cor. 10:23, 24, 31-33.
3 Nepeg a Manalwar Iray Agagi: Agto labay ya ibagan agla nayarin minegosyo so sakey a Kristiano ed sakey ya agi. Personal itan a pamaakaran. Balet, walaray mangigapo na saray taktika ed negosyo a mangipaseseg na agum, tan sagyaten day kapananisiaan pian mimuyong ed sikara odino mangipuonan. Dakel ed sarayan negosyo so nalulugi, a kaperdian na baleg a kuarta na saray kamuyong ed negosyo. Anggaman saramay akimuyong ed negosyo so nayarin manpilalek a makatubon tampol, ag-ipapasen na angorganisa a sikatoy agnatetel no nalugi so negosyo. Nepeg a maalwar to lan konsideraen a masakbay no panon a naapektaan so espiritual tan pisikal a pankaabigan na agagi to bektaman ya ag-ontalona so negosyo. Saramay walaay mateokratikon responsabilidad so nepeg a nagkalalo lan manalwar nipaakar ed saray anapan da lapud rerespetoen ira na arum tan panmamatalekan da iran maong. Makapuy no abusoen itan a talek. Saray pribilihyo na sagradon serbisyo so nayarin naekal no agla respetoen na arum so sakey ya agi.
4 Nepeg a say kalat tayo et ‘nagawa komon so amin a bengatla ed pakapabiskegan.’ (1 Cor. 14:26) Nepeg a paliisan tayoy antokaman a pangipaamta na negosyo iran aktibidad dia ed kongregasyon odino pangipresenta ed saratan. Anggapoy pisiglaotan na saratan ed saray Makasulatan a rason tayo unong ed pandaragup tayo.—Heb. 10:24, 25.