Tepet

◼ Akin a nakaukolan so panalwar sano manpupulong panamegley na koreo?

Say panagpulong panamegley na koreo so abayag lan apaneknekan ya epektibon metodo diad panginabang na maong a balita. Balet, lapud agano niran inkagawa ed mundo, saray totoo so maalwar a tuloy sano manlulukas na agkabisadon sulat. Saray sobre ya ag-amta so nanlapuan odino anggapoy address na angipatulor so kaslakan lan pan-iinapan, nagkalautla no insulat na lima tan makapal. Nayarin aglukasan tan ibantak la itan na saray unabung. Panon tayon naamper so kagawa na saya?

No posibli et imakinilya komon so sulat tan sobre. Kaukolan ya akangaran ed unabung so sobre. Ag-iya-address itan a parad “Manaayam.” Niarum ni, lawas iyan so address yo. No aliwan matukoy so pangiyan na address yo, iyan so ngaran yo tan say address na Kingdom Hall. Agmangipapatulor na saray sulat ya ag-nginaranan (anonymous letter). Agbalot uusaren so address na sangan opisina.​—Nengnengen so “Tepet” ed Nobyembre 1996 a Ministeryo Tayo ed Panarian, pahina 2.

Saray kaaruman a suhestion tan pangaligan a sulat so naromog ed balon libro a Minabang ed Edukasyon na Teokratikon Eskuelaan Parad Ministeryo, pahina 71-3. Ontulong irayan pananontonan ed sikatayo ya epektibon nausar iray sulat pian nipasabi ed arum so maong a balita.