Saray Bendisyon ed Pangipanengneng na Apresasyon ed Panangaro nen Jehova—Parte 2
1 Nen imbeneg a bulan a kabiangan na sayan tema, impabitar mi iray apatiran paraan a nipanengneng tayoy apresasyon parad panangaro nen Jehova diad ministeryo tayo. (1 Juan 4:9-11) Natan et iyarum mi so limara nin paraan a panggawa ed saya. Sano sigpot itayon mibiang ed pananulong ed arum diad espiritual a paraan.
2 Impormal a Panagpulong: Saya so epektibon paraan ed pakaromog ed totoon naeerasan tan napepegaan parad inkatunong tan ed pangipalima na makatulong a literatura ed sikara. Makana so ‘pangaliw na pankanawnawan panaon’ tan pampulong ed amin a sirkumstansya tan ed siopaman a naabet tayo. (Efe. 5:16) Kaukolan tayoy manpakpel a maong pian manpulong ed onian paraan, balet no apresyaen tayo so panangaro na Dios tan saray pankaukolan na totoo, manpulong itayo ed amin a pankanawnawa.—2 Tim. 1:7, 8.
3 Sakey a misionaryo so abendisyonan a maong lapud impangigapo toy tongtongan ed kaparan pasahero ed sakey a taxi. Say laki so angipanengneng na interes. Agawa iray panagpawil, tan nigapo so panangiyaral ed Biblia. Inawat na saman a laki so katuaan tan inmaligwas anggad sikatoy nagmaliw a matatken ed kongregasyon!
4 Pansulat: Nayarin agtayo sarag so mankabkaabungan lapud kaleteyan ed pisikal odino lapud mauges a panaon. Nayarian tayoy mansulat, a mangiter na antikey a panagtasi diad pansulat ed saray indibidual a kabat tayo, saraman so naandian na saray inad-aro ed bilay, odino saraman so agnasasabi ed abung diad teritorya. Makapangitekep itayo na sakey ed saray nipanpanaon a tract tayo a walaan na makapasagyat a nibase ed Biblia a mensahe tan mamaseseg ed saray makaawat pian onkiwas no sikatoy walaan na saray tepet. Usar yoy mismon address yo odino say Kingdom Hall; ipangasin ag-uusaren so address na sangan opisina.
5 Panagpulong Panamegley na Telepono: Saya so maabig a paraan pian nasabi iray totoo ya agtayo nasasabi ed panagkabkaabungan. No gawaen tayo itan ed makabat a paraan, tekep na panangasi, inkataktika, tan dunong, nayarin nagamoran tayo so maabig a resulta. Say Ministeryo tayo ed Panarian ed Pebrero 2001, pahina 5-6, so angitarya na praktikal iran suhestion no panon so pakagamor ed saray sankaabigan a resulta.
6 Sanen manpupulong so sakey ya agin bii panamegley na telepono, tinepetan to so bii no kasin ninonot to lan maong so nipaakar ed arapen to tan say pamilya to. Inmebat so bii a ninonot to la. Impaamta to a lapud inkaandian toy ilalo, isisian toy inkasikato diad ayaman. Lapud apakiwas ed puron panangiyansakit na agi, say bii so inmabobon a mibanaan ed sikato diad asingger a tindaan. Bilang resulta, say bii so mabulos ya angawat ed panagaral na Biblia!
7 Pangabrasa ed Saray Dayo: No inaro tayo iray kaparan totoo, sikatayoy alerton manimano ed siopaman a dayo ya ombibisita ed saray panmimitingan tayo tan ipalikna a sikatoy aabrasaen. (Roma 15:7) Ipatebek ed sikato a sikatoy sakey ed saraman so masimoon ya interesado ed espiritual a pankaabigan to. Say puron panangiyansakit tan pangiyopresi tayo na personal a panagaral ed Biblia so nayarin mamakiwas ed sikaton patulongan ed sikatayo.
8 Say Maong a Kondukta Tayo: Diad panamegley na maabig a kondukta tayo, napaparakep tayo so katuaan. (Tito 2:10) Sano saraman so totoo ed mundo so mangibaga na maabig iran bengatla nipaakar ed sikatayo bilang Tastasi nen Jehova, sikaray mangitatarok na galang ed Dios tayo. (1 Ped. 2:12) Saya met so makatulong ed arum ya onggapo ed dalan a mamaarap ed bilay.
9 Akin ya agrepasoen irayan limaran paraan pian nipanengneng tayo so apresasyon tayo ed baleg a panangaro nen Jehova ed sikatayo tan iyaplika iratan? (1 Juan 4:16) Diad panggawa yo ed satan, sikayoy manani na dakel a bendisyon.