Saray Bendisyon ed Pangipanengneng na Apresasyon ed Panangaro nen Jehova—Parte 1
1 Insulat nen apostol Juan: “Aroen tayo ta [si Jehova] so angaro ed sikatayo ya inmuna.” (1 Juan 4:19) Sano isipen tayo so amin ya intarya nen Jehova parad sikatayo, napakiwas itayon mangipanengneng met na aralem ya apresasyon tayo. Angiletneg si Jesus na ehemplo ed panggawa ed saya diad situtulok ya impantasi nipaakar ed ngaran na Dios tan ed Panarian. (Juan 14:31) Makagunggona so pangonsidera ed pigaran paraan a nipanengneng tayoy apresasyon tayo ed aro nen Jehova tan saray bendisyon a resulta na satan.
2 Pankabkaabungan: Imbangat nen Jesus iray babangatan to no panon so pangipulong ed Panarian. Saray panangiwanwan to so malinew a mangipapanengneng a sikaray nankabkaabungan, ya angikayat ed maong a balita. (Luc. 9:1-6; 10:1-7) Mankaukolan na aro ed Dios tan ed kaparan too so pantultuloy a pankabkaabungan sano nipapaarap itayo ed agpananginunang tan isusumpa. Balet, diad pankabkaabungan et sikatayoy personal a nagunggonaan lapud lalon ombiskeg so pananisia tayo, say kombiksion tayo so lalon onsekder, tan lalon magmaliw a masnag so ilalo tayo.
3 Diad pankimey ed silong na panangiwanwan na anghel, naroromog tayo so dakel a naeerasan tan napepegaan ed katuaan. (Apoc. 14:6) Ibabaga na saray unabung ya ipipikasi ray tulong sanen walay tinmoktok a Tasi ed puerta ra. Duaran Tasi tan sakey a melag ya ugaw so mankakabkaabungan ed sakey ya isla ed Caribbean. Sanen denesidi ran onsempet la, say ugaw so angituloy nin bukor ed onsublay a puerta tan tinmoktok. Sakey a kalangweran a bii so angilukas ed puerta. Sanen anengneng iya na saray wala la’d edad, sikaray inmasingger tan akitongtong ed saman a kalangweran. Pinaloob to ra tan impaliwawa ton sikatoy manpipikasi ed Dios a mangibaki na Tastasi a mangibangat na Biblia ed sikato!
4 Pampulong Diad Saray Karsada: Lapud mairap a tuloy ed pigaran lugar so pakasabi ed totoo diad ayaman, say panagpulong ed karsada so epektibon paraan pian napulongan iray totoo. Sakey ni, dakel a totoo so manaayam ed mairap a looban iran komunidad odino guardiadon maong iran bilding ya agtayo makapankabkaabungan. Anggaman ontan, lapud apresasyon tayo ed panangaro nen Jehova et napapakiwas itayon manganamot ed amin a posiblin paraan pian nakatongtong iray totoo tekep na mensahe na Panarian, pati diad panagpulong ed karsada.—Uli. 1:20, 21.
5 Panagpawil: Lapud aanapen tayo iraman so “sinononot ed espiritual a pankaukolan da,” labay tayon gawaen so anggaay nayarian tayo pian peneken itan a pankaukolan. (Mat. 5:3, NW) Kakaukolanen na saya a pawilen tayon salogen iray bukel na katuaan ya intanem tayo. (1 Cor. 3:6-8) Sakey ya agin bii ed Australia so angipalima na sakey a tract ed sakey a bii a singa agtanto interesado. Anggaman kuan, say agi so mapilit ed gunaet ton nasabi lamet iman a bii diad abung to. Sanen sikatoy asabi ton siansia, naamtaan na agi tayo a kayari na primeron imbisita, say bii so angaliw na mabmablin Biblia. Sikatoy ginapoan na agi ya inyaralan!
6 Panangiyaral na Biblia: Saya so sankaliketan tan makatumang a tuloy a kabiangan na ministeryo tayo. Agaylan bendisyon so pakatulong ed totoo a makaaral nipaakar ed si Jehova, a nanenengneng iran manggagawa na pananguman ed kabibilay da pian sikatoy napaliket, insan naimatonan so Kristianon bautismo ra bilang simbolo na dedikasyon da ed Dios!—1 Tes. 2:20; 3 Juan 4.
7 Diad ontumbok a paway, konsideraen tayo so nagkalalo nin paraan a kabebendisyonan tayo lapud pangipapanengneng na apresasyon ed panangaro nen Jehova.